Unsa kaha kung di tinuud ang rape sa lawyer-broadcaster?

SUAREZ

Ako’y nalooy ni lawyer-broadcaster Juril Patiño kay gikonbikto na sa ubang mga tawo sa giingong pagpanglogos sa 13 anyos nga batang babaye.

Pero in fairness, daghan sab ang nakonbinse ni Atty. Patiño human sa akong interview kaniya.

Unsa man g’yud ka tinuud ning maong kaso? Dili kaha biktima ning bataa ug gisugo sa mga impluwensiyado’ng tawo nga gusto lang manimawos ni Atty. Patiño tungod sa mga birada sa iyang radio program?

Wa kaha ni’ng bataa magamit sa sindikato?

Butang kini nga angay’ng tarungon pag-imbestigar diha sa Cebu City Prosecutor’s Office.

Karong mga panahuna lahi naman g’yud ang mga batan-on. Sumaa gud lakwatsa ray nakat-onan sa 13 anyos ug kaya ra kaayo niyang biyaan ang iyang mga ginikanan.

Maayo man gani’ng imbestigahon sab ang mga ginikanan kung gi-unsa nila pagpadako ug pag-amuma ning bataa.

Wa ko mamasangil. Apan pila na ka mga bata ang nahimong carton girls (prostitutes) diha sa Mandaue reclamation nga gi-rescue sa atong mga tinugyanan sa balaud?

Dili kaha ni siya usa sa mga o na-impluwensiyahan hangtud nga nakat-on sa pagtumo-tumo ni Atty. Patiño aron makapang-warta?

Sa akong baruganan kung tinuud man sab nga gilogos g’yud sa abogado-magsisibya ang minor de edad, butang nga atubangon niya ang bug-at nga silot.

Angayan pa siya’ng ipa-disbar kay ang kasong rape usa sa mga bug-at nga rason pagtangtang sa iyang lisensiya.
Apan unsa kaha kung di sab tinuud? Kinahanglan tingali nga ipa-ubos kini sa three-man panel investigating team aron matun-an ug matutukan ang tanang isyu niini.

* * *

Nakasabot nako sa gihimong katin-awan ni PDEA-7 Director Yogi Felimon Ruiz pagdeklarar nila og “drug cleared” sa 160 ka mga barangay dinhi sa Sugbo.

Akong nasabtan nga di kinahanglang mo-isa ang kilay sa mga mi-kuwestiyon sa deklarasyon ngadto nilang naglangkub sa oversight committee tungod kay walang “forever” sa estado nga drug cleared kay gani dunay 19 niini ka mga barangay nga posibleng ma-revoke ang titulo kay nakita ang pagka-inconsistent sa mga opisyales ug posible nga ilang ipangkiha sa kasong neglect of duty.
Sa among programa’ng “Dialogue On The Air” sa DYSS Super Radyo niadtong Sabado, gipasabot ni Director Ruiz nga ang mga dagkung rason pag-deklarar og “drug cleared” mao nga seryoso g’yud ang mga barangay official sa kampanya pinaagi sa mga maayo ug epektibo nga anti-illegal drugs program.

Midugang siya nga “unfair” sab niadtong mga barangay nga naningkamot g’yud sa kampanya ug nasuta nila nga wa gyu’y gipangprotektahan nga nalambigit sa illegal drugs.
Ang nakaporke sa ubang kapitan kay wa g’yud kaduso ngadto sa PDEA sa listahan sa mga drug user, drug pusher ug mga drug den. Mao ni ang mga kapitan nga walang “paki” sa problema kay wa gyu’y nahatag nga impormasyon.

Mao nga tungod kay alarming ang problema ug way pakabana ang kadaghanan sa mga opisyales sa barangay hugtanon ang baruganan sa PDEA-7 nga dili g’yud ipahinayon ang eleksiyon sa barangay karong October.

* * *

Sukad pa kaniadto, daku ko’ng uyon kung ipatuman ang national ID system sa nasud. Samot na g’yud ron nga nakasulod na ang mga foreign terrorists. Importante kini!
Kadto ra’ng mga rebelde, terorista ug mga kriminal ang mosupak niini.

Sa national ID system, masulod sa data base ang tanang importanteng detalye sa atong tagsa-tagsa ka kaugalingon sama sa finger print ug uban pa.

Dali kaayong ma-trace ang identity sa real culprit sa krimen. Sa laktod paspas kaayong masulbad ang krimen.
Sa tinuud lang akoy gihasolan niining pagtiner og daghang mga ID nga maoy makapabak-al sa pitaka.

Sa ako lang duna ko’y mga ID sama sa SSS, PhilHealth, Comelec, LTO- driver’s license, company ID ug health cards.