Inay nga magsige tag panaway sa gobyerno ug sa taga Department of Education (DepEd) subay sa mga problema karong adlawa pagbukas sa klase alang sa school year 2016-2017, motabang nalang kita kung unsaon pagsulbad.
Wa tay makuha ni-anang magsige tag reklamo.
Segurado man gyud nga kuwang kaayo kita sa mga classrooms ilabina dinhi sa dakbayan sa Sugbo ug sa mga dagku’ng siyudad.
Kining problemaha kanunay natong masinati matag abli sa klase. Mosamot na gyud kini karon tungod sa K-12 unya wa pa matiwas ang gipahimo nga mga lawak alang sa senior high school.
Ang ako lang nga maatiman sa mga school principal nga way mga tinun-an nga mabasa samtang magklase nga mag-uwan.
* * *
Kudus sa Mandaue City Police nga mi-estrikto na pag-implementar sa curfew ordinance aron paghipos sa mga batan-on nga maglatagaw panahon sa lawom nga kagabhion.
Karong simanaha mopatuman na sab ang dakbayan sa Talisay. Pagkanindot kung kopyahon kini sa ubang mga lugar ilabina dinhi sa dakbayan sa Sugbo.
Dakung sayop kini’ng contention ni Acting City Mayor Margot Osmeña nga lisud ipatuman ang curfew ordinance tungod lang sa mga tinun-an sa high school nga may klase sa gabii.
Alang nako ang mga way mga katuyu-an sa gabii mao ray hipuson. Ang estudyante sayon ra kaayong mailhan kay mag school uniform man unya may ID.
Gawas pa sab aron pag-seguro, puwede man nga mo-isyu og certification ang mga school principal sa mga tinun-an sa night classes.
Kanang mo-rason nga mag-research sa Internet, wa man gyud nay problema basta may kuyog nga ginikanan o guardian kay tingaleg ang i-research mao ang mga bastos nga website o ba kaha sa mga gaming website nga makadaot na sa pagtoon .
Panahon na gyud nga magpakaresponsable ang tanan.
Di na gyud ta mokompiyansa kay ang mga batan-on mao nay gamiton sa mga sindikato kay lagi exempted man sa criminal liability.
* * *
Haskang paeta gyud sa among nahiaguman niadtong gabii sa miaging Domingo (June 5, 2016) samtang nagbiyahe kami gikan sa Dalaguete paingon dinhi sa dakbayan sa Sugbo.
Midalikyat lagi intawon kami didto kay among gisaulog ang ika-19th death anniversary sa among pinanggang amahan.
Ngan nga akong gilikayan ang traffic gikan sa Carcar hangtud sa Talisay mao nga naka-desider ko nga mobiya mi sa Casay alas 10:00 sa gabii.
Pag-abot namo sa utlanan sa Naga ug Minglanilla, gisugat mi sa kusog kaayong ulan mga pasado alas 11:00.
Mao nga napugos mi’g hunong-hunong diha sa mga lugar sa Minglanilla usahay mag-zero visibility mi ug gani akong bana-bana naabtan mi’g mga usa ka oras namong pinaabot nga mo-undang ang ulan.
Pag-abot sa ponto nga mihinay na, miresume ko’g padagan apan wa damha nga misawom na diay among awto sa baha diha sa Linao Minglanilla.
Suwerte lang kay wa gyud motirik. Apan muna-muna gyud tawon nako’g maniho nga dili mapagngan uban sa pangaliya sa Kahitas-an. Hehehe.
Nagtoo ko nga wa nay laing babag sa among pag-biyahe. Apan pag-abot namo diha sa Tabunok, Talisay dunay laing baha nga naka-trapik namong mga motorista.
Sa tinuud lang kung nasayod pa ko daan nga nagbaha sa Linao Minglanilla di ko mosungasong.
Segun sa mga nasuweto diha nga kanunay gyud diay na’ng mabahaan.
Pero unsa may gipanghimo nila’ng Mayor Elanito Peña ug kongresista Samsam Gullas?
Nagmika ug nagtugtug ni sila sa pansitan?
Kung di masulbad ang drainage, hay mas maayo nga butangan na diha og flyover ingon man sa ubang dapit nga bahaanan aron di mahasol ang mga motorista?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
