Gireklamo nga pulis

Super Hirit

Ako’y  naluoy  sa  habal-habal  driver  nga si Glenn “Boy”   Sapio   nga  napusilan  sa usa  sa  mga pulis nga  nadestino  sa Mabolo Police  Station niadtong  Huwebes.

Kung tarong  pa  si  PO2  Joel  Vergara nga  nadestino sa  Beat Patrol sa Mabolo,  mitubag  unta siya  sa  isyu ug  reklamo  sa  biktima nga   gitawgan  sa among  sibyaanan.

Ang  version  sa biktima  nga  nasuko ang  pulis  dihang  nagkabangga ang ilang motor diha  dapit sa  Country  Mall.

Sa  kasuko  kuno sa  pulis,  namusil  kini ngadto kaniya unya  dihang  wa makaigo,  gidul-it  ug  gipatapsingan  kuno ang  iyang  tiil  ug  mipasalba  pa gyud.

Unsa  man,  hubog  ning  maong  pulis  niadtong  higayona?

Wa  motubag  si PO2  Vergara  sa  isyu aron  moimbento  og  estorya  nga  ipakadautan  ang  biktima?

Kung  may  sala  ang  habal-habal  driver,  dili  man  seguro  lisud  nga  modepensa  si PO2 Vergara sa  isyu?

Ang pulis mipasabot  nga  adto  na  siya  motubag  sa proper  forum sa panahon nga siya  imbestigahon.

Bantay  bitaw  kung  imong  kamangon  ning  biktima ug  hulgaon.

Maglaom  ko  nga  madisiplina  ning  klase’ng  pulis sa  iyang  mga  labaw.

Si Inspector  Allan  Soronio, deputy chief  sa Mabolo,  mipasalig  nga  ilang  kahatagan  og  hustisya  ang  biktima ug  ilang  imbestigahon  ang  isyu.

Alang  nako, kung  seryoso  gyud nga  mokiha  ang  biktima,  kinahanglang  adto  iduso  ang  iyang  reklamo  sa  Military  and  Other  Law  Enforcement  Offices (MOLEO) sa  Ombudsman kay dili bias.

Kay  kung  anha  ra sa  opisina  sa  kapolisan,  posibleng  hawngan  pa  ang  biktima kay  pulis  ang  gireklamo.
* * *

Salamat  nga  naminaw  ang  mga  kadagkuan sa  Land  Transportation  Office (LTO)  sa mga  reklamo  ug yangongo  sa  publiko (motorista)  hinungdan nga gi-defer nila  ang  sistema  nga ang tanang sakyanan dinhi sa  Sugbo  moagi  og  inspection  diha  sa Mandaue LTO sa Motor Vehicle Inspection Service (MVIS) diha  sa Subangdaku, Mandaue nga  nakamugna  ug grabeng  traffic  ug  kahasol.

Akong  sublion akong  baruganan  nga  nalipay  sab  ko  nga  estriktohon na  sa LTO  ang  pag-inspection  ilabina  sa  mga  pampublikong  sakyanan kay  ang mga depektoso maoy  makamugna sa  disgrasya.

Alang  gani  nako,   di lang  matag  renewal sa  registration sa  mga  sakyanan ang  pag-inspection.  Puwede  kining  himuon sa  taga LTO bisag  unsang  orasa diha  sa  kadalanan  unya  at  random basis.

Puwede  man  gani   nga  wagtangon  ang MVIS,  unya ang actual   inspection   himuon diha  sa  kadalanan.

Nakaingon ko niini tungod  kay way buang nga   tag-iya sa  sakyanan,  driver  sa sakyanan ug  operator  nga  iadto  ang  iyang  sakyanan  sa MVIS  nga  depektoso sa  panahon sa  renewal.

Mao  nga  sa  di pa  iadto  sa MVIS,  maningkamot  gyud nga  way  depekto  aron makapasar  ug  hatagan dayon sa  renewal  nga  way  hasol.

Mao nga mas  bintaha  gyud  nga  ipaagi  sa  actual  road  side  inspection bisan  unsang orasa  aron  anaa  perme  ang  huna-huna  sa    tag-iya  24 oras  nga  way  depekto  ang  sakyanan.

Kay  akong  naobserbahan  nga  nabatasan  na  gyud  sa uban  nga  unya  na  magtagad  sa  mga  depekto sa  sakyanan  kung  duol  na  ang renewal  sa  registration.

* * *

Akong  sublion nga ma-defeat  ang purpose  niining  pagtukod  nato  sa  Bus  Rapid  Transit  (BRT)  kung  dili  mapalapdan  ang  Banilad-Talamban  road kay  mosamot  gyud ka  traffic  na’ng  maong  lugar  kay  way  ibutang  nga  dedicated  lane  for  BRT  dihang dapita tungod sa kagamay. Shared  lane  lang daw nga buot ipasabot  kalandrakas  lang ang agi unya.

Ang dedicated  lane for  BRT  mao  ra ang  gikan  sa Pardo,  Natalio Bacalso Avenue,  Jones  Avenue-Osmeña Boulevard ug  Escario-Ayala.

Unsa  may kapuslanan  sa BRT  kung  dili  unahon ang  pagpalapad  sa Ban-Tal?

Di ba  sab  puwede  nga  ang  operation  sa BRT  mao ra  ang  gikan  sa Pardo to Ayala and  vice versa?

Sama  sa  akong  giingon kaniadto  nga  masulbad   lang  ang  pagpalapad  sa  kalsada  sa  Ban-Tal area  kung  maghimog  ordinansa  ang  Siudad  nga  way  tugtang bag-ong  commercial  establishments  nga  ma-construct   ug  ang tanang  mga  balay  patigayon  diha  daplin sa kalsada  dili  hatagan  og  renewal sa  business  permit  hangtud dili  mapalapdan ang  kalsada.

Kini  aron mapugos  ang  mga  tag-iya  sa  mga  luna  dihang  dapita  alang  sa  expropriation  proceedings.

Tabang  tawon mo kay  kamo  ra say  mabulahan!