Salins Hulbot
Ug nidaug na gyud si Leonardo DiCaprio og Oscar. Nakuptan na gyud niya ang gamay nga opaw nga istatuwa aguig primyo sa iyang pagkamangkamang sa snow sa pelikulang The Revenant. Dili kini maoy pinaka maayo nga performance ni DiCaprio.
Tingali kini ang pinaka physically demanding apan usa ray nawong sa bangi-itang actor gikan sa pagsugod hantud sa pagkahuman sa salida. Apan alang sa mga fan ni Leonardo murag dugay na nga due kaniya ang maong estatuwa.
Enough of DiCaprio, ato usang ialilahon kining opaw nga iyang gikuptan nga gihinganlan og Oscar. Gitawag ang trophy sa Academy of Motion Picture Arts and Sciences (AMPAS) nga maoy ipang primyo sa mga abilidaran sa pelikula og Oscars.
Gikaingon nga ang gi-model ning maong estatuwa mao ang Mexican actor nga si Emilio “El Indio” Fernandez ug nga ang isklultor nga si George Stanley maoy nikulit niani niadtong 1928. Gold-plated nga solid bronze ang unang mga Oscar statuettes. Apan wa madugay giilisan kinig Britannia metal alloy nga copper plates.
Dayon nahimo kining silver-plated hangtud nga gold-plated na gyud kini. Sa panahon sa gubat nga nagnihit ang mga puthaw (metal), plaster of Paris na lay gigamit paghimo niani. Hinuon gibayluan ug mga metal stauette kining maong mga trophy paghuman sa gubat.
Apan ang dakong pangutana sa mga mananaway ning pasundayag mao ang pangan mismo ni Oscar. Nganong kini may iyang ngan? Kinsa man intawong paria ang gabunyag niya niani?
Unang mitawag sa maong primyo og Oscar mao si Walt Disney dihang iyang gipasalamatan sa iyang “Oscar” ang AMPAS niadtong 1932. Ug unang pamatalaan nga migamit sa maong ngalan para sa estatuwa mao ang Time magazine niadtong 1934.
Maoy tinubdan usab nga miingon nga si Bette Davis, usa ka artista nga nahimong pangulo sa AMPAS maoy unang mitawag niani og Oscar kay mauraura man kuno kinig panagway sa iyang bana nga si Harmon Oscar Nelson.
Apan may nag-ingon usab nga ang executive secretary sa Academy niadtong 1931 nga si Margaret Herrick maoy unang mitawag niani og Uncle Oscar kay angidangid kuno kini sa iyang paryente nga si Oscar Pierce.
Usa ka kolumnista ang nakadungog ni Herrick ug misulat nga “employees have affectionately dubbed their statuette, Oscar.” Pagka 1939 opisyal nang gitawag sa AMPAS nga Oscar ang ilang primyo.
Tungod tingali sa kadugay na nga panahon nga nadunggan natong Oscar nag panggan ning gamay nga istatuwang opaw murag nadawat na nato kini. Unsa kaha kon Peter pay gibunyag niini? Opaw ba kaha gihapon kini kon Peter o Roger ba kaha hinuon ang pangan niani?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
