“Tuig 1975 gyud ko nagsugod og panglaba. Mga estudyante nagkuha og medicine akong mga suki. Sa una, P50 ra ang akong pangayo sa usa ka bulan, barato ra kaayo. Pero naay limit pila kabuok sanina palabhan.
Ka upat ko manglaba ug ka duha mamlantsa sa usa ka semana. Lunes, Martes, Huwebes ug Bernes, manglaba ko ana. Myerkules ug Sabado ko mamlantsa. Ibilin ra na nila ilang bulingon gawas sa ilang boarding house, pick upon ra nako unya ihatod nako inig homan og laba.
Sa una maabot og 12 ka tawo akong dawaton nga labada. Karon, tiguwang naman, unom o walo kabuok. Sakto ra man na. Naa man koy senior citizen ug sa indigent nga madawat.
Unsa’y kalahian kung ari magpalabada nako? Makuha gyud ang buling. Dili mang lagom ang mga uniform kay i-handwash man nako unya gamitan og perla nga puti. Mangreklamo man ang uban kay mangawala kuno ilang mga sanina sa laundry shop.
Sukad pani adtong 1983 akong plantsa hangtod karon, mao pa akong gigamit, uling gihapon.
Nindot man gud ang uling nga plantsa kay gamitan man na og kandila aron di motaya unya ganahan man akong mga suki kay mosinaw pa gyud ang mga sanina.”
