Super Hirit
Ang pinakamaayo nga himoon ni Governor Junjun Davide isip chairman sa Liberal Party, pasagdan nalang niya nga mabakante ang lingkuranan ni late Provincial Board Member Thadeo “Teddy” Ouano kay total duol na kaayo ang eleksiyon.
Ako kining nahuna-hunaan aron patas ug way magmahay sa iyang duha ka mga pambato pagka Provincial Board member sa sixth district karong Mayo nga sila si Mandaue City Vice Mayor Glenn Bercede ug Consolacion Municipal Councilor Julius Alegado nga maoy posibleng pilian basi sa lagda sa DILG.
Gawas pa sab, kini maoy timaan sa liderato sa LP nga magbaton sila’g respeto ug pagbangutan sa ilang kanhi kaubang elected public official.
Unsa man say mahimo sa ihulip ni PB Teddy Ouano niining upat nalang ka buwan nga termino? Gamitong rubber stamp or kiko-kiko sa Hunta Probensiyal?
Sumpay ning maong isyu sa politika, daku ba’g chance si Jonkie Ouano, anak ni Bokal Teddy, nga modaug pagka Board Member ngan nga namunbon siya kaniadtu paglansar pagka mayor sa Mandaue batok kang incumbent Mayor Jonas Cortes?
Hinoon ngan nga Ouano, unya negosyante, duna sab gyu’y ikabuga.
Anaa ra kining tanan sa taga sixth district.
* * *
Samtang gisugdan niadtong Lunes ang pag-obserbar sa Fire Prevention Month dinhi sa Central Visayas, apan nagpabilin gihapon ang daghang problema sa atong taga Bureau of Fire Protection (BFP-7).
Usa na niini ang pagka-edaran na sa atong mga fire trucks ug mga gubaon na. Sa akong ihap-ihap, moabot sa pito (7) ka mga fire trucks ang nag-edad og sobra 30 anyos.
Sumala pa ni Acting Cebu Provincial Fire Marshal, Chief Inspector Ronaldo Orbeta nga duha (2) niini anaa diha sa dakbayan sa Mandaue ug usa (1) sa Tagbilaran City Bohol. Nasayod siya kay nahimo siya’ng kanhi fire marshal sa duha ka mga dagkung Siudad.
Samtang dinhi sa dakbayan sa Sugbo, gitug-an nila ni BFP-7 Director Esmael Codilla ug kanhi Cebu City Fire Marshal ug Inspector Eulalio Muñez sa Cebu City Fire Station nga dunay upat (4) ka mga fire trucks ang nag-edad na og 34 anyos kay na-acquire kini niadtong 1982 atol pa sa pagpamuno sa taga PC INP nga ang brand “Morita”.
Sa upat ka mga fire trucks nga panahon pa’ng mampor, gilangkuban kini sa Engine 2 nga under repair ug nakadestino sa Pardo Fire Substation. Ikaduha ang Engine 3 nga under repair gihapon ug nadestino sa Labangon Fire Substation.
Apil gihapon sa maong batch ang Engine 5 nga dili na gyud kapahimuslan, samtang dunay Engine 6 nga out of order nga anaa karon sa ilang motor pool.
Ang controversial nga Engine 11 nga napalit niadtong 1993 nga anaa nadestino sa Lahug Fire Substation ang giingong operational na apan mao gihapon ang problema nga kinahanglang paandaron una og mga tulo (3) ka minutos una makadagan ug makaresponde sa sunog.
Ang Engine 11 sa Lahug nahimong sentro sa reklamo sa taga Sitio Avocado, Barangay Lahug kay puwerte’ng dugaya naka-responde nga unta atbang ra kaayo ang sunog niadtong hinapos nga bahin sa Disyembre sa niaging tuig.
Si Director Codilla mipasalig nga dili magdugay, iyang pun-an sa bag-ong fire truck ang Barangay Lahug ug ang ubang mga dakung barangay dinhi sa dakbayan sa Sugbo.
Matud sa opisyal nga gawas ning maong problema sa mga fire trucks, limitado usab ang ilang mga kahimanan pag-responde og sunog sa mga dagku ug tag-as nga mga building.
Naproblema usab sila sa mga gagmay’ng kalsada. Ang ubang daan gipangsirad-an.
Mangambot lang sab ko kung matuman ba ang saad sa taga BFP nga matagsaan na og fire truck ang tanang kalungsuran sa pipila ka tuig natong paabuton.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
