Nagkagubot ug nagkagidlay niadtong Sabado ang distribution sa financial assistance alang sa mga senior citizens dinhi sa dakbayan sa Sugbo.
Tiaw muna daghang mga tiguwang ang wa kakobra sa ilang tag 2 mil pesos kay naglibog sa venue.
Ang uban nanguli na lang kay nahiubos human sila gipalinya, gipa-initan ug wa hatagi’g lingkuranan. Sukwahi sa panahon kaniadto ni kanhi Cebu City mayor Michael Rama nga hapsay kaayo ang pagpang-apod-apod.
Resulta kadto sa pamulitika ni Cebu City Mayor Tomas Osmeña nga nagpasulabi’g pamintaha aron ipaila sa mga tiguwang ang ilang mga kandidato sa eleksiyon sa barangay.
Ang wa nako masabti ni Osmeña ug sa iyang kaalyado sa BO-PK mao kung nganong wa nila pahimusli ang paggamit sa mga barangay hall or barangay gym nga unta kini’ng maong mga facility mahug nga extension man sa Cebu City Hall taliwa nga kontra partido nila ang incumbent barangay captain.
Unsay pagtuo nilang Osmeña, ilang personal nga kuwarta ang gipanghatag sa mga naugtas nga mga edaran?
* * *
Si Senadora Leila de Lima ra kaha ang nakabenipisyo sa mga drug lords sa Muntinlupa kung tinuod man ang alegasyon ni Presidente Duterte nga nagdawatan kini og protection money gamit iyang driver nga sweet lover?
Sus, kung tinuod man kini, paeta gyud. Mao nga makaingon na lang ta nga bantog ra nga daw gipasagdan sa Aquino administration ang problema sa illegal drugs.
Ngan nga si De Lima kauban sa Liberal Party nga maoy kanhi Justice Secretary ug ubos sa iyang liderato ang New Bilibid Prison, wa kaha makabenipisyo ang ubang kandidato sa LP nga iyang kaalyado?
Butang kini nga angay’ng imbestigahon. Nganong nangugat man gyud si Presidente Duterte kang De Lima ug sa iyang driver-lover?
Dili kaha ang mga dagku’ng drug lords sa NBP nga sila si Herbert Colangco ug Peter Co maoy misuka niining tanan batok sa uyab ni De Lima?
Asa man karon si kanhi DILG secretary Mar Roxas, ilang standard-bearer sa miaging eleksiyon? Wa motingog sa away nilang Duterte ug De Lima paglikay nga ilambigit?
Prangka lang, dili nako big deal ang isyu sa immorality ni De Lima. Ang daku’ng butang mao nga mamatud-an simbako nga siya usa sa narco politicians.
* * *
Sa padayong Senate inquiry karong adlawa nila ni Senador De Lima, Senador Ping Lacson ug mga kaubanan bahin sa vigilantes style of killing ug extrajudicial killing, mahug ra gihapon nga way makuha ang publiko.
Pasikat o pang-grandstanding lang gyud kining Senate investigation.
Ako nagtuo nga ang tumong ni De Lima mao nga ipahid ngadto sa Duterte government nga maoy responsable sa mga pagpatay sa mga nalambigit sa drugas bisan way igong basihanan.
Sa samang paagi mamasangil sab ang Malacañang ngadto’ng De Lima nga maoy responsable sa mga vigilantes style ug extrajudicial killings.
Expected na nga ang isulti ni PNP Chief Director General Ronald “Bato” Dela Rosa nga nagsubay sila sa “rule of law”. Ang angkonon mao ra ang mga patay nga resulta sa legitimate police operations.
* * *
Kung makamugna’g kagubot ang paglubong sa patay’ng lawas ni kanhi presidente Marcos sa Libingan ng mga Bayani, nganong ipamugos man sa mga Marcos ang isyu?
Maayo sab tingali nga maminaw sa pulso si presidente Duterte kay akong tan-aw ubay-ubay na karon ang supak tungod sa pagkakurakot, pagkakriminal, pagkadiktador ni Marcos.
Daghan pa’ng buhi nga mga biktima sa martial law. Kung tarong pa sab sila si Bongbong ug Imelda, nganong wa gyud mangayo’g pasaylo sa katawhan?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
