Salins Hulbot
Nyor Gamay (NG): Nyor, butar tang Duterte, Nyor ha?
Nyor Daku (ND): O, Nyor.
NG: Nganong di man ka kaayo madasigon Nyor?
ND: Nakuyawan man gud ko aning mga fans ni Duterte, Nyor.
NG: Ngano man, Nyor?
ND: Ikaw ba, kon mag-istoryahanay ta, ayaw na itupad ang “man” ug “nyur” kay duol kaayo nas horse manure.
NG: Pastilan! Hasta kana ma concern pa gyud ka niana. Bi, sulti-i ko unsay imong na balak-an sa mga followers ni Duterte.
ND: Una, nanganti na sila nga mapildi ras Duterte kon tikasan. Wa gyud nay ayo, Nyor. Wa pa gani mapildi ga “sour-graping” na. Fight lang sa ta. Unya na lang na ang panganti.
NG: Padugang man gud nas pusta, Nyor.
ND: Mao na diha. Mapildi pa man gani tas sabong nga duha ray pilian. Kana pang daghan unya mo lungtad pa gyud og pipila ka buwan ang sultada. Maong di gyud na maayo ang manganti. Kana sang panganti, Nyor, humot kaayo nas kompyansa.
NG: Mao ba, Nyor. Gawas niana unsa pay laing nabalak-an nimo, Nyor?
ND: Nabalaka sad kos mga batan-on, Nyor.
NG: Kay ngano diay, Nyor?
ND: Kadaghanan sa mga batan-ong akong napangutana sa ilang kandidato pagka presidente puros man Duterte. Labi na ang mga nanarbaho sa call center.
NG: Maayo hinuon, Nyor.
ND: Ang ako lang nakuyawan kay ang ilang katarungan mao nga kon si Digong ang modaug wa na kunoy manglabnig cellphone. Naguol ko niani kay ang ilang kalibutan naa ra diay sa ilang cellphone. Ug sa tinuoray lang di na maduphan ni Duterte ang tanang cellphone-users. Ug kanang panaad ni Duterte nga wagtangon niya ang krimen sulod sa tulo ngadto sa unom ka buwan kon siya nay ma presidente murag lisud mahitabo. Nakahibawo ko nga padugang ra nis pusta. Pero nabalaka ko nga basin duna gyuy motuo niani ug magmahay unya kon di kini mahitabo. Ang nahitabo gud, Nyor, gihimo nilang cure-all o shotgun solution si Duterte. Mura bag ilang gipadahum nga kon molusot si Duterte ma wa na tanang problema.
NG: Kinsa man gyud kahay molusot, Nyor.
ND: Samtang wa pa masabti ang Federalismo ni Duterte, ang NCR gihapon maoy pinakakusgan nga lugar. Ug nga si Binay gihapon ang man to beat. Bisan pag mangawat si Binay sa ilang atubangan kaning iyang bagang panon mo-suporta lang gihapon kaniya. Ang turning point mo-abot kon mosugod nag pangampanya si Erap ni Poe, mahimo na kining three-way fight ug mahimo nang makalusot ang atong manok.
NG: Erap pa rin? Mahirap.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
