Kaniadtu pa gyud kining pagkadanghag sa mga opisyales ug mga personnel sa Cebu City Medical Center kon CCMC pag-handle sa mga minatay nga anaa sa morgue.
Dili bag-o kanako kining nigawas nga balita nga dunay minatay nga gikitkit sa ilaga ang ilong diha sa morgue o temporary holding area sa CCMC nga anaa sa Cebu City Fire Department.
Ambot kun nganong nasudlan pa’s mga ilaga ang container van alang sa mga minatay.
Kung limpyado pa ang mga nagdumala ug gitagad pa ang mga kakulangan, may mga mananap pa kaha sama sa ilaga nga makasulod?
Tan-awa ra kung unsa ka iresponsable ang nagdumala diha sa CCMC, wa gani kabutang ug suga.
Akoy naluoy sa patay’ng lawas ni anhing Harold Siton nga daw gi-“ungo” sulod sa CCMC.
Maglaum ko nga pang-silotan ni Cebu City Mayor Michael Rama ang mga hugawan, tapulan ug nagpabaya nga mga personnel sa CCMC aron magkinto ning mga kanahan.
Akong gilauman nga tinud-on kini sa igsoon sa minatay nga si Golddy Siton – Yuson pagkiha aron motagam ning taga CCMC.
* * *
Dili na compulsory ang proposed ordinance ni Cebu City Councilor Gerardo Carillo nga magmandu unta sa tanang business establishments dinhi sa Siudad nga kinahanglang 10% sa ilang mga trabahente mga Senior Citizens.
Giklaro ni konsehal Carillo sa among programang “Dialogue On The Air” nga nakahukom siya’ng dili na himoong compulsory ang iyang ordinansahon human misupak ang mga negosyante.
Inay compulsory himoon nalang kining voluntary. Tungod kay voluntary wa nay ipatumang silot niadtong mga establisimento nga dili maka-sunod.
Alang nako, dili na kinahanglang ipadayon ni Carillo ang pagpasar niini ngadto sa usa ka ordinansa kay pwede ra kining ipa-agi sa usa ka resulosyon.
Tungod kay dili compulsory, gipasabot ni Carillo nga wa nay “penal clause” kon wa nay silot batok sa mga bay patigayon nga dili makatuman.
Sa original nga proposed ordinance ni Carillo, iyang gitinguha nga ipa-revoke ang business permit sa bay patigayon nga mobalibad sa pagdawat sa mga senior citizens nga mo-apply og trabaho ug pasirad-an ang negosyo niadtong kanunay’ng mobalibad sa application sa mga edaran.
Ang bugtong makapa-ingganyo karon sa mga negosyante pagpa-trabaho sa mga edaran mao nga maka-kuha sila ug tax incentives gikan sa 2%-3% nga tax rebate sa ilang bayranan nga tax due sa tibuok tuig.
Sa tinuud lang daghan pang mga senior citizens nga baskug pa ug kaya pa kaayong manarbaho.
Samtang gipahibawo karon sa PhilHealth pinaagi kang Atty. Karisma Agraviador nga mahimo nang lifetime member sa Philhealth kadtong mga senior citizens bisag way usa ka daku nga nabayad basi sa implementasyon sa bag-ong balaud.
Qualified niini kadtong wa gyud makapa-miembro sukad na sukad sa PhilHealth.
Ang himoon lang mao nga mo-fill up sa form nga ana sa mga opisina sa mga senior citizens unya magpa-process sa PhilHealth dala ilang ID.
* * *
Bisan tingali kung akoy anaa sa sitwasyon ni Super Bobby Nalzaro ako gyu’ng ipa-disqualify ni Cebu Assistant City Prosecutor Gandhi Truya.
Sa panahon nga akoy mag-atubang ug kasong libel mopa-inhibit sab ko ni Truya.
Kini tungod kay ang amahan ni piskal Gandhi nga si kanhi Assistant Provincial Prosecutor Crispulo Truya nagtanom sab ug mga pagdumot kanako.
Kay gawas nga nakatabang ko ni Mrs. Marilyn Benting pagkiha ni Truya kaniadto, akoy usa sa mga instrumento sa iyang ikaduhang hugna nga 1 year suspension kay akong gipakiha ug gitabangan kadtong edaran nga lalaki nga taga Medellin nga si Jesus Gelig Sr batok kang Crispulo.
Si Mr. Gelig na-priso ug taas nga katuigan sa simpleng kaso nga direct assault tungod sa pabaya ug giyak-an pag-ayo ang kaso ni Crispulo.
Gani ang kaso ni Gelig nga ubos pa sa preliminary investigation ni Truya wa gyud resolbaha hangtud nga nadiskubrehan ang records ni konsehal Gerry Carillo.
Niadtong higayuna bag-o pa’ng abogado si Carillo ug dili pa councilor.
Si Carillo maoy mipa-release ni Gelig sa karaang CPDRC pinaagi sa pag-file sa writ of habeas corpus ug na-aprobahan sa korte.
Dihang na-release si Gelig sa prisohan, gi-diritso sa among sibya-anan kaniadtu nga DYMF Bombo Radyo ug didto among gi-interview ug gipakiha batok kang Crispulo Truya.
Gani gawas sa suspension ni Crispulo gi-konbikto pa gyud siya sa maong kaso sa Sandiganbayan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
