Three months suspension ra kang Ypil, dili dismissal
Sayop ang inpormasyon niadtong nag-text kanako nga ipataktak sa serbisyo si Cebu Provincial Accountant Marieto Ypil bahin niadtong pag-release niya sa P5 million ngadto sa peke nga organization nga mao ang Perdido Lex sa panahon ni former vice governor John-John Osmeña.
Dunay clarification si Atty. Maria Corazon Naraja, tigpamaba sa Visayas Ombudsman, nga way kamandoan ang ilang opisina nga ipataktak sa serbisyo ang opisyal.
Niingon si Naraja nga dunay resolution ang ilang opisina nga igo ra’ng suspensohon si Ypil og tulo ka buwan human namatud-ang sad-an sa kasong neglect of duty sa iyang pag-release sa kantidad sa maong bogus nga organization.
Ngilngig kaayo to’ng isyu sa Perdido Lex kay mao to’y usa sa mga tulis sa kuwarta sa gobyerno nga gipaagi’g legal. Asa ka manangkong ana nga ang mga staff ra sa kanhi vice governor maoy mga incorporator sa Perdido Lex. Unya ang telephone number ug address iya sab sa kanhi bise gobernador.
Mao nga tungod sa pagkadanghag ni Ypil nga wa motarong pagsubay sa iyang hatagan sa kuwarta maoy hinungdan nga siya ipa-suspenso.
Samtang subayonon pa ni Naraja kung na-implementar ba ang three months suspension batok kang Ypil sanglit maglisod pa sila’g retrieve sa case folder kay matud pa naka-archive ug anaa sa ilang storage facility nga buwag sa ilang buhatan.
Natinga lang sab ko niining giingon ni Naraja nga di dayon nila masubay kung na-implementar na ba kay computerize na baya ang ilang opisina.
***
Wa nako matingala nga duna pay daghang bayranan human sa daku’ng kalihukan sa 51st International Eucharistic Congress (IEC).
Natural nga bayran ang mga obligasyon aron dili intawon motagam ang mga supplier ug sa sunod maka-utang gihapon kita.
Sa nigawas nga bana-banang kwentada nga dul-an 300 milyones pesos nga utang sa Simbahan ngadto sa mga supplier, posible pa gani nga modako pa kini.
Samot na tingali kung wa motabang ang katawhan, ingon man ang mga local government units ug mga national government agencies sa mga aktibidadis sa 51st IEC.
Masaligon ko nga masulbad pagdali ang mga bayronon pinaagi kang Monsignor Roberto Boy Alesna, chairman sa committee on finance.
Kung maglisod pagsulbad sila si Monsignor Alesna, puwede man tingali nga may second collection matag misa sa mga mosunod nga mga Domingo aron magaan-gaan ang problema.
***
Wa gyu’y moangkon pagbutang niadtong mga tarpaulins sa viaduct ug ingon man sa boundary sa Talisay ug Cebu City atol sa Statio Orbis sa SRP niadtong Domingo nga nakasuwat ang “Welcome To Binay Country”.
Mahug ra gihapong inutil kining kamandoan ni Acting City Mayor Edgardo Labella nga iyang paimbistigahan kay way nakamontar didto nga CCTV camera.
Ako motuo ko’g gaba nga di gyud magsaba.
Unya nako mohimo’g konklusyon kung kinsay responsable sa pagpamutang sa panahon nga mogawas na ang resulta sa eleksiyon.
Grabe gyud ang pagkagarapal. Baga gyud kaayo’g nawong! Wa gyu’y respeto sa sagrado’ng kalihokan.
***
Nalingaw ko sa interview kagahapon sa among network president sa RGMA nga si Sir Mike Enriquez ngadto kang presidential bet Davao City Mayor Rodrigo Duterte.
Migawas gyud ang iyang pagkamaldito, binugoy, binagsik, sakit mangomedya sa kahanginan.
Sa laktod nga pagka-estorya, sobra gyud siya ka tactless manulti. In fairness niya, nangayo siya’g despensa sa publiko ug gani nagplano siya nga moadto sa Santo Papa aron ipakita ang iyang sinsiridad sa pagpangayog pasaylo.
Nipasabot si Duterte nga kung gusto’g kausaban ang mga tawo sa Pilipinas ilabina ang pagpakigbatok sa corruption ug krimen, dili hatagan og gibug-aton ang iyang mga ngil-ad nga nalitok.
Iyang giklaro nga naingon ini ang mga linya sa iyang lingguwahi kay naglagot na gyud siya sa mga kurakot ug criminal nga buot niyang pakan-on sa bala sa armas ug dokumento nga maoy naka-ingon sa grabeng kapobre.
Tungod sa iyang pagka-babaero, wa malikayi nga gipangutana siya kung kinsay iyang himoong first lady. Iyang tubag nga aron way away, si Inday Sarah nalang nga iyang anak dungan sa pagpasabot nga iyang papuy-on iyang mga asawa sa Malacañang.
Gipangutana usab siya kung tinuod ba nga nagsakit siya’g cancer. Nitubag siya nga ang tinuod iyang asawa maoy nagsakit ug nagsige pa’g dialyses. Nikomedya siya nga may sakit siya nga cancer sa kasing-kasing ilabina kung makakita’g guwapa. Hehehe.
Dili responsive iyang tubag sa pangutana ni Sir Bobby Nalzaro kung makuha ba niya ang Visayan vote nga langkuban sa Visayas and Mindanao. Igo ra siya’ng nisambingay nga sa survey dinhi sa Sugbo siya na maoy pinaka-ulahi ug iyang gihagit ang mga Sugbuanon nga kung wa maka-gusto kaniya mopili nalang sa iyang mga kontra.
Di sab kuno siya mangayo ug funding contribution gikan sa mga tag-iyag ilimno’ng makahubog ug nanggama sa mga sigarilyo nga hugot niyang gipatuman ang pag-ban didto sa Davao.
Pero mangambot lang ko ni Duterte kung matinuod ba ang iyang giingon nga masulbad ang kawad-on sa nasud kung siya maoy mapili.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
