SUAREZ
Daghan gyud kaayong salamat ngadto sa kinatibuk-ang management sa Cebu Daily News (CDN) pinangulohan nila ni Ma’am Sandy Prieto Romualdez- President sa Inquirer Publications Incorporated, Sir Abelardo Ulanday – Publisher, Sir Renato Reinoso – Chief Operating Officer, Ma’am Edralyn Benidicto – Editor in Chief ug uban pa, sa akong nadawat nga certificate of recognition niadtong Biyernes sa gabii atol sa ika-20th Anniversary sa CDN.
Wa lang gyud nako damha nga 20 na diay ko ka tuig nga nagsuwat dinhi sa CDN sa akong pinobre nga natampo sa “Super Hirit”. Pagkadali ra gyud sa panahon.
Ang rason nganong milungtad ko ning maong gidugayon tungod kay wa gyud ko gawngi ni bisan kinsang opisyal sa CDN sa akong mga baruganan sa mga isyu sukad pa niadtong una nakong article way back June 12, 1998.
Wa koy hanaw sa pagsulat.
Niadtong pagsugod sa CDN pagka 1998, gawas nga regular anchor nako sa DYSS Super Radyo, usa ko sa mga correspondents sa Independent Post .
Dihang nanira ang IP, gikuha ko dinhi sa CDN isip ilang correspondent nga miabag sa pagsuwat sa mga dagkung estorya gikan sa korte kay maoy akong beat assignment.
Si Ma’am Eileen Mangubat maoy Editor in Chief niadtong higayuna samtang si Ma’am Thea Riñen maoy Managing Editor.
Sila si Ma’am Eileen ug Ma’am Thea misugo kanako nga hangyoon si Sir Bobby Nalzaro nga pabalhinon sa CDN pagsulat gikan sa Sunstar.
Apan mibalibad kay mas kampante siya sa Sun.Star nga anaa didto nagsuwat ang usa sa iyang mga suod sa broadcast media nga si late Secretary Cerge Remonde ug gipugngan siya ni Atty. Chikking Seares.
Mao nga dihang wa silay nahimo ni Sir Bob, ila kong gisuwayan kung makamao ba ko nga mosuwat og kolom. Ila kong gipa-submit og mga sample column.
Kini lagi’ng wa pay hanaw, namasa ko sa mga lain-laing article.
Tuod man nakahimo kog usa, apan muna-muna gyud kay hapit tibuuk adlaw namugna.
Tungod tingali kay nakapasar ko sa ilang standards mao nga didto nagsugod nako pagsuwat hangtud karon.
Busa magpasalamat sab ko nila ni Ma’am Eileen, Ma’am Thea ug sa akong idol si Sir Bobby kay kadto maoy taytayan nga nahimo ko’ng manlilindog kuno dinhi sa CDN.
* * *
Suwerte pa si Court Sheriff Elcid Caballes nga wa santakoha ni Cebu City Mayor Tomas Osmeña kinsa nagpapel sa mga biktima sa demolisyon sa Barangay Capitol Site duol sa Capitol building ug National Bureau of Investigation (NBI).
Sukwahi sa nahitabo sa Court Sheriff sa Davao City nga nakulatahan ni Mayor Sarah Duterte kaniadto.
Apan ang gihimong pagpangkuwelyo ni Mayor Osmeña sa sheriff butang kini nga dili palabyon kay usa kadto ka manifestation nga wa siya’y respeto sa husgado diin ang sheriff igo ra’ng nagtuman sa lawful order sa pagpaguba sa mga panimay nga kompleto sa mga dokumento.
Ambot kung unsay mahimo sa atong mga huwes dinhi sa dakbayan sa Sugbo nga magdawatan og binuwan nga allowance gikan sa Cebu City Hall? Tak-om lang sa ta?
Nahug sila’ng bibingka, kalayo sa ibabaw ug kalayo sa ubos.
Unsa may garantiya nga ka protektahan ang mga empleyado sa korte nga nagtinarong kung magpabilin silang magpakahilom?
With all due respect, dili gyud mawagtang ang pagduda nga magawngan atong mga huwes ni bisan kinsa nga sitting mayor tungod sa pagdawat nila og allowance.
Abir anhi makita ang katag kung i-exercise ba nila ang gipasiatab nga judicial independence.
Kanus-a ipa-contempt si Tomas? Kanus-a ikiha ni Elcid Caballes sa Ombudsman sa kasong Republic Act 6713 (Code of Conduct and Ethical Standards for Public Officials and Employees?
Unsa may aksiyon sa pundok sa mga Sheriff dinhi sa Sugbo? Wa sila gawngi sa ilang mga opisyal nga ipa-deadma lang ang isyu kay mawala unya ilang allowance?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
