Recall ug special elections sa mga narco mayors

By: Lloyd Suarez July 24,2016 - 09:51 PM


Sa akong kuwentada dunay mapatay nga napulo
(10) ngadto sa onse (11) ka mga drug personalities matag adlaw nationwide sa hugot nga kampanya batok sa illegal drugs ubos sa bag-ong liderato sa Duterte administration.

Niadtong Biyernes nikabat na sa 238 ang napatay nga mga drug-related cases.

Apan ang subo nga palandungon dunay misakay sa extra judicial killings kay dili tanan mahu’og nga legitimate operation nga binuhatan sa atong kapolisan nga maoy unang gitahasan.

Ang uban niini, nag-unay na ang mga drug personalities ilabina kadtong mitambling sa kita o nagdumili pagbayad sa giutang nga shabu o ba kaha kadtong mi-surrender nga miduhig sa ubang sakop sa sindikato sa drugas.

Ang uban binuhatan sa mga “person in interest” apil na dinhi ang kapolisan ug mga politiko nga protector nga mounay sa ilang gipang-protektahan aron pagpatak-om.

Practically miabot na ang gitakdang panahon sa presidente nga dugoon na kaayo ang nasud.

Kining mga patay karon, sinugdanan pa ni o ba kaha anaa na sa tunga-tunga? Pila man gyud ang tinuod nga target nga drug personalities nationwide? Dili ba mahimo nga iimprinta sa tarpaulin ang nagpabiling mga buhi?

Unsa may mga parameters sa gobyerno nga kaprotektahan ang mga inosente
?

Unsa may garantiya nga wa kini gamita sa ubang mga otoridad pagpanimawos ngadto sa mga tawo nga ilang nakontra?

Kini maoy gusto nako’ng paminawon karong adlawa sa 1st State of the Nation Address (SONA) ni Presidente Duterte gawas sa mga bombshell nga iyang ipabuto.

Unsa man ang bombshell ni “His Excellency” nga atong paabuton? Idayon niya ang pagtribukar sa mga mayor nga nakabenepisyo sa narco politics?

Dinhi sa Sugbo segurado nako nga apil sa listahan si Daanbatayan Mayor Vicente Loot kinsa unang gibutyag ni Duterte nga usa sa lima (5) ka PNP generals nga mga protector sa mga drug lords sa nasud.

Akong paabuton nga tinud-on ni Duterte ang pag-tribukar batok sa mga mayor aron kini maoy basihanan pagpa-recall ug magpahigayon og laing patas nga eleksiyon.

* * *

Wa pa mahuman ang kalbaryo ni suspended Cebu City Assistant Prosecutor Mary Ann Delos Santos.

Matapos ang unang unom (6) ka buwan nga suspension order batok kaniya karong Setyembre.

Akong nahibaw-an gikan sa Department of Justice nga dunay laing three months suspension order si Castro subay sa iyang sitwasyon sa kaminyuon.

Buot ipasabot nga kung ipatuman kini, hangtud pa sa pasko ang suspension ni Piskal Castro.

Paet gyud kaayo basta masuspenso sa trabaho kay wa gyu’y suweldo ug way bonus nga madawat.

Lisud gyud ang iyang kahimtang karon kay single parent siya unya dunay mga anak nga nag-eskuwela.

Ginoo ray nasayod kung unsay iyang mensahe ngadto kang Castro.

* * *

Ang kakuwang sa political will ug ang sobrang pamulitika sa mga political animal maoy rason nganong kutob ra gyud kita sa plano alang sa kalambuan sa Metro Cebu.

Bisan dinhi sa dakbayan sa Sugbo, wa makabuylo ang comprehensive drainage master plan ni kanhi mayor Michael Rama tungod kay gibabagan pag-ayo ang budget kaniadtu nga 200 milyones ka pesos sa mga kaalyado sa konseho ni Mayor Tomas Osmeña.

Kung magpabilin kining batasana sa atong mga politiko, wa gyud kitay kaugmaon.

Maayo na lang unta nga suportahan ni Osmeña ang Metro Cebu Development and Coordinating Board (MCDCB) kay sa igo ra kita’ng mangyugpos pagsulbad sa mga problema sa Metro Cebu sama sa trapik, baha ug ubang mga suliran.

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Cebu City, Duterte, extra judicial killings, MCDCB, Metro Cebu Development and Coordinating Board', President Duterte, President Rodrigo Duterte, President Rody Duterte, Rodrigo Duterte, Rody Duterte, SONA, State of the Nation Address

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.