Impluwensiyado gyud ang mga Osmeña

In fairness kang  kanhi  kongresista ug  former  Cebu City  mayor Tomas Osmeña,  wa   siyay tulubagon  sa kasong kriminal ug bisan unsang balaod  dihang  nakaligis-patay  ang  iyang sakyanan   kang  Fe  Casallas niadtong  Sabado  sa  gabii sa  sitio  Saac  1, barangay  Buaya, dakbayan  sa Lapu-Lapu.

Bugtong ang  iyang  driver  maoy  manubag sa  aksidente sa  kasong reckless imprudence resulting in homicide, serious physical injuries and damage to  properties.

Apil  nga  manubag sa  kasong  kriminal  si  Danny  Igot  nga nag-motor sab nga maoy  nakatapsing sa  magtiayong Casallas nga  maoy  hinungdan  sa  pagkahagbong  ni Fe  ug  didto  naligsan  sa sakyanan  ni  Tommy.

Apan  ang  isyu dinhi nilang  Tommy  ug  City Councilor  Margot Osmeña  mao  ang  kapakyas  nila  pagpa-surrender sa  ilang driver  nga  unta  maoy  direktang  manubag  sa  kamatayon  ni  Casallas.

Wa sab  ko  kasabot  nganong  wa magloon   sa usa  ka  sakyanan  ang  magtiayong  Osmeña nga gikan silang  nag-usa’g  panihapon  didto  sa  Shangrila Mactan   sa wa  pa ang  aksidente.

Wa  kaha mamakak  ang mga Osmeña?

Akong  subli-on  nga  isip opisyal  sa gobyerno si  Margot,  ug samtang silang magtiayon may  moral  ascendancy  ngadto sa  ilang  driver,  ila  untang  gitahan  ug  gipatanggong  human  sa  hitabo  kay  mao  man  ang  normal nga  proseso.

Nganong giduphan  man  nila   ang  ilang driver?  Kinsa  may  driver niadtong  tungura?  Dili kaha  si  Tommy?  Dili   kaha si Miguel?  Dili kaha empleyado  ra sa  Cebu  City  government?

Imposible  kaayo  nga  niadtong  tungura way  pulis  ug  taga  traffic sa  Lapu-Lapu nga mi-insister  nga  ipatanggong  ang driver sa  sakyanan  ni  Tommy.

Wa  kaha  gawngi  sa  impluwensiya  ni  Tommy  ang mga tinugyanan  nga  nang-insister  pagpa-priso  sa  iyang  driver?

Nagtuo ko nga way  nahimo  ug  nagyugpos  ang  mga  pulis  pagpa-detain  sa driver  kay  na-impluwensiyahan  lagi  sa  mga  Osmeña kinsa  mi-esplikar  nga wa silay  sala.

Naigo  kini sa  panultihon,  nga  kining pag-implementar  nato  sa balaod  susama  kini sa  sugilanon  nga  kung  ang  langaw  maoy  modasmag  sa  lawa-lawa,  seguradong   tapot  ang  langaw.  Pero  kung  kabaw  maoy  mohasmag,  guba  gyud  ang   lawa-lawa. Sa  mas  gamhanan  lang.

Ang  labing  sayon  nga  mahimo sa  mga Osmeña mao  gyud  ang  pagtanyag  og  dakong salapi  ngadto  sa  kabanay  sa  namatay  aron  dili  nalang  dak-on  ang nahitabo ug  wa  nay  kihaay.

* * *

Kinahanglang  imbestigahon ni  Governor  Junjun Davide ang   iyang jail consultant  sa  Cebu Provincial  Detention and Rehabilitation Center (CPDRC) nga si Marco Toral  human kini  nagbuot-buot  pagpagawas  og piniriso  nga  igo  rang  napi-ang sa basketball  nga way pananghid  sa  husgado.

Nagpakauwaw lang si Toral sa Davide  administration.

Mas  maayo  man  gani’ng  ipa-contempt  si  Toral  unya   kasohan  og  usurpation of  judicial  function kay  bisan  gani  si  Governor  Davide dili  kabuot-buot  pagpagawas  og  mga  piniriso nga way  court  order gawas  lang sa  mga extreme cases.

Pero  kung napi-ang  lang, dili  gyud  kana  emergency, uy, kay  madala  ra  na  og  hilot.

Ambot  kung  ig-unsa  ni Toral  ang  piniriso nga si Bienvido Noel  nga  nag-atubang  og  kasong  murder .

Dili  pa ba kini  mahulog  nga special treatment  ngadto  sa  binilango  kay  si  Toral  mismo  maoy  mimaniho sa  iyang  sakyanan  pagdala  ni Noel  ug  didto  niya  gidala  sa  private  hospital  inay  adto  lang  unta  sa  government  hospital?

Unya  si Toral  wa  pa  dayon  motug-an  sa doctor sa  tinuod  nga  pangan  ni  Noel.  Ambot  kung  unsay  iyang  gitago-an?

Unsa  man gyud ang  negosyo  ni  Toral  sud sa CPDRC?  Nganong  anaa  naman siya  nagyaka diha? Kusog  ang  halin sa  pan  sa  mga  piniriso, Toral?

Kanus-a  man  ni mo-resign  si Toral?