Sumbagay g’yud unta ang mga piskal

By: Lloyd Suarez August 13,2017 - 09:03 PM

Unsay hinungdan nganong hapit magsinumbagay niadtong Miyerkules sa hapon sila si Assistant City Prosecutor Simaco Labata ug Assistant City Prosecutor Rodulph Joseph Val “Roy” Carillo?

Nahibawo ko sa isyu nga daryot magsinumbagay ang duha ka piskal dihang si piskal Mary Ann Castro miadto ug mikonprontasi kang piskal Labata nganong isog kaayo kini ug daku kaayog tingog.

Didto sab ko niadtong higayuna kang piskal Labata kay nag-follow-up ko sa kasong sexual harassment batok sa usa ka professor diin si Labata maoy inquest fiscal.

Sa wa pa ko mi-adto kang Labata ug sa wa pa ko mahibawo, dihang misulod ko sa karaang Palace of Justice akong nasugatan sa lobby sila si piskal Carillo ug piskal Acosta nga paingon na’ng manggawas.

Akong nakita nga nangluspad ang aping ug waet ni piskal Carillo. Samtang si piskal Labata pula kaayog nawong didto sa receiving section ug opisina sa ilang mga support staff.

Akong gisubay ang hinungdan ug sumaa sa akong nahibaw-an nga natandog matud pa ang garbo ni piskal Labata dihang dunay gi-usab si Carillo isip reviewing fiscal sa recommendation ni piskal Labata sa usa ka kaso.

Ang ako ba nganong moabot man sa ponto nga mag-inisogay nga puwede man nilang estoryahon ug mag-brain storming sa mga ponto legal kay pulos man sila makamao kay mga abogado baya.

In fairness ngadto ni Carillo mahug siya’ng inutil pagka-reviewing fiscal kung di sab siya magbantay sa mga sayop sa mga investigating fiscal.

Kinahanglang i-settle ni Cebu City Prosecutor Liceria Lofranco Rabillas ang bingkil sa duha kay makapadisguwapa kini sa ilang opisina.

Kung gustong magtagbaw sa pasingot ning duha akong hangyoon si Grand Master Julius Villaflores sa Philippine YawYan nga adto ang venue kay dunay daghang boxing glove didto sa Barangay Tejero unya akoy referee . Hehehe.

* * *

Daku kaayong insulto ngadto sa mga hepe sa kapolisan dinhi sa ato nga giilogan karon si Chief Inspector Jovie Espinido sa mga Sugbuanon kinsa kasamtangang hepe sa Ozamiz City Police human milampos pagpuhag sa pamilyang Parojinog.

Unsa may pagtoo sa mga tawo ngadtong Espinido? Usa ka super hero? Siya ray makamao pagpuhag sa mga sindikato?

Parehas man kini sa sitwasyon kaniadto kang SPO1 Adonis Dumpit nga “in demand” kaayo sa publiko kay mopatay g’yud sa mga tulisan.

Ang ako ba, kung kaya nilang Espinido ug Dumpit way rason nga di kaya sa ubang mga hepe kung magtinarong lang sa serbisyo ug seryoso sa kampanya batok sa illegal drugs ug sa ubang sindikato.

Duha ra ka bug-at nga rason nga dili kahimo ang mga hepe sa gibuhat ni Espinido. Kung dili protector, maoy namaligya.
Kung ingon ani naman lang, nganong di naman lang mang-resign kining mga unfit sa serbisyo ?

* * *

Kuyaw g’yud tinuud nga mosangpot ngadto sa daku’ng gubat kining binaharay karon sa Amerika ug North Korea.
Kung madayon man kini maoy ikatulong gubat sa tibuuk kalibutan.

Unsa may garantiya nga dili kita maapektahan dinhi sa Pilipinas ngan nga sukad kaniadto nahimo kitang kaalyado sa USA?

Paeta kaha sa atong kahimtang kay segurado ko nga mapagan g’yud kita.

Maayo tingali nga kini na sab ang sentro sa Oratio Imperata sa atong mga simbahan human sa Marawi crisis, aron dili madayon ang dakung kagubot ug kadaot.

Your subscription could not be saved. Please try again.
Your subscription has been successful.

Subscribe to our daily newsletter

By providing an email address. I agree to the Terms of Use and acknowledge that I have read the Privacy Policy.

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Marawi City, Oratio Imperata

We use cookies to ensure you get the best experience on our website. By continuing, you are agreeing to our use of cookies. To find out more, please click this link.