Niadtong Sabado sa hapon atol sa among programa’ng “Dialogue On The Air” sa DYSS Super Radyo among gihisgutan uban sa akong mga bisita ang isyu parte sa pagsulbad sa problema sa illegal nga drugas.
Ang discussion nag-sentro sa pagtugot na sa Korte Suprema nga puwede na’ng maka-enter og plea bargaining agreement ang mga akusado bisan ang kasong gi-atubang mao ang pagbaligya (Section 5) ug pagkupot sa shabu (Section 11) sa RA 9165.
Kaniadto wa kini gitugot kay estrikto gyud kaayo ang balaud sa illegal drugs.
Karong bag-o, akong nahibaw-an nga daghan na ang napabuhi-an sukad gitugot ang plea bargaining sa violation sa Section 5 ug Section 11 sa RA 9165.
Ang mga panelist mao sila si Retired RTC Judge Mienrado Paredes, State Prosecutor Raul Cristoria, former Dangerous Drugs Board Undersecretary Atty. Paul Clarence Oaminal, Supt. Juan Alpuerto Deputy Chief sa Regional Legal Service sa PRO-7, CHR-7 Special Investigator Leo Villarino, Chief Inspector Rosefiela Santolorin, chief sa Case Monitoring Section sa PRO-7 ug Alain Aliño sa Pagpakabana Kapuso.
Dunay mga kabalaka nga ning paagiha mosamot ang extra judicial killing sa mga ma involve sa drugas kay way garantiya nga mo-undang na ang dinakpan human sa plea bargaining.
Posible sab nga mahimo kining source of corruption sanglit ang mga adunahan nga mga dinakpan maka-afford pag-suborno.
Apan gipasabot nila ni Judge Paredes nga dili mandatory ug dili katungod sa mga akusado nga maka enter sa plea bargaining agreement kay basi sa lagda mamahimo lamang kini kung magkasabot ang prosecution ug defense team sa dili pa aprobahan sa korte.
* * *
Alang nako mas maayong sabton nalang si Daan Bantayan Mayor Vicente Loot sa iyang mga estorya bisag dili katoho-an kay dili ti-aw kining iyang sitwasyon karong panahuna.
Tabla ra nga siya nagsalimu-ang na intawon tungod sa iyang gipatuman nga mga security measures kay si Presidente Duterte iyang kontra ug wa gyud siya lung-i sa iyang pagkalambigit sa illegal drugs.
Bisan ako dili pa gyud konbinsido nga siya ug iyang pamilya gisuwayan pag-ambush niadtong Mother’s Day ug sa nahitabo karong bag-o nga napusilan iyang bagtak.
Kadtong unang hitabo posible nga “ambush me” unya karong bag-o posible nga siya ray nakakablit sa armas nga miboto ug posible sab nga gipusil gyud siya sa iyang escort.
Abir kung tinuud man ang version ni Loot nganong dili man nila i-surrender ang armas? Nganong wa man dayon sila magpa-paraffin test?
Karon pa ko kadungog nga moboto diay ang armas nga igo ra’ng nahikapan o ba kaha nalingkuran.
* * *
Kinsa man gud ning pito (7) ka mga jail officers sa Mandaue City Jail nga giingong kakonsabo ni drug lord Steve Go pagpalusot sa mga kontrabando paingon sa iyang silda?
Maayong panghukasan sa ilang mga maskara kining mga kanahan.
Kanyahay ra nga di gyud maundang ang palusot sa shabu sa atong mga jail facilities kay ang tigbantay ra diay sa mga piniriso ang mangunay.
Asa naman ang one strike policy diha sa BJMP?
Kaniadto automatic nga relibohonan dayon ang warden kung ma-eskapohan og binilanggo
Kining pagpalusot sa mga kontrabando mas grabe pa ni nga sala kay sa maeskapohan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
