Wa nay maka-state witness sa kaso nilang Noel Archival?

Gipang-relibohan or gipang-balhin og tuyo ang mga opisyales sa Highway Patrol Group in Central Visayas (HPG-7) didto sa Manila?

Unsa may tumong nga gipang-balhin na man human gipang-kiha ang mga opisyales sa HPG-7 sa pag-ambush patay ni manlalaban Noel Archival?

Tipik kini sa strategy sa abogado nga si Inocencio Dela Cerna aron sayon ra niyang konbinsihon ang Department of Justice ug Korte Suprema nga adto didto sa kaulohan ang venue sa preliminary investigation ug trial proper?

O ba kaha gilikay sa mga kadagkoan sa HPG ang ubang mga suspetsado aron dili gamitong state witness sa Task Force Achival?

Pero unsa man katinuod kining istorya nga akong nasagap nga nabalaka ang mga kabanay sa usa sa mga gikiha niining pagbalhin didto sa Manila kay tingalig unayon aron hingpit gyung patak-umon sa iyang mga nahibaw-an?

Kagahapon sa hapon, pormal nang miduso sa iyang formal entry of appearance si Dela Cerna isip maoy abogado sa taga HPG-7 ug gidawat niya ang subpoena nga gi-isyu sa five-man panel alang sa iyang mga kliyente.

* * *

Layo ra gyud ta sa gobyerno sa South Korea kay paspas kaayo silang nakadakop sa kapitan sa barko ug sa duha ka mga tripolante nga maoy manubag sa kalit nga pagka-lunod sa ilang barko nga mikalas sa daghang mga pasahero.

Dinhi sa ato nga kompleto nata sa balaud, dili kapapriso sa kapitan ug sa mga crew unya langay-langayon pa ang resulta sa Special Board of Marine Inquiry.

Nga unta wa man mag-dili ang atong kodego penal nga dili ipa-priso ang mga nagdanghag nga mga kapitan sa barko nga malunod.

Maglaum ko nga maghatag og leksiyon sa gobyerno sa Pilipinas kining gihimo sa gobyerno sa South Korea kay makalibog gyud kaayo kay ang mga driver bitaw sa mga bus nga madisgrasya automatic man nga prisohon sa mga pulis.

* * *

Pagkasuwerte ni Lapu-Lapu City Councilor Leo Mercado niadtong Sabado de Gloria kay nakalingkawas pa sa gihimong pagpamusil sa kanhi empleyado sa City Hall nga si Patrocinio “Rabi” Baring kinsa iyang gikalalis parte sa yuta.

Kun wa mopaltos ang armas ni Baring posibleng gihaya na karon ang konsehal human niadtong hitabo sulod sa Mahayahay cockpit sa may Gun-ob, Lapu-Lapu.

Ang nabutang karon sa alanganin mao na si SPO4 Edgar Sagarino kinsa mi-responde ug maoy nakapusil-patay kang Baring.

Kun tinuod man nga igo rang miresponde ang pulis dihang gitawgan sa pag-wara-wara ni Baring sa iyang dalang armas nga nakapalisang sa mga sugarol, angay lang sab siguro nga atong daygon si SPO4 Sagarino.

Kun kasohan man kining maong pulis, kinahanglang tabangan kini ni konsehal Mercado sa legal nga aspeto aron sab intawn madasig ang atong kapolisan pag-responde sa bisan unsang mga alarma.

In fairness hinoon sa pamilya ni Baring, ilang katungod ang pagdangop sa Commission on Human Rights in Central Visayas (CHR-7) ug sa National Bureau of Investigation aron matutokan ang kaso ug kahatagan sila og hustisya kay matud pa, gibinaboy ang biktima ug gipasagdan lang nga maoy hinungdan nga namatay tungod kay nahutdan sa dugo.

Pero nganong didto man sab si Konsehal Mercado sa buwangan? Nagkatol ang kamot sa sugal bisag namatay pa ang Ginoo?

Unsa katinuod ang pasangil sa kabanay sa biktima, nga si SPO4 Sagarino bodyguard ni konsehal Mercado nga maoy hinungdan nga didto ra sa crime scene?

* * *

Akoy naluoy sa usa ka tinun-an sa college nga midangop intawn kanako bisag paingon na nga magtungang gabii niadtong Lunes kay gikulata sa iyang amahan.

Nibutoy gyud intawn ang nawng sa dalagita ug dunay mga bun-og sa bukton ug bitiis. Matud pa gawas nga siya gikulata pag-ayo gipalumsan pa siya sa tubig sa gripo sa iyang amahan.

Ang sala ra gyud sa bata kay mitubag-tubag sa iyang mga ginikanan ug nakagamit og pulong nga sakit.

Mao nga akong gitambagan nga himoon niya ang proseso sa balaud kay interesado man gyud siya nga ipapriso iyang amahan.

Magpasalamat ko sa mga pulis sa Mabolo Police Station nga miabag sa biktima ug dihang giadto ang ilang bay, gipasibat sa lain niyang igsoon ang ilang amahan.

Interesado gyud nga mokiha ang anak kay alang niya morag dili niya amahan ang mikulata kaniya ug gusto niya nga makat-on ang iyang mga ginikanan kung unsay anaa sa balaud.

Pagkapait sa sugilanon sa maong pamilya kay bag-o pa gani milabay ang mga “Balaang Adlaw.”

TAGS: