Dili ko pro Duterte, apan daku kaayo ko’ng uyon niining pagpatuman sa OPLAN TAMBAY bisag kini maoy sinugdanan pagdeklarar niya og Martial Law.
Sama sa akong baruganan sa miaging Lunes nga publication nga uyon gyud ko nga ideklarar ang Martial Law kung ang rason mao ang pakiggubat sa illegal drugs.
Kinsa man gud ang sagad mag estambay diha sa mga pampublikong lugar ilabina sa kagabhion? Di ba ang mga nag negosyo man sa illegal drugs ug mga manggamitay?
Tinuud dili tanan nga mo-inom ang mogamit og shabu ug ubang gidiling drugas apan mayoriya sa mga palahubog motusok ug mosuyop gyud.
Kanus-a man ipatuman ang liquor ban nationwide kay mag-uban gyud ni sa illegal drugs.
Ang hubog nga sabog mao ning klaseha sa mga tawo nga way batasan, way kaulaw, way paminsar, abusadong dagku, badlungon ug sagbot sa katilingban.
* * *
With all due respect, sa Cebu City Police Office (CCPO) medyo dili kaayo tukma ang ilang paghimo’g acronym sa pulong nga TAMBAY nga (Tangtangon Ang Maabusado, Badlungon sa katilingban Apil niini ang Yawan-ong buhat).
Dili puwede nga ilang usbon ngadto sa acronym nga (Tanggungon Ang Mga abusado, Badlungon / sagbot sa katilingban Apil na ang Yawan-ong binuhatan)?
Ang termino nga tanggungon nagpasabot nga prisohon or ibalhug lang. Ang tangtangon nagpasabot nga taktakon. Puwede sab mahubad sa ininglis nga i- eliminate nga pasabot, patyon.
Hinaut ma-estudyohan kini nilang C/Inspector Jacinto Mandal Jr. kay motiyabaw gyud og samot ang mga human rights advocates sama ni Dr. Bebot Sanchez sa KARAPATAN nga patyon ang mga TAMBAY.
Ang ako lang sab unta nga maka-sustinir ang kapolisan sa ilang operation sa OPLAN TAMBAY.
Ang nakaporke man gud usahay nga nag-ayo lang sa sinugdanan.
Gani kining mga local ordinances nga ilang gitamdan sa OPLAN TAMBAY dugay naman ni’ng gipang pasar unya taud-taud na sab silang gihatagan og kopya ni Cebu City Councilor Dave Tumulak.
Kung wa mangusog ang presidente, inutil ang implementasyon sa mga local ordinances.
* * *
Daku nakong pasalamat sa Team of Pastors pinangulohan ni Monsignor Roberto Boy Alesna diha sa Shrine of Saint Therese of the Child Jesus Parish sa Barangay Lahug kay nahatagan og pagtagad ang problema sa parking namong mga parokyano.
Niadtong Biyernes sa sayong gabii bisag nag-uwan gidayon gyud nila ni Monsignor Alesna ang pagpahigayon ug thanksgiving mass ug blessings sa bag-o lang natukod nga two level parking nga mo-okopar og 30 ka mga sakyanan.
Makatabang kaayo og daku ang maong parking area sa mga manimbahay ug makatabang kaayo kini sa parokya panahon nga dunay dagkung kalihukan kay puwede man kining magamit isip venue.
Ang hangyo lang sab sa Team of Pastors nga kadtong moparking mas maayo nga mobutang og any amount sa ilang donation box kay maoy i-suweldo sa caretaker, parking attendant, bayad sa koryente ug ubang maintenance.
Mao ni ang nakanindot sa pagdumala ni Monsignor Boy kay misamot na ka presentabli ang simbahan.
Ang kontra nalang karon mao ang baha gikan sa ibabaw nga magdalag daghang basura unya adto tugpa sa Simbahan.
Hinaut nga ang mga parokyano motabang pagsulbad ning maong problema pinaagi sa paghipos og tarong sa mga basura nga dili ipa-anod panahon magbaha.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
