Si Ricarte Del Corro Jr. alyas “Blue Fox” kinsa gitudlo sa testigo nga usa sa mga mipusil – patay ni Atty. Salvador “Buddy” Solima ug mi-angol sa asawa nga si Verose, puwerte’ng pangugat sa pagpanghimakak sa krimen dihang akong na-estorya didto sa Cebu City Prosecutor’s Office.
Pero ambot, unsay tinuud sa iyang bakak? Iyang gitug-an sa ako-a nga niadtong Lunes sa hapon nga sumad karong adlawa sa pagkahitabo, didto siya mi-check-in sa Mambaling Pension House gikan sa alas 3:00 sa hapon hangtud alas 8:00 sa gabii uban sa usa ka Nicole kay mipahuway ug mitago.
Nahitabo ang pagpamusil sa mga Solima sa Singson Village Guadalupe mga alas 5:00 pasado.
Matud niya nga nagtago-tago siya niadtong tungura kay pinangita sa mga otoridad ngan nga nalambigit sa pagpamaligya’g shabu.
Sa ubang media interview, si Del Corro namahayag nga didto ra siya sa ilang panimay sa Labangon.
Sa laing media interview, siya nagkanayon nga nagsugal siya’g hantak sa pagkahitabo.
Sa laktod, iyang depensa mao ang “general denial and alibi” nga maoy pinakahuyang nga matang sa depensa basi sa mga decided cases sa Korte Suprema.
Si Paco Osmeña Larrañaga sa Chiong case kaniadto nakonbikto man gani bisag ang iyang depensa didto siya sa Manila atol sa abduction nilang Marijoy ug Jacqueline.
Si Del Corro miangkon nga iyang mga silingan ang magsoong Baluyos nga sila si Alberto ug Alvin diha sa Labangon.
In fairness sa kapolisan ilabina ang taga Homicide Section sa Cebu City Police Office may basihanan na ang ilang pagkiha ni Del Corro ug sa mga Baluyos sa kasong murder ug frustrated murder.
Posible man gani nga ang mga Baluyos maoy mastermind sa krimen.
Lisud kaayong toho-an si Alberto Baluyos nga wa siya magtanom og kalagot ug kahiubos sa mga Solima bisag napa-absuwelto siya sa abogado sa kasong robbery with homicide ngan nga utangan nila ang magtiayon og 7.5 million unya ang nabayad mobalor pa og 100,000 pesos.
Kinsa may di maglagot ana nga kada paningil ni Alberto sa mga Solima hatagan lang siya’g usa ka gatos ngadto sa tres sientos pesos?
* * *
Dimalas ro’ng tuiga ang nagpadayong sports fest sa mga opisyales ug mga personnel sa Provincial Capitol kay ang usa sa ilang trabahante nga player sa volleyball nga si Ma-Ann (Marianita Torion) gi-atake ug namatay niadtong miaging simana human sa ilang duwa.
Si “Ma-An” sa Provincial Treasurer’s Office kinsa kanhi varsity sa SWU maoy sinaligan sa ilang team.
Akong nahibaw-an sa iyang mga kauban nga kadto si Ma-An wa gyud modangop og cardiologist bisag gi-atake na sa miaging tuig nga may heart enlargement.
Inay ipa-admit sa doctor tungod kay taas kaayo ang blood pressure apan nibalibad ug nangayo lang og tambal unya pagkabuntag mitrabaho dayon.
Magsuol-suol ang puot sa dughan unya ang iyang ipasangil nga gi-atake sa hubak apan ang tinuud may deperensiya iyang kasing-kasing.
Tungod sa nahitabo ni Ma-An, ang sports committee mi-estrikto sa tanang players pinaagi sa pagkuhag (BP) blood pressure niadtong Huwebes nga daw medical mission.
Tungod kay sagad sa mga players puwerte’ng tag-asa sa BP gipakanselar ang mga duwa.
Si Dr. Gil Macato sa IPHO miingon nga iyang irekomendar nga pangkuhaan og ECG ang mga kawani nga mga player aron masuta kung wa bay deperensiya ang kasing-kasing.
Kung mao ni posible nga sundon kini sa ubang mga magpasiugda’g paugnat sa kusog ilabina kung edaran na ang mga players ug nagsige’g self- denial sa ilang estado sa panglawas.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
