Taas kaayo ang presscon ni Duterte sa tungang gabii didto sa Davao nga gi-cover sa CNN maong dugay ko kaayo natultulan ang dapit sa video sa maong press con diin nibutyag siya sa mga politiko ug huwes nga may kalabutan sa drug trade.
Daghan ang gahuwat niani, labi na ang mga molupyo ning atong dakbayan. Ang ilang pangutana kon kinsa man kanila ni Mike Rama ug Tomas Osmeña ang mga protiktor sa mga drug lords.
Usahay ang simplistic nga logic makapadali natog husgar bisan kon wa pa man nato matugkad ang usa ka sitwasyon. Si Mike Rama, tungod kay nagkapa siyag puwa unya nagkarsones og birdi unya ni-recite sa lyrics sa kantang “Impossible Dream” sa usa ka panagtigom, daghan ang gatuo nga nawad-an na kini sa maayong pangisip. Ug pananglitan nayabag na man gani ang maayong mokanta nga si Mike, unsa man kahay hinungdan? Nianing tungora daw may nadunggan akong Greek chorus: Unsa pa, druga! Ug kay nigamit man kaha siyag druga, sa ato pa naa siyay supplier niani. Ug nga tataw na kaayo nga giprotiktahan niya ang iyang supplier. Ergo, drug lord protector si Rama.
Ug tungod sa birding karsones, puwang kapa ug sa “Impossible Dream” nahimo nang drug lord protiktor ang kanhing mayor sa mga mata sa mga gadali paghusgar kaniya. Speedy deduction can easily go haywire. Subo ug kataw-anan kini nga palandungon.
Sa bahin ni Tomas, dunay tulo ka butang ang nakapahimo niyang nominee sa lista ni Digong. Una, ang katahap sa kadaghanan nga may kalabutan siya sa kamatayon ni Jaguar nga drug lord sa Pasil nga nationwide na ang network. Si Tomas ang unang mipahibawo sa tanan sa pagpusil-patay sa maong giingong pusher. Again, simplistic deduction. Iya kining gipahipos kay basin may ikapiyait kini nga makalambigit kaniya. Natabi nga migasto kini pagpangampanya kaniya.
Ang ikaduhang katarungan mao nga nasuko kaayo siya nga gipamulihan ang mga pulis nga nauyunan niya. Duna tingali tinaguan si Tomas ug ang iyang piniling mga pulis. Ug ang ikatulong hinungdan mao ang paglambigit ni Digong sa higala ni Tomas nga si Peter Lim sa druga. Guilt by association?
Si Mike ug dili si Tomas ang mibutho sa lista ni Duterte, maong makaginhawag lalum ang atong mayor sa pagka karon.
Sa mao gihapong presscon, miingon ang presidente nga ang mga nangaangol nga militar tagaan niyag mga laptop ug patun-on sa diction ug pronunciation sa English para makatrabaho sila sa call center. Nagkanayon si Digong nga kon dunay bag-ong moabli nga BPO, iya kining hangyuon nga modawat ning mga baldadong sundawo. Okay, EOP, SPO1?
Dunay usa ka BPO nga naila sa ilang training sa pagpalituk sa mga agents ning giingong standard American English. Maayo untag mohimo silag outreach program nga mo-train ning mga baldadong militar.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
