Ikapasigarbo na gyud ang VSMMC

Kung wa malandig akong maguwang nga si Yurie dili ko makasaksi personal nga competitive na gyud karon ang mga facilities sa Vicente Sotto Memorial Medical Center (VSMMC).

Ngan nga anaa ko sa prensa ug mosubay sa mga palisiya sa media coverage, dili gyud baya intawon mi makasulod sa maong tambalanan sa panahon nga dunay mga dagkung trahedya nga anha i-admit ang mga biktima.

Kutob ra mi sa gawas sa ospital kay maoy palisiya. Mao nga wa pa gyud ko maka-kita kaniadtu sa sulod sa VSMMC.

Pero lahi na gyud karon ang VSMMC nga kanhi Cebu Southern Islands Hospital.

Tungod kay na-operahan sa ulo akong maguwang ni Dr. RJ Aguanta ug gikuha ang blood clot sa iyang utok human gi-ataki sa high blood gipahiluna siya sa Critical Care Unit (CCU) hangtud nabalhin sa Intensive Care Unit (ICU).

Nahurot akong bilib sa CCU ug ICU diha sa VSMMC kay nalupigan pa ang ubang mga private hospitals sa kanindot, kalimpiyo ug sa mga equipment diha.

Bisan ang ilang mga private rooms ug mga ward na-assess nako nga limpiyo ug hamugaway na gyud.

Again magpasalamat kamig daku kang Dr. RJ Aguanta ug sa tanang neurosurgeons ug mga staff diha sa VSMMC kinsa naningkamot gyud nga way sipyat ilang surgical operations sa ulo sa among igsoon ug karon kalooy sa Diyos paspas kaayo iyang recovery ug gani na-discharge na niadtong Sabado sa udto.

Magpasalamat sab kog daku kang Dr. Wyben Briones kay mi-serbisyo sab diha isip consultant sa neuro department nga nakatabang kaayo ug daku namong mga kabus.

Daku sab namong pasalamat kang Sir Dundee Roble sa Philippine Health Insurance (Philhealth) kay pinaagi sa iyang mga paningkamot nigaan ang among obligasyon.

Magpasalamat sab kog daku ni Dr. Cynthia Genesolango sa Capitol – Integrated Provincial Health Office nga mi-ayuda sab ug kang Sajed Telebangco nga misakripisyo sab intawon pag-drive sa ambulance ug pag-apil ug asnat sa among pasyente.

Daku sab kog pasalamat ni Dr. Cristina Giango nga mitabang sab sa pamilya.

Maglaum ko nga molambo pa gyud ang VSMMC inabagan sa mga dagkung opisyal sa gobyerno ug sa tanang sector.

Akong nahibaw-an nga daghan na kaayong mga maayong laki nga mga doctor ang miserbisyo diha sa VSMMC.

Gawas kang Dr. Briones, eksperto sa neuro, Dr. Ramon Najarro experto sa pedia, mihatag usab sa iyang katakos si Dr. Evelyn Tam kinsa eksperto sa pagpa-anak.

Si Dr. Tam maoy mipahimugso sa akong duha ka mga buotang anak nga sila Karl Anthony ug Karen.

Manghinaut ko nga daghan pa’ng mga Sugbuanong eksperto ang motabang sa mga pasyente diha sa VSMMC.

* * *

Kung mahimo pa’ng pugngan, usa nako sa mobabag nga mo-retire si Cebu City Prosecutor Nicolas Sellon karong sunod buwan sa Setyembre.

Apan unsaon, moabot man gyud ang panahon ug susama kini sa panultihon nga wa gyu’y molungtad nga butang sa kalibutan.

Sa tinuud lang na-anugnan ko nga mobiya na sa puwesto si Sellon kinsa usa ka ligdong ug gi-respetohan sa legal profession tungod kay makamao gyud sa iyang trabaho.

Mao nga makaingon ko nga sayang gyud kaayo’ng mawala si Sellon sa prosecution service.

Si Deputy City Prosecutor Maria Luisa Ratilla Buenaventura maoy itudlo nga Officer-In-Charge (OIC) sa panahon nga mohawa na gyud sa hingpit si Sellon.

Samtang sa Cebu Provincial Prosecutor’s Office, gipahibawo sab ni Provincial Fiscal Jane Petralba nga gitudlo si piskal Petronio Elesterio isip Deputy Provincial Prosecutor.

Sa dakbayan sa Carcar akong nahibaw-an nga si piskal Annabelle Robles maoy ibutang didto.

Hinoon, deserving kaayo nga makahupot sa ilang tagsa-tagsa ka katungdanan ang mga nahisgutang piskal kay makamao sab ug wa koy nadawat nga mga reklamo o negatibong isyu batok kanila.

Sa mga amigo ug sa mga amiga nako nga mga buotan ug makama-o sab pag-andam-andam na kamo kay inyo nang panahon ang pagsakripisyo sa serbisyong tinud-anay.

* * *
Sama sa akong giingon nga dili na angay’ng lalisan ug awayan kining pagpamutol sa mga puno-an sa kahoy gikan sa Naga paingon sa Carcar.

Kinahanglang mo-sustiner si DENR Secretary Ramon Paje nga nag-revoke sa tanang tree cutting permit.

Kini aron mangita ug paagi sila si DPWH Secretary Singson ug iyang mga tawo nga likayan nalang gyud ang mga kahoy kay hasol gyud kaayo namo nga magsige nalang kita ug pinutlanany sa 88 ka puno-an.

Ang tigpamaba sa DPWH-7 nga si Marie Mignon Nillama mitug-an kanako atul sa programang “Dialogue On The Air” niadtong Sabado sa DYSS nga dunay insaktong budget ug puwede pa’ng makapangita ug laing budget aron magpalit ug mga yuta diha sa San Fernando to Carcar ug aron pag-abli ug bag-ong kalsada aron likayan ang existing national road nga gamay ug dunay mga puno-an sa kahoy nga putlonon.

Unya samtang mag-conduct ug feasibility study sa bag-ong ablihan nga mga kalsada, magtinabangay ang taga DENR ug mga eksperto sama nilang Dr. Roger Guzman kung unsaon pagtambal kining mga puno-an nga masakiton aron dili mangatumba dayon.

Usa sa akong sugyot nga gihangop sa mga representante sa DENR-7 pinaagi kang Dr. Eddie Llamedo, tigpamaba ug sa spokesperson sa DPWH-7 nga si Nillama, mao nga kining mga puno-an sa kahoy kinahanglang ugbukan sa lawom ug taas nga pondasyon sama sa poste sa koryente ug itupad sa mga puno-an ug adto ibakos ang kahoy aron way disgrasyang mahitabo.

Abir, ato kaha ning pa-estudyuhan aron way daghang debate. Sa akong ubos nga pagtan-aw kini maoy immediate solution aron mawala among mga kabalaka nga magsigeg agi nianang mga kalsadaha ubos sa landong niining mga dagkung puno-an.

O ba kaha hiktan ug dagkung kabli ang mga parte sa punoan unya ang pikas tumoy sa kable ibakos sa laing lig-ong estraktura aron kung matumba dili pabor ngadto sa kalsada. Pagka-simple ra gyud niini.

Kung magsige tag lalis unya way gihimo pulos ta mga inutil. Kung dunay laing matumba ug dunay mga kinabuhi nga makalas igo ra ta sa pagpanglingo-lingo ug sa pagpanglipagho! Busa tutokan na ni oi!