Mabuhi ang prensa sa Sugbo!

Sa tinud-anay lang, kasagaran namong mga sakop sa media, nag-ayo lang pagtagad sa problema ug reklamo sa ubang mga trabahante kung hisgutan ang estado sa pamu-o.

Naka-ingon ko niini kay hangtud karon daghan pa ang way “security of tenure” unya gidaug-daug sa pagpadawat sa suweldo nga kuwang kaayong ibuhi sa pamilya.

Nganong di man gyud kini tutukan sa mga dagkung organisasyon sa print ug broadcast media?
Gani subo kaayong palandungon nga dunay namatay nga miembro sa media kaniadtu nga gihatagan ug lungon nga puwerte’ng huota sa minatay.

Di man sa ingon nga pasobrahan ang benepisyo sa mga sakop sa prensa kay sayod naman nga kining propesyona dili tumong sa pagpadato.

Apan unta makonsensiya sab ang mga tag-iya nga motan-aw sa kaayuhan sa ilang mga trabahante.
Ako nagtoo nga ang “media corruption” ug mga “unethical issues” sa media ma-minusan pinaagi sa paghatag ug desenteng benipisyo.

Alang nako ang pagpuyo nga desente, tipik ug kabahin sa pag-obserbar sa kagawasan sa prensa.
Mag-unsa man kanang magsigeg singgit sa kagawasan unya nagkutoy ang tiyan.

* * *

Na-alarma ko niadtong Huwebes sa gabii ni Mr. Baltazar Tribunalo Jr. hepe sa Provincial Disaster Risk Reduction and Management Council (PDRRMC) nga mi-anonsiyo sa akong nightly radio program sa dySS Super Radyo nga ubos na sa public storm signal number 1 ang Sugbo sa bagyong “Mario” niadtong tungura.

Ako siyang gideretso ug pakgang sa wrong information kay bag-o pa ko nakatawag sa taga Philippine Atmospheric Geophysical Astronomical Service Administration (Pag-asa) Visayas/Mactan nga miklaro nga wa silay giisa sa Kabisay-an ubos sa public storm signal.

Bisan si Pag-asa Director Oscar Tabada miklaro nga wa gyu’y storm signal dinhi sa ato sa Kabisay-an sa bagyong “Mario”.

Si Tribunalo nga akong gi-confront sa iyang information miingon nga iyang nakuha ang balita gikan sa usa ka TV network.

Unsa may buot ipasabot ni Mr. Tribunalo? Nagpakita sa iyang pagka-iresponsable ug nagpasagad sa iyang trabaho?

Nabisto na gyud hinoon nga dili closed ang iyang coordination sa taga Pag-asa sa ilang pag-monitor sa dagan sa panahon.

Nakapanglingo-lingo ko ni Tribunalo kay on-the-air baya intawon to nga bisag unsaon pagkorehir nadungog gyud kung unsa siya ka danghag.

Granting nga mibalita ang usa ka TV network, wa gyud siya mosuway pag-double check sa Pag-asa?

Wa kaha mabiktima si Gov. Junjun Davide sa forecast ni Tribunalo nga misuspenso sa klase niadtong Huwebes sa buntag sa tibuok Sugbo bisan dili angayan kay ang ubang lugar hinay ra man kaayo sa taligsik?

* * *
Ang vice president sa Anakbayan nga si Nino Olayvar mitug-an kanako atul sa akong programa’ng “Dialogue On The Air” sa dySS niadtong Sabado nga dunay professor sa Cebu Normal University (CNU) nga si Dr. Gary Lapiz ang gireklamo sa mga 3rd year students sa Bachelor of Arts in Political Science.

Ang reklamo sa mga tinun-an kay wa mohatag ug grado ang professor sa ilang subject nga “International Relations” human nga pakyas sila pag-submit sa ilang thesis.

Ang 3rd year class midangop na sa Ombudsman Visayas ug sa Civil Service Commission aron maka-interbener sa problema.

Akong nahibaw-an nga na-insulto ang professor dihang dunay usa ka tinun-an ang mipadayag nga kaya kaayo niya ang final exams.

Tungod sa panghambog sa usa ka estudyante nadamay ang tanan ug mao nga gihatagan sila ug “thesis” nga apiki na kaayong i-comply ngan nga closing na hapit.

Pero in fairness, akong nahibaw-an sa ubang mga estudyante nga si Dr. Lapiz usa ka maayong professor ug gani daghan ang naka-uyon sa iyang mga paagi sa pagtudlo.

Balik kita sa panultihon nga anaa ra gyud sa tumoy sa ballpen nakasalalay ang grado sa mga bata.

Pero kinahanglang sulbaron kining maong problema sa usa ka dialogue nga di na kinahanglang mag-agi ug taas nga proseso.