Importante kaayo ang reflectorized vest

By: Lloyd Suarez April 08,2018 - 08:38 PM

SUAREZ

In fairness kang Cebu City Councilor Dave Tumulak maayo kaayo ang iyang ordinansa nga mag-require sa mga mag-motor nga magsul-ob og reflectorized vest panahon sa kagabhion.
Namulitika lang gyud ni si Mayor Tomas Osmeña nga dili niya ipa-compulsory.

Gani, alang nako dili lang ang mga mag-motor. Apilon pagpasul-ob kadtong mga pedestrian o mga tao nga manglabang sa kalsada paglikay sa disgrasya.

Sa akong experience, apike gyud ang panan-aw sa mga magdrive og sakyanan nga ang iyang bildo tinted. Labi pa kung “super dark” ug samot na gyud kung mag-ulan kay di maklaro ang sa gawas.

Mao nga bintaha gyud nga ang mag-motor ug molabang sa kalsada maka sul-ob sab og reflectorized vest kanunay kay dali ra’ng maalinggatan sa motorista ug malikayan ang disgrasya.

Laing butang nga akong isugyot sa taga Cebu City Traffic Office (CCTO) o CITOM mao nga kinahanglang magsul-ob sab ang ilang mga traffic personnel og hand glove nga reflectorized panahon sa kagabhion aron makit-an sab sa mga motorista ang ilang mga hand signal nga “go” or “stop”.

Kadaghan nako nakabantay nga ang mga personnel sa CCTO/CITOM mogamit og flash light sa ilang pag-man sa traffic nga dili masabtan ang ilang commands sa mga motorista.
* * *

Pakauwaw lang si retired Jail Superintendent Priscillana Gilboy ug iyang sister-in-law nga si Fatima nga nangilkil og 30 mil pesos sa usa ka guwardiya nga nangaplay pagka-jailer sa BJMP bugti sa pagpasar sa neuro examinations.

Pila na kaha ka mga aplikante ang gipangwartahan na ni Supt. Gilboy?

Mao diay nga dili gyud maundang ang grabeng graft and corruption sa BJMP kay ang ilang mga kawani o prison guard gipangilkilan na daan sa ilang mga opisyal.

Mao ni ang hinungdan nganong hangtud karon makalusot pa gihapon ang mga palusot diha sa prisohan kay ang mga guwardiya mapugos nalang pagdawat sa mga suburno kay biktima man sab sa pangilkil sa mga opisyal.

* * *

Dunay usa ka pamilya nga midangop kanako sa DYSS Super Radyo kay alang kanila gidaug-daug na gyud ang ilang kabanay nga piniriso diha sa Cebu City Jail Kalunasan sa mga kadagkuan sa BJMP.

Matud pa sa ilang reklamo, nga ang ilang piniriso gibartolina sukad pa niadtong Disyembre sa miaging tuig.

Ang sala sa binilanggo, kay ang midalaw kaniya nga iya ra’ng igsoon nasakpan paggawas nga iyang gipadad-an og mga senina ug mga tambal nga paracetamol nga paingon na’ng mo-expire.

Ang piniriso wa magtoo nga usa kadto ka kalapasan. Iyang gipadala ang mga tambal aron mapahimuslan sa iyang mga kabanay samtang magamit pa.

Sukad niadto gibartolina siya sa taga BJMP.

Ang ako ba, kung nakasala man ang piniriso, haom ba nga siya i-bartolina?

Dili ba kini kasupakan sa tawhanong katungod?

Mao ning hilasan lang ko sa atong mga kadagkuan sa BJMP. Estrikto nga wa sa lugar.

Ang angay’ng i-bartolina mao si retired Supt. Gilboy kay nagpakaulaw lang sa BJMP kinsa gikiha na.

* * *

Akong gikalipay nga abli na 24 oras ang Cebu City Sports Complex (CCSC) kay daku kini’g ikatabang nga mahimsug kita.

Si Ricky Ballesteros nga maoy manager, mitambag lang sab niadtong mga mo-avail sa CCSC nga mo-adto gyud sa ilang doctor aron matambagan kung unsa ang maayo alang kanila nga exercise ug ilabina tagpila ka oras o minutos aron dili mamiligro ang panglawas.

Laing pahimanggno niadtong moanha sa lawom na kaayong gabii mao nga magdala gyud og kuyog ug kinahaglang magdala og gamay ra nga kuwarta.

Pagbantay kamo sa mga sagbot sa katilingban.

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Importante, kaayo, Lloyd Suarez, reflectorized, vest

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.