Sulbad naba gyud ang kaso ni Jessie Tabanao?

Super Hirit

Makapungot ug makapalagot kining trabaho sa kapolisan sama niining ilang kadanghag sa pagsulbad sa kasong pagpusil-patay ni Jessie Tabanao, kanhi sakop sa media sa Sugbo ug nahimong tigpamaba sa Philippine Drug Enforcement Agency in Central Visayas (PDEA-7).

Naka-ingon ko niini kay taphaw kaayo ang ilang trabaho pinangulohan ni Cebu City Police Director Noli Romana ug City Intelligence Branch Chief nga si Major Romeo Santander.

Porbida sa atong kapolisan, sa mga dokumento pa lang daan nagkagidlay na ang presentation kay wa magkadimao ang pangan sa trigger man.

Kinsa man gyud ang mamumuno? Unsa man gyud ang tinuod niyang pangan? Arnel Solivar alias Aye or Ariel Solivar alias Aye?

Sa mga dokumento man gud nga na-file sa Cebu City Prosecutor’s Office, lahi-lahi ang pangan sa suspect.

Sa cover complaint ug sa affidavit ni Katrina nga asawa ni anhing Jessie ang pangan sa suspect kay Arnel.

Pero sa tulo ka mga testigo ug sa joint affidavit of operatives sa mga pulis ang pangan sa suspect kay Ariel.

Unsa may klaro nga pangan sa suspect? Pag-sure mo oi! Resulta kini sa way proper coordination sa Task Force? O ba kaha kutob ra sa pakonsuylo kining pagtaral sa kapolisan sa suspect nga way klaro?

Ang gwardiya nga testigo ug ang manag-uyab nga nakasaksi sa pagpusil kang Jessie, mi-ila sa suspect pinaagi sa picture nga gipakita sa kapolisan.

Sa joint affidavit nila ni SPO1 Buenaventura Ursaiz ug laing unom ka mga pulis nga sakop ni Major Santander miingon nga: “Tapping all the assistance of our civilian contacts and assets, we were gradually able to construct what happened before and after the incident and several names of possible suspects started to come out.

“After a careful process of elimination and deduction, the name Ariel Solivar a.k.a Aye stood out among the possible suspects. After discreet intelligence and investigation that Solivar who stood about 5’6″, medium built, in his early thirties, and residing at AC Cortes St. Mandaue City, is an AKHRO hit-man and once closely associated with Aristotle Aves, who was arrested by the elements of Cebu City Police Office for several criminal offenses some time in 2008.”

Pagka-nindot unta kun dunay video footage nga makasuporta sa testimoniya sa tulo ka mga saksi nga naklaro ang nawng sa trigger man o ba kaha dunay laing testigo nga nakasunod kang Solivar nga mihubo sa iyang helmet human sa krimen.

Kinsa may utok sa krimen ug unsa man gyud ang motibo?

* * *

Akoy nalooy sa atong mga huwes, mga kawani, nga nag-okupar sa Palace of Justice ug mga dinakpan nga nangabasa intawn sa kusog nga uwan niadtong Lunes sa hapon kay di makapasilong og tarong kay anaa ra gihapon sila sa gawas nagtulda-tulda sukad na-apektohan sa linog.

Si Regional Trial Court (RTC) Executive Judge Soliver Peras usa sa mga nagpang-lingo-lingo sa ilang sitwasyon hangtud nga mikomedya na lang sa pag-ingon nga iyang sundon ang gihimo sa Cebu city government nga “piso-piso campaign” alang sa pagtukod og bag-ong building sa korte.

Nabalaka lang si Judge Peras nga tingalig moabot sa ponto nga pa-esplikahon siya sa mga kadagkoan sa Korte Suprema.

With all due respect, pwerteng langaya gyud nakasulbad ning maong problema ang mga kadagkoan sa Korte Suprema.

Unsaun man tawn pag-irog sa mga kaso?

Kun naglisod ang Korte Suprema pag-abang og building, mas maayo tingali nga gamiton na lang ug balik ang building sa Cebu City Palace of Justice.

Akong tan-aw luwas ang mga okupante diha sa ground floor ug sa second floor bisag i-renovate ang building.

Ang maayo sigurong himoon pagka karon, mao nga usahon ang Regional State Prosecutor’s Office, Cebu Provincial Prosecutor’s Office ug ang opisina sa Witness Protection nganha sa Cebu City Prosecutor’s Office.

Ang opisina sa Provincial Prosecutor i-convert ngadto sa tulo hangtud sa lima ka mga branches.

Tulo hangtud sa lima sab ka branches diha habig sa witness protection ug sa RTC Social Worker. Ang mga dokumento sa ground floor ipasaka sa 3rd floor.

Ang opisina sa Public Attorneys’ Office ug Parole and Probation pwede’ng usahon ug ang RTC Social Worker.

Samtang ang taga Municipal Trial Court In Cities kon MTCC adto ipahimutang sa karaang Department of Agriculure kon DA-7 compound diha sa dalan M.Velez. Samtang ang ubang opisina ug serbisyo ipahimutang sa gawas nga may imuntar nga container van.

Akong tan-aw, kining maong paagi maoy pinakaluwas ug pinakagamay ra ug gasto.

Hinuklogi kuno ninyo mga talahurong huwes ug tanang mga okupante sa Palace of Justice aron makatuyok na intawn ang ligid sa hustisya.

Kay akong tan-aw niining pagkanselar sa mga bista pabor kaayo sa mga ligoy nga trabahante nga way putol og kobra sa sweldo.

Pipila ka mga huwes sama kang Judge Wilfredo Navarro miingon nga wa gyuy problema ang iyang sala sa branch 19 nga anaa sa 3rd floor. Gani matud niya nga wa siya kulbai samtang adto siya mopahuway taliwa sa tan-aw sa uban nga medyo peligro.

Akong sublion nga diha ra sa 4th floor ang angay gyung bakantihan samtang dili pa ma-ayom-ayom.