SUAREZ
Ambot kung unsang klaseha sa utok sa rapist nga mi-among-among sa masuso nga upat pa ka buwan didto sa Perrelos, Carcar niadtong miaging simana.
Tarong pa ning klaseha sa tawo?
Kung kining dinakpan nga matud-an maoy responsable nga si Jonathan “Jojo” Marfe, angayan kining unahon pagbitay kung may retroactive effect ang death penalty.
Sa tinuud lang tungod ning maong sinalbahis nga krimen, misamot ang akong pagsuporta nga ibalik gyud ang silot kamatayon kay konbinsido ko nga dakung deterrent kini o makapaminus sa krimen.
Apan ang dakung pangutana, lig-on na ba gyud ang ebedensiya sa kapolisan sa Carcar pinangulohan ni Chief Inspector Jose Liddawa batok kang Marfe?
Nabalaka lang ko nga makalingkawas sa krimen ang dinakpan kay pulos circumstantial evidence ang gibasihan.
Kung makakuha nig banggi-itan nga abogado posible pa nga mabuhi-an kini sa kostodiya sa kapolisan.
* * *
Wa ko kasabot nganong hangtud karon wa pay aksiyon si Assistant Cebu City Prosecutor Russell Busico pag-withdraw sa information sa kasong libel nga gipasaka ni Mayor Tomas Osmeña batok kang Super Bobby Nalzaro nga unta may kamanduan naman ang ilang labaw nga si Justice Secretary Vitaliano Aquirre human gi-dismissed ang kaso sa DOJ.
Ang akong ponto mao nga ministerial duty na ni piskal Busico ang pag-withdraw sa information tungod sa kamanduan sa iyang labaw.
Gawas pa sab di na kinahanglang mag-agad o magpaabot siya sa mga abogado ni Osmeña kay siya maoy dunay direct supervision and control niini isip government prosecutor.
Akong nahibaw-an sa sala ni RTC Executive Judge Gilbert Moises sa branch 18 nga ang mga abogado ni Osmeña duna pay pending nga motion for reconsideration.
Matuis pa ba ang opinion ni Aguirre kinsa miingon nga way basihanan ang kaso?
Kining paglangay-langay sa pag-withdraw sa kaso sa piskal maoy bugti sa ilang gidawat nga allowance sa City Hall ug magpadugang?
* * *
Sugod karong adlawa February 13, 2017 hingpit na’ng ipatuman ni Executive Judge Gilbert Moises diha sa Qimonda IT Center ang “No ID, No entry policy.”
Usa kini sa iyang lakang pagpalig-on sa ilang security human dunay retired judge sa Surigao ang gipatay ug dunay piskal nga gipusil nga dinhi sa Sugbo gipatambalan.
Way exempted sa palisiya kay aron gyud segurado nga mailhan ang tanan nga mosulod sa korte.
Ang ako lang niini nga basig mapareha kini kaniadto sa panahon ni late Executive Judge Fortunato De Gracia nga gipatuman ni kanhi Judge Geraldine Faith Econg ang “No ID, No Entry” nga daghang abogado ang nagyaw-yaw kay taas kaayo ang linya sa gawas.
Di kaha maapektahan ang mga bista sa mga kaso niining pamaagi kay di na kasulod ang mga motestigo ug mga litigant nga di makadala og ID?
Sa tinuud lang huyang gyud ang seguridad diha sa Qimonda kay naa nay daghang makasulod tungod kay pribado kining maong building unya dunay laing mga nag-abang sukwahi kini sa karaang building sa Palace of Justice nga anaa sa Capitol compound.
Laing gikabalak-an nako mao ang parking area sa mga huwes nga anaa ra sa daplin sa kalsada unya ang atong mga huwes exposed kaayo sa publiko.
Praktisado ba atong mga huwes kanunay sa firing range?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
