Salins Hulbot
Dunay chika nga duna kunoy mga local companies nga gibalibaran sa usa ka bag-ong mall pag-abang og pwesto sa sulod niani kay buot ang maong mall mo-specialize og foreign brands.
Apan miingon ang atong source nga basig dawaton na ron sila kon mang-apply silag balik kay daghan naman kunong foreign brands nga nanira na sa ilang gi okupahan nga lugar.
Mahimuot akong maghunahuna nga nagkadaghan na ang mall apan maomao ra ang mga sulod nga tindahan niani. Mao tingali kini katarungan kon nganong buot mag specialize og foreign brands ang ubang mall para malahi kini og ma prestigious usab. Ang problema lang kay basig dili igo ikabayad sa abang ang ilang halin.
Unsaon nga ang bisyo kuno sa mamalitay karon mao man ang pagpamalit og branded nga ukay-ukay para isuroy sa mall.
Speaking of brands, duha ka brand ang na headline sa miaging semana. Usa niani mao ang Nike. Dihang miingon si Pacquiao nga mas maayo pa ang mga hayop kay sa mga sakop sa LGBT, gitangtang sa Nike ang ilang sponsorship sa boxer. Apan matud pa sa kampo ni Pacquiao taudtaud na nga wa magbayad ang Nike ni Pacman isip endorser ug ang gipanghatag sa kompaniya kaniya mao na lang ang libreng sapot matag sangka niani.
Dili si Pacman ang unang athlete nga gitangtangan og sponsorship sa Nike. Sila ni Marion Jones, Lance Armstrong, Oscar Pistorius, Adrian Peterson, Justin Gatlin ug Ray Rice puros gipanangtang sa maong kompaniya pagka endorser ubos sa lainlaing rason. Usa kanila nakapatay. Duha nangulta. Ug ang uban may kalabutan sa drugas.
Si Pacman ray gi dismiss sa Nike tungod sa iyang pagpanaway sa pakighilawas sa mga bayot ug tomboy. Medyo kuwang lang tingali sa gay-spotting skills si Manny sa iyang pag obserbar sa mga hayop kay kon tan-awon sa mga listahan sa mga mananap nga mo practice og homosexuality sa Internet apil man niini ang mga penguin ug salmon.
Duna man gani kunoy iring ug iro nga gay. Sa amo lang tugkaran diha kami babaye nga iro nga dili pahabal ug ining ting pamiga na moapil kinig simhot ug tila sa kinatawo sa ubang babaye nga iro.
Ang Apple ni Dodong Steve Jobs na balita karon kay mibalibad sila sa hangyo sa korte nga pahimuon silag software nga mo unlock sa cell phone sa usa ka terrorista.
May duha ka rason ang ilang CEO kon nganong mobalibad sila. Una, wala sila nianing maong software ug nga dili makapugos ang gobyerno kanila sa paghimo sa wala pa nila mahimo.
Wa ang kompaniya mahibawo kon mahimo ba kini nila. Ikaduha, ang paghimo sa ingon makadaut sa ilang produkto nga ilang gipanghambog nga dili maabrihan ni bisan kinsa.
Ug kon makahimo sila ning maong software walay kasiguruan nga sa maong iPhone ra kini gamiton. Kinsa man unyay makapugong sa gobyerno pag gamit niani sa ubang iPhone kon tua na kini sa ilang mga kamot?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
