Baga natag nawong kung si Duterte gihapoy pasulbaron sa basura

By: Lloyd Suarez July 03,2016 - 09:24 PM

Dili ma-spelling ang atong kahimtang niadtong Biyernes sa hapon hangtud sa gabii gumikan sa grabeng uwan dinhi sa Metro Cebu.

Nagkagidlay kita sa grabeng traffic tungod kay daghang kalsada ang gipangbahaan. Daghang na-stranded. Daghang nangapasmo sa dalan.

Daghan sa mga commuters ang napugos pagbaktas kay kuwang ang mga sakyanan. Ang uban nitirik.

Dunay mga residente dinhi sa Siudad ug Mandaue nga namiligro tungod sa baha.

Mitiyabaw sab ang mga nagpuyo sa luyo’ng bahin sa Lahug Public Market kay nasudlan og daghang tubig-ulan ang ilang mga panimalay kay way kalutsan sukad ang sikbit nga tag-iya sa lote misirado sa naandan nga agianan sa tubig.

Dunay portion sa among agianan sa GMA-7 nga nabulit sa hinulpa nga dagku’ng bato ug yuta.

Sa tinuod lang, wa gyud kita’y dag-anan kung ang kinaiyahan na maoy manghasi.
Pero ang sitwasyon niadtong Biyernes ug napun-an pagka Sabado mas maayo na lang kung itandi nga ig-on kita og supertyphoon sama niadtong “Yolanda” sa Tacloban. Simbako lang sab intawon, labngon og pito ka lawod.

Unsa naman tuod kita ka andam kung dunay supertyphoon? Wala ba pangtaktaka sa atong mga politiko ang mga well-trained rescuers ug mga naglangkub sa local disaster risks reduction management?

Wa bay plano ang taga Department of Public Works and Highways (DPWH) nga magbutang na lang og flyover sa mga kalsada nga suki sa baha samtang wa masulbad ang atong mga drainage nga napuno sa mga basura?

Puwera gaba ug puwera saway, puwerte’ng daghanang basura ang nanglutaw sa baha. Nagpakita lang gyud kung unsa ka hugawan ug unsa ka iresponsable kita’ng tanan.

Magpaabot gihapon kita ni Presidente Duterte nga maoy modisiplina kanato unsaon paghipos atong mga basura?

* * *

Nalingaw kaayo ko sa mga panghinaot sa mga ordinaryong trabahante sa korte ug piskaliya nga unta wa nay kaso nga ma-file sa ilang mga buhatan niining paglingkod na sa katungdanan ni Presidente Duterte.

Daw akong nasabtan nga si Duterte ra gyu’y makasulbad sa mga nagtipun-og nga mga kaso nga kutas ug luod na kaayong tan-awon ang gibag-on sa mga case records.

Hinuon sa atong criminal law, ang kamatayon sa akusado maoy makabadbad ug makapapas sa iyang criminal liability. Sa laktod, wa nay kaso.

Bisan ang akong mga amigo’ng huwes mipadayag nga pabor sila sa extra-judicial killing basta klaro lang sab nga badlungon sa katilingban, ilabina kining mga namaligyag illegal drugs.

Nagpasabot lang kung unsa ka frustrated ang mga nangalagad sa hustisya kay sila maoy unang nasayod kung unsa ka hinay hangtud mahimo sila’ng inutil.

Kung wa pa lagi modaug pagka presidente si Duterte, ambot kung mapatay ba si Jeffrey “Jaguar” Diaz, Rowen Secretaria alyas “Yawa” ug ubang mga drug personalities lukop nasud.

Ambot kung manurender ba pud kaha ang mga mi-surrender nga mga drug pusher ug user?

* * *

Dili na kita angay’ng matingala nga hulipan sa iyang puwesto si Chief Superintendent Patrocinio Comendador Jr. pagka director sa Police Regional Office 7 kay bag-o na ang liderato sa PNP.

Ang importante nga napaabot ni Comendador ang mensahe nga kauban siya sa kawsa ni Presidente Duterte pakiggubat sa mga drug lords.

Kumusta man ang taga Carcar, taga Pulang Bato, taga Dita, taga Consolacion, taga Tangke Talisay ug uban pa? Way plano nga mo-surrender?

Way mahayay ha!

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Baha, Cebu, Department of Public Works and Highways, Department of Public Works and Highways (DPWH), DPWH, drug addict, drug pusher, drugs, Duterte, extra-judicial killing, flood, GMA 7, illegal drugs, Lahug Public Market, local disaster risks reduction management, PNP, President Duterte, rain, stranded, traffic

We use cookies to ensure you get the best experience on our website. By continuing, you are agreeing to our use of cookies. To find out more, please click this link.