“Pusher, carnapper, akyat-bahay.” Mao kini ang nasuwat sa papel nga gipatong sa patay nga lawas sa panday nga gipusil sa Barangay Talamban ning dakbayan lawom sa gabii. Ang gapusil sa panday mao ra usay gasuwat sa maong papel ug gipirmahan niya kinig “CCDS.”
Matud pas mga saksi, may motor nga miagi sa maong lugar diin miangkas ang maong hitman.
Walay nasayud sa tinuoray nga kahulugan sa mga litra nga CCDS. Apan daghan ang mihubad niani og Cebu City Death Squad. Aguid-aguid man gud ang maong mga initials sa DDS o Davao Death Squad sa dakbayan ni Digong niadtong siya pa ang mayor didto. Ang gipang luthang niadtong panahona sa Davao mao ang mga gidudahang drug pusher, child rapist ug mga kriminal nga gabalikbalik ra paghimog krimen.
Gikan sa Hulyo 1 hangtud petsa 28, duna nay 36 ka mga gidudahang drug pushers ang namatay sa ilang ingkwentro sa kapulisan. Apan gawas niani, duna pay laing 17 nga gipatay mga wala mailhing mga tawo nga kasagarang mobiya sa lugar sa ilang pagpamusil pinaagi sa pag-angkas sa motor.
Unsa may atraso sa mga suspect ning maong mga gunmen? Kon walay personal nga atraso ang mga suspect sa gunmen, ang matugkad lang natong motibo sa pagpamusil mao ang kwarta. Kinsa man kahay gasuhol ning CCDS pagpatay ning maong mga suspect?
Tigmotigmo Agukoy, hain si Tuko nagtago? Way makatubag ning maong pangutana apan may pipila ka mga mata nga misusi sa kawanangan para mangita niadtong binuhat nga mitanyag og salapi para pagdasig sa kapulisan pagpatay sa mga gidudahang pusher. Sumala sa atong nasayran, dili na karun iya ang mga pulis ug mao tingali nga miundang na siyag paghatag og ganti kanila, ug tingali natural lang nga may magduda nga basig tua na sa CCDS niya gibubo ang salapi nga iprimyo unta sa kapulisan.
Mao ra man gog batang kuwang sa pagtagad kining bangkirong waldas sa kwarta, dali kani siyang masina kon maupawan ang iyang salida, kusog kining manimawos. Ang atong rason sa pagduda kaniya kay nahitabo na kining pagsiaw sa mga vigilante sa iyang termino sa pagdala sa dakbayan niadtong pagsulod sa bag-ong milinyo.
Angay unta niya ug kon si kinsa man gani ang gapaluyo ning CCDS nga ang pagsumpo sa krimen ug pagpatuman sa kalinaw dili barangay basketball league diin makig sangka sa championship ang iyang team batok sa kapolisan kon kinsa kanila ang mas daghang napatay nga pusher.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
