Pagkadaghan na gyu’ng fake!

Pagkakuyaw  na gyud  karon sa panahon  kay  daghan  na  kaayong  mga pagpanglingla ug  mga  pangilad.

Didto  sa  Davao  may  pekeng  bugas (rice) ug  may pekeng  pansit. Dinhi  sa  Sugbo  may  pekeng  mga  tambal.

Makadawat  pa ko nga  may fake money, fake gold bars, ug  uban  pa basta di  lang  pagkaon ug tambal.

Pagkaon na gani  ug  tambal  nga   fake maoy   ipalusot  sa mga  tindahan   maayo   gyu’ng i-firing  squad ang  mga  responsable.

Sa  mga  pekeng  tambal, wa   kaha   makakompra  niini ang  atong mga  kadagkuan sa  Department  of  Health ug mga  different  Local  Government  Units nga  maoy  ipanghatag   sa  mga  kabus?

Unsa   man  gyud  ka seguro  nga  dili  fake ang  mga  tambal nga  atong  napalit  sa mga  botika  nga  atong  gisaligan?

Way  plano  ang  taga  gobyerno  ug  mga experto pagsubay  kung  genuine ba  ang  mga  tambal   nga  naka-stock  sa  DOH,  sa  mga  LGU’s ug  mga botika?

* * *

Babagan  gyud  taman sa ginhawa  sa  Simbahang Katoliko dinhi sa Sugbo  ang  same-sex  marriage  taliwa nga  dunay  pamahayag  si  Pope  Francis nga miingon nga  kinsa man siya  ang mohukom sa  kagustohan sa  uban.

Si Rev. Fr.  Eligio Suico, Chairman sa Commission on Family  and Life of the Archdiocese of  Cebu nga  nag-representar sa  Simbahan atul  sa among  programang “Dialogue On  The  Air”  niadtong Sabado  sa DYSS Super Radyo,  mipadayag nga dakung  immoral ug unnatural  ang  same sex  marriage  kay kasupakan  kini sa  kabubot-on  sa  Diyos.

Miingon si  Padre Suico nga malooy  lang sila  sa mga bayot ug tomboy  ug  sa ilang  mahimong  menyo-an  kay  dili  makabaton  sa tinud-anay   nga kalipay kay way  mahimugso   nga  anak.

Na-obserbahan ni Padre  Suico  nga mas daghang  insidente  sa mga  nagka-relasyon nga same  sex  nga dili  gyud  magdugay  ang  panag-ipon kay  kuwarta  ra ang  gi-apas   sa lalaki  ug babaye.

Buot ipasabot  nga dili  gyud  tinud-anay   ang  gugma kay ang gugma sa  magtiayon  usa baya  kini ka dakung  sakripisyo  ug dakung hagit sa  kinabuhi.

Si Padre Suico   miingon  nga posibleng  mag oratio  imperata ang Simbahan  aron  babagan  gyud  kini  ug gawas  pa  dunay mga pundok  nga  gamiton sa Simbahan  aron mosupak  sab  sa kongreso ug  sa Korte Suprema pag-legalisar sa  same sex  marriage.

Apan si Dr. Rowena Burden  nga nag- representar  sa Rainbow Coalition  nga  nagprotihir  sa equal rights  sa mga  LGBT kon lesbian, gay,  bisexual  ug transgender  nagkanayon   nga sayop  si Padre Suico  nga mo-ingon  nga  immoral  ug  unnatural  ang same sex  marriage.

Matud  ni Dr. Burden  nga  gimugna sa  Diyos  kining  maong  hut-ong sa  katilingban  kay  duna Siya’y  katuyu-an.

Matud  niya  nga  kung  law-ay  sa  panan-aw sa  taga  Simbahan  nga  kaslon sa sulod  sa  Simbahan ang bayot ug  lalaki  unya  tomboy  ug babaye,   ipa-agi  nalang  sa   civil wedding diin  ang  mo-officiate   mao ang  huwes,  mayor  ug  uban  pa  nga  gitugot  sa atong  Family  code.

Ang  immoral  kadtong  nakapatay,  nakapanglogos, nakapangurakot. Pero ang  pag-angkon og  kalipay dili  immoral.

Daghan  na  kaayong  kasong  paghikog tungod kay gidid-an ang mga LGBT  pagbaton  sa samang  katungod  ug  pribilihiyo.

Dili sab  konbindsido si  Dr. Burden nga  kung  ma-legal sa Pilipinas ang  same  sex marriage   ig-on  na  kita sa mga dagkung  kataladman ug  laygayon  kita sa Kahitas-an.

Siya  miingon nga   kung duna  may  mga  fortuitous events  sama  sa supertyphoon,   grabeng  linog  ug  uban  pa,  resulta   kini sa  climate  change  nga   binuhatan sa tanang  mga   tawo.

Si  Cebu  City  Councilor  Alvin  Dizon   kinsa   maoy  nangamahan sa  ordinansa  nga  Anti-Discrimination Ordinance pagpalapad sa  katungod sa  mga LGBT,   miingon   nga  mopasar  siya  ug  resolosyon  sa konseho   aron  ang  dakbayan sa  Sugbo  mosuporta sa gi-file   karon nga  bill sa  congress sa  AKBAYAN  Party List ug  sa usa ka    judicial  action nga himoong legal  sa  Pilipinas  ang  same -sex  marriage.
Mao ning giingon kung unsay  ikalipay ihatag  nalang  gyud.  Kung  sala  man  kining mga buhata,  ang mga  nahingtungdan maoy   manubag sa Ginoo.
* * *
Nakuha  gyud  namo  sa  GMA-7/ DYSS Super Radyo ang  championship title  kagahapon  sa Cebu  Eastern College (CEC) batok  sa  Cebu Daily News / Inquirer  sa  Newsmen Basketball Association of  Cebu (NBAC).

Kung wa  ko  masayop  kini maoy  among  ikalima  nga  grand slam sukad natukod  ang  NBAC.

Sama  sa  akong  giingon nga  lig-on  gyud ang  “Siloy”  karon  kay bisan  kami  naglisud  gyud  sa  pagdaug.

Dihay  mga  higayon  nga   mabiyaan  mi  ug  hapit  10  pontos. Diha  lang  mi  nakapabor  sa  4th  quarter  kay sagad   mga  player  sa  “Siloy” na foul trouble na sila.

Again  magpasalamat  kaayo  ko  ni Sir   Bobby  Inoferio  among NBAC Commissioner  kinsa   misakripisyo  gyud  nga  matul-id  ang among liga matag Domingo.

Daku  sab  kaayo  kog  pasalamat sa  mga  major  sponsors sa  among liga sama   nila   ni  Sir  Chester  Cokaliong  sa Cokaliong  Shipping Lines,  Sir  Jefferson  Go, Sir  Sammy  Sia  ug  Sir John  Maraat  sa  (CEC)  ug  kang  Apas   Barangay  Captain Ramil Ayuman.