“Coast guard maoy basolon sa disgrasya!”

Hugot   gyud  akong   baruganan  nga ang taga  Philippine  Coast Guard  maoy   manubag  sa  pagkalunod  sa  MB  Nirvana – B didto sa dakbayan sa  Ormoc   niadtong Huwebes  sa  hapon  diin  50 kapin  ang   nakalas.

Wa  untay disgrasya   kung  wa  pa nila  palargaha ang maong  motor banca kay may  bagyo na.

Dili  makabasol  ang  taga  PCG   sa  taga  Philippine Atmospheric  Geographical  Astronomical Service   Administration (PAGASA)  bisag   wa mopagawas ug   “gale  warning” pagkabuntag  kay may  rason  na  silang moga-id   sa mga gagmay’ng sakyanang  pandagat  kay nasayod sila sa forecast sa PAGASA nga  naporma  nang bagyo si “Egay” ni-anang pagka alas 4:00 pa sa  kadlawon niadtong Huwebes.

Unya  napun-an  pa ilang  kasayuran sa  next  bulletin  pagka alas 10:00am  diin  nagka-kusog  si  “Egay”.

Kung wa  pa tugti  paglarga  ang motor banca  matikyaob  kaha to?

Wa   kaha  tingala og   kuwarta   ang  taga Coastguard  sa  mga  negosyante’ng  pasahero nga sakay   sab  niadtong  tungura?

Dili motagam  ning  taga Coast Guard  kung di  pangkulban sa  kaldero.

* * *

Haskang labada  gyud sa  ulo sa atong  mga traffic  managers  kung  unsaon  pagsulbad kining grabeng problema sa  traffic sa  Metro  Cebu ilabina  sa mga  rush hours.

Daghan na  kaayong mireklamo sa atong  mga  pasahero ilabina  ang mga  nagpuyo sa  dakbayan  sa  Lapu-lapu   nga ania dinhi sa dakbayan  sa  Sugbo  manarbaho  ug nang-eskuwela kay  mababoy  gyud diha  sa dakbayan sa  Mandaue.

Paeta  gyud kay moabot   na sa sobra  duha  sa  oras ang biyahe.

Niadtong  Sabado  sa  hapon  atul sa among  programa’ng “Dialogue  On   The Air” sa DYSS Super  Radyo  among gituki kining  maong  problema  uban  nila   ni  Mr.  Frank  Brazil  hepe sa  CTMS  sa dakbayan sa Lapu-lapu  uban  kang  Architect  Florentino  Nimor  Jr.  OIC Planning Officer  sa dakbayan  sa Mandaue.

Gani bisag  dili na  kaayo traffic  niadtong  Sabado,  miabot  pa og 1 hour  and 12 minutes  ang biyahe  ni Brazil  gikan sa Lapu-lapu  hangtud  sa  among  complex sa  GMA-7 Cebu.

Ang  mga rason  nganong problema  na  kaayo  ang traffic,  tungod kay  daghan  na  kaayong  mga sakyanan   kay  barato na unya daghang surplus  nga  dinhi gihan-ok sa ato.
Usahay ang  mga second hand  nga  mga sakyanan  mokalit  lang  sa pagka-aberiya sa  kalsada.

Gawas pa,  gagmay  kaayo ang mga kalsada unya dunay  mga  karaang flyover  nga single lane ra  gyud  ug  wa  mosibo sa  mga kalsada.

Sa  data  sa 2010  nga  nakuha  sa duha  ka  mga  opisyal,   nahibaw-an nga  mas  daghan pa  ang  gidaghanon sa  mga  sakyanan  nga  mo-agi sa duha  ka  mga   tulay matag adlaw ikomparar   sa respective total  number  of  population  sa Lapu-lapu  ug Mandaue nga  tag 300 mil kapin ka mga botante.

Sa mga exchanges of ideas,  aron masulbad  ang problema dunay  mga  rekomendasyon nga  himoon.

Ang  pipila ka  mga sugyot  mao  ning  mosunod: pagpatuman  sa  number  coding or color coding  sa  mga sakyanan,  total  truck ban sa  adlawan,  equal  distribution sa  mga  ruta sa PUJ sa dakbayan sa Mandaue ug ang  paghatag  og dedicated  lane sa mga buses nga  i-field  unya sa  SM  prime  holdings  karong  Oktubre  nga ang ruta gikan sa SM Mambaling,  SM North Reclamation, Pacific  Mall hangtud airport and vice versa.

Ang  duha ka opisyal  nag-encourage usab  sa mga  pasahero nga  mosakay   nalang  sa  ferry boat   gikan  sa Lapu-lapu  paingon sa  pier 3 Cebu City vice-versa.

Ang long term plan  mao gyud ang pagpalapad sa  mga kalsada aron way embudo nga parte  o “bottleneck” ug ingon man ang    pagbutang  og  mga  lapad  nga mga  flyover sa  mga intersections.

Maglaum  ko  nga  masulbad kining  maong  problema  sa  mas  labing sayo.

Kung  epektibo  ang mano-mano  pag-supervise sa  traffic  sa Mandaue   ug ibalik  ang   karaang mga  agi-anan,  kinahanglang  mosakripisyo kita  pagpatuman.

* * *

Wa  gyud  ko masipyat  sa akong  prediction nga  mobawos gyud ang basketball team sa Cebu Daily News / Inquirer batok  sa  among team sa  GMA 7/ DYSS Super  Radyo sa  game 2 sa  best-of-three nga  championship  sa Newsmen  Basketball Association of Cebu  (NBAC)  kagahapon diha sa Cebu Eastern College.

Dili  na gyud  to tsamba  sa CDN kay gilubong  mi ug  sobra  20 pontos.  Mi-aksiyon  man  tuod  mi pag-gukod  sa  4th quarter apan  di  mabangbang  ang mga three-point- shots ni Jonas Panerio ug  Johnny  Tabuco ug  ang  depensa   ni Super  Ador Mayol,  ni  Super Tolits ug Agaw Junjie.

Tabla  na ang  among standing, 1-1. So  karong Domingo, makita na gyud ang  katag  kung  kinsay kampiyon niining NBAC season karon.

Sama sa  akong  giingon  nga  bisag  nagbalik-balik  na  among titulo sa Kapuso  network nga  perme’ng   mo-champion sa  NBAC  apan  di gyud namo  ma underestimate  ang  ubang team sa media  outfits  ilabina  ang CDN / Siloy nga puwerte sa’ng  lig-ona.

Congrats CDN!