Di man seguro angay’ng awayan kung asa ta sa duha ka mga dagkung proyektu pagsulbad temporaryo sa grabeng traffic dinhi sa Metro Cebu.
Alang nako mas maayo man gani nga ipatuman kining duha ka mass transit system nga mao ang Bus Rapid Transit (BRT) o Light Rail Transit (LRT).
Wa gyu’y ponto nga awayan ang BRT ug LRT gawas lang kung kinsay hari sa proyektu nga maoy maka-komisyon.
Magsige mo’g away diha hangtud mahimo ta’ng inutil nga way proyekto.
Sa atong kahimtang karon sa traffic, nagkinahanglan gyud kita og comprehensive master plan ug mga long term solutions.
Makatabang kaayo ang pagpalapad sa karsada, pag-construct og mga flyover, underpass ug mga tunnel.
Gawas niini ngan nga lapad kaayo atong dagat, mas maayo sab tingali nga seryosohon kining mga proposal nga dunay mga fast craft nga mobiyahe gikan sa Cebu City to Cebu South nga ruta vice-versa ug Cebu City to Cebu North vice-versa.
Gani way supak niini, ang Mini Bus Operators Association nga gipangulohan ni Julito Flores kay makatabang kini sa mga Sugbuanon.
Si Provincial Prosecutor Pepita Jane Petralba misugyot sab nga dunay mga regular nga biyahe sa ferry boat nga magbiyahe gikan South Road Properties (SRP) paingon sa Lapu-Lapu ug gikan sa Consolacion paingon sa Lapu-Lapu.
Kining tanan makatabang gyud gawas sa mga short term solutions sama sa pag-disiplina sa mga motorista, estriktong pagpatuman sa batas trapiko, paglikay sa mga kalihukan nga ang kalsada maoy himoong venue ug uban pa.
* * *
Ambot kung tinuud ba nga nag-wild (naghuramentado) kadtong taga Barangay Tiguib sa Argao niadtong Huwebes hinungdan nga napusilan-patay sa miresponde’ng pulis ni PO2 Howard Maynopas.
Sukwahi ang akong nadawat nga mga estorya sa mga silingan. Wa nag-wild ang biktima nga 37 anyos nga si Juan Banual Cambari kinsa giingong “bad boy” ug gikahadlukan.
Sumaa pa igo ra’ng nagtan-aw og TV ang biktima unya gi-frame up ni Mariano amahan ug sa maguwang aron mapatay.
Ang pasangil sa mga silingan nga kadugo ra sab, posible nga katoho-an kay pag-responde sa mga rescuer ang biktima naka-number 4 o nanghinambid.
So, kung sakyan nato nga nanghinambid, lisod ang teyoriya nga mi-atake gamit ang pinote aron patyon ang amahan ug maguwang.
Kinahanglang imbestigahon kini.
Apan kung tinuud nga namiligro ang kinabuhi sa pamilya ug sa pulis niadtong higayuna may rason sab nga patyon na lang kay sa masayang ang kinabuhi sa mga nagtinarong ug inosente .
May nervous breakdown ang biktima tungod sa bisyo nga gihulagway usab kini nga manghagis kung di hatagan og kuwarta sa amahan. Way kalainan sa ubang adik.
Hisgot naman gyud ta niining kahimtang sa mga adik, kinahanglang sabton ang ilang mga kinaiya kay gamay’ng ligas paka dayon.
Anggid-anggid ra ang nahitabo sa Argao sa grabe sab ka dugoon nga krimen sa Talisay niadtong tulo ka mga recovering addict nga pulos patay.
Lisud gyud ning dunay adik kay kung dili makapatay maoy mapatyan.
Mao nga kinahanglang kadtong mga pamilya nga may adik nga miembro kinahanglang dili gyud magpanuko ug di gyud maulaw pagtug-an sa mga otoridad aron pangtokhangon na lang nga mo-surrender ug seryoso nga magpatambal samtang di pa ulahi ang tanan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
