Super Hirit
Haskang gubuta gyud unta karon diha sa Cebu City Hall kung gitugtan pa sa Comelec ang six months suspension nilang Mayor Michael Rama, Vice Mayor Edgardo Labella ug sa 12 ka mga konsehal.
Segurado ko nga kopyahon nila’ng Rama ang gihimo kaniadtu ni former governor Gwendolyn Garcia nga wa gyud mokanaug sa Kapitolyo hangtud nga wa tagda sa Court of Appeals ang iyang petisyon pag-contest sa suspension order.
Gani atong naobserbahan nga dunay mga pultahan sa City Hall ang gipasirad-an na ni Mayor Rama aron way makabunlot nila ug giandam na ang ilang mga supporters ug puwersa aron pagbabag ni bisan kinsa nga mopalayas kanila.
Mao nga alang nako di lang tingali sila si Mayor Rama maoy mopasalamat sa taga-Comelec nga wa magpagawong sa dautang motibo sa taga Malacañang.
Kinahanglang moapil ang mga magbubuhis magpasalamat kay magpadayon ang mga basic services ug normal ang mga transactions sa City Hall.
Unsa ka tinuod nga puwerte na’ng iwita sa survey sa tawo nga maoy utok pagpasuspenso nila’ng Rama?
Hisgot naman gyud ta’g pulitika ug bahin sa resulta sa survey, makatawa nalang ko niining ubang mga presidential bet nga nalupig sa survey kay dili na gyud motuo sa resulta.
Apan unsa kaha kung sila maoy naglawig ug nag-una sa survey? Natural, motuo gyud sila. Di ba?
Ingon ani gyud ni’ng tawo, dili dayon moangkon sa kapildihan.
Hinuon, insakto man sab na nga ang official result sa survey inig kahuman na sa May 9.
Pero ang ako, duol sa tinuod kining mga nanggawas nga survey result kay before midaug si P-Noy, siya maoy nag-una sa mga survey kaniadto.
* * *
Grabeha na gyud sa kainit karon kay bisag wa pay alas 8 sa buntag, daw mamahit na ang adlaw ug bisan alas 4:30 na sa hapon sa dayong salop.
Mild El Niño pa ni? Or extreme El Niño phenomenon?
Nauga na ang mga sapa ug suba. Minus na kaayo ang supply sa tubig.
Sa 34.9 degrees Celsius nga temperature niadtong miaging simana ug nakatala na sa 41 degrees Celsius nga heat index, dili pa ni mahug nga extreme El Niño?
Mag-ampo nalang gyud ta nga ang bawos unya niini nga La Niña dili mograbe kay maghatag gyud og risgo kanato.
* * *
Naunsa man tawon ni si PO1 Aquiles Legaspi Redoble nga miunay man pagpusil-patay sa iyang pag-umangkon didto sa Poblacion, Dumanjug nga si Daryll Redoble Cerdon?
Libak ug away lang sa katigayunan maoy hinungdan sa krimen sumala pa sa kabanay.
Paeta gyud kung armas maoy gamiton pagsulbad sa away.
Sama sa akong gibalik-balik nga kining intra-pamilya nga away sayon ra kaayong sulbaron kung anaa ang respeto ngadto sa mga maguwang ug ipadaplin ang batasan sa pagkahakog.
Sumala pa bitaw sa panultihon nga mas bintaha na lang ang hangol ug dalo kay sa hakog.
Kay ang hangol ug dalo dili manghatag sa iyang pagkaon ug katigayunan. Apan ang hakog, ilogon ug angkonon ang dili iyaha.
Wa gyu’y pagmahay nga mag-una. Unta ang mga bala ug armas adto ipunting sa mga criminal ug dautan. Apan ang iyaha didto giunay sa pag-umangkon nga unta makatabang pa to niya kung gisulbad ang problema sa inanay nga paagi.
Duna pa gyu’y mga edukado nga wa makasabot sa trabaho sa Barangay Lupon ng Tagapamayapa.
Kung di makaya sa barangay reconciliation, ilahos sa korte ang away.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
