Insakto kaayo ang pamahayag ni Presidente Duterte nga ang “rule of law” angay lang ipatuman niadtong mga law-abiding citizens ug mahadlokon sa Diyos.
Ang mga drug lord, terorista ug kriminal way respeto sa balaod ug way kahadlok sa Ginoo.
Busa angay lang gyud nila nga masugamak sa “balance of terror” ug wa nay “rule of law”. Kapoy na!
Ang deserving nga makabaton sa “rule of law” mao kitang mga nagtinarong ug mga inosente.
Mao nga patay pa more batok sa mga sagbot sa katilingban.
Prangka lang, kung na-frustrated sa gobyerno si Duterte, labaw na ko. Ilabina sa krusada pagpakiggubat batok sa mga illegal nga drugas.
Kung nasugdan pa unta sa mga nangaging administrasyon ilabina sa pangatungdanan ni kanhi presidente Noynoy Aquino ang seryosong kampanya, usa ko sa mokondenar niining pinatyanay karon batok sa mga durugista.
Pero paeta gyud, kay sa records sa korte, alarming kaayo ang gidaghanon sa mga naabsuwelto nga mga akusado tungod lang sa technicality.
Mas daghan ang acquittal kay sa conviction. Ambot lang kung tinuod ba gyud nga dunay mga huwes nga drug protector?
Bisan ang katawhan karon nakauyon na lang sa vigilantes style killings tungod sa frustration sa atong judicial system.
Gani ang uban nga sobra gyud ka frustrated, buot na nga ipapatay sa presidente ang mga natribukar niya nga mga drug lords ug ang lima ka mga PNP generals.
* * *
Nagmata lang gyud diay og buntag si Governor Junjun Davide sa mga kabuang diha sa Cebu Provincial Detention and Rehabilitation Center (CPDRC).
Kung nakasulod ang laptop sa German national ug ubang mga gadgets pagpadayon sa operation sa cyber pornography, way rason nga di kalusot ang shabu diha sa prisohan.
Ubos sa command responsibility, ang unang opisyal nga angay’ng palagpoton ni Governor Davide mao si jail consultant Marco Toral nga mipuyo na diha ug makig-inom sa mga piniriso.
Kung seryoso si Governor Junjun nga molutaw ang tinuod sa nagpaluyo sa mga palusot, mas maayong ipaibot niya si Toral diha sa CPDRC.
Daghang mga text nga akong nadawat karong bag-o nga dili gyud mopakita og suporta sa imbestigasyon ang mga personnel nga may nahibaw-an sa mga kuwestiyonableng binuhatan ni Toral kung ang naulahi magpabilin sa puwesto.
Unsa ka tinuod nga niadtong Biyernes dunay empleyada sa CPDRC nga nakontrahan na ni Toral unya giandaman niya og atsa?
Tinuod ba kining mga pasangil nga kadtong mobigay og mobuhis ni Toral makasayon-sayon lang pagpasulod sa ilang dala nga kontrabando?
Kung tinuod ning tanan, pila may nabulsa ni Toral sa German national?
* * *
Wa ko’y pagsupak pagwagtang na sa Sinulog sa Kabataan karong Enero kung ang rason mao nga bati na kaayog performance ang mga estudyante sa National Achievement Test (NAT exams).
Kaniadto, bisag unsaon pagpanalipod sa mga kadagkuan sa Department of Education nga dili apektado sa academics ang mga tinun-an apan molutaw ra gihapon ang tinuod.
Kinsa ba gud ang dili matugaw sa pagtungha nga sa buwan pa sa Agosto subsob na ang practice?
Di sab maayong ehemplo ngadto sa mga bata nga inig kahuman sa Sinulog, dunay mga isyu nga motumaw sama sa pagkuwestiyon sa gasto ug unsaon pagbahin ang daog.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
