Salins Hulbot
Nyor Gamay (NG): Hello DJ.
DJ Mbenga (DJ): Uy, long time no hear, Nyor Gamay.
NG: Wa gyud diay ka makalimot sa akong tingog, DJ?
DJ: Unsaon nako pagkalimot nimo, Nyor? Dako kaayog utang kabubot-on kining atong tulumanon sa atong mga suki sa kahanginan sama kanimo.
NG: Makalanay man sad kag kasing-kasing, DJ.
DJ: Gatug-an ra kos tinuod, Nyor uy. Kanang unsa man tay imong concern ron? Kabahin sa kagubot sa mga rally ni Donald Trump? Kabahin sa pag-aprove sa Supreme Court sa kandidatura ni Grace Poe?
NG: Wa kaayo ko maguol kabahin anang mga butanga. Ang akong nagul-an kining kahimtang ni Maria.
DJ: Ah, na-concern kas resulta sa drug test ni Miss Sharapova dihang dunay trace sa prohibited substance ang iyang ihi? Mahilig diay kag tennis, Nyor?
NG: Mahilig . . . motan-aw. Di ko kahibawo moduwa. Daghan man gong guwapa nga tennis player, DJ. Ug maurag hangtud karon si Maria gihapoy pinaka guwapa. Mopusta ra ba gyud moduwa ni siyas finals. Unsa man gyud diay tong tambala iyang gitomar nga masuspenso man siyag pipila ka tuig?
DJ: Sa ako lang nabasahan, Nyor, motumar si Maria ning meldonium para pagtabang sa iyang kasing-kasing pag-handle sa kutas. Matud pas doctor nga nag-imbinto niani nga kon i-ban kining maong tambal, basig daghang mga atleta ang mamatay sa cardiac arrest kay dili madala sa ilang kasing-kasing ang kutas. Gani, “heart drug” may tawag ni Sharapova sa maong tambal.
NG: Kon para man diay nis kaayuhan sa mga athletes, nganong gi-ban man ni sa mga organizer sa tennis?
DJ: Ila naman gud kini nga gi-classify nga “performance enhancer,” nga sa ato pa makadugang sa stamina sa mga athletes. Ang pagpunay ug gamit niani mahimong makadaut sa lawas. Ug ikaduha, nahug kinig panikas kay mapun-an man ang imong kusog.
NG: Wa diay mahibaw si Maria nga gi-ban na ning iyang tambal sa kasing-kasing?
DJ: Matud pas imong idol, Nyor, nga nalubong sa taas kaayo nga email ang mga bag-ong drugas nga gi-ban. Ug gawas pa may lain-lain diay nga pangan kinig maong tambal ug ang nalista ubos sa banned substances dili mao ang pangan nga iyang gigamit. Muabot nag 10 years ang iyang pag gamit sa tambal apan karong pa lang tuiga kini na-ban.
NG: Mag-unsa na lang si Inday Maria ani? Daghan na ra bang sponsor sama sa Nike ang ni-withdraw sa ilang suporta kaniya.
DJ: Wa kay angay nga kabalak-an, Nyor. Taas ug hitsuraan ang imong idol. Kon di na siya paduwaog tennis, mahimo siyang mag-model o di ba kaha mag-artista. Di na angay kawilihan nang Nike. Naay daghang cosmetic products nga mokuha ni Maria pagka endorser kon mag-artista siya.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
