Ambot kun kinsay nag-istorya sa tinuod nilang TV host ug actor Vhong Navarro ug sa modelo nga si Deniece Cornejo.
Si Deniece hugtanon sa iyang akusasyon nga buot unta siyang lugoson ni Vhong. Apan si Vhong nanghimakak.
Sila rang duha ang nasayod sa ilang kinabuhi. Magkihaay man kaha sila.
Abir tan-awn nato unsay katapusan sa ilang eskandalo. Insakto si Vhong nga di gyud mokompyansa sa taw nga di ka suheto.
Leksiyon sab niya nga sobra kalihok sa babaye.
Unsa sab ka tinuod nga dunay anak sa dakong opisyal sa Kapitolyo nga hapit makatigbas sa iyang kaubang staff nga lalaki tungod kay nag-ilog sab sa maanyag nilang kauban niadtong Lunes sa hapon?
Gani gipa-leave na ang tulo ka mga personahe nga na-involve sa iring-iring. Kafaet!
* * *
Unsa na say nahitabo sa Police Station 3 sa Basak, dakbayan sa Mandaue ubos sa liderato ni Senior Insp. Genilo Veraque?
Bag-o pa gani nakontrobersiya iyang sakop nga si PO3 Brent Fulmaran sa pagpasagad og dakop sa taxi driver nga igo rang mi-turnover sa cellular phone sa GMA-7 unya karon, duna na say iyang mga sakop nga mga pulis nga nag-unay og sumbagay.
Sa istorya sa sinumbagay, nahitabo kini niadtong Sabado sa gabii apan wa ma-involve si PO3 Brent Fulmaran.
Ang nalambigit mao si SPO1 Gregorio Cabizares kinsa matud pa gitabangan og kulata sa iyang mga junior police officers nga sila si PO2 Salvador Pogoy ug PO1 Ronald Manlangit.
Matud sa sugilanon sa Basak Police Station nga nagsugod ang lalis ug sinumbagay dihang ang duha ka mga junior police mikalit lang pagpasulod sa laing kwarto sa ilang dinakpan nga way pananghid nga unta turno na ni SPO1 Cabizares pag-entry sa blotter sa dinakpan nga si Edwin Maneja.
Ang dinakpan gisignit tungod kay namun-og kini sa iyang live-in partner. Apan ang duha ka mga junior officers buot manukiduki kang Edwin bahin sa nahibaw-an niini sa mga silingan nga namaligya og ginadiling drugas didto sa Labogon.
Wa ko makasabot kun nganong mo-abot sa punto nga naglalis hangtud nga nagsinumbagay nga pwede man unta silang magsabot-sabot aron molampos pagpuhag sa mga sindikato sa ilang area of concern.
Unsa may buot ipasabot niini? Posible ba nga ang mga pulis sa Basak, Mandaue lumba lang ug proteher sa mga drug pushers?
Alang nako, kun way mga personal interest ang mga pulis sa bisan unsay makuha nga impormasyon sa dinakpan, dili gyud angay silang mag-unay ug mas malipay pa sila aron duna silay trabahoon. Di ba?
* * *
Unsa man gyud ka-estrikto ang mga guwardiya sa lain-laing mga establisimento nga mobadlong sa mga tawo nga ipahubo ang gisul-ob sa ulo ug nawng sama sa helmet, kalo ug uban pa nga mopaingon nga mosulod sa main entrance?
Gituyo kini aron mailhan ang nawng ug matarong pag-capture sa gimontar nga CCTV camera ang dagway sa mga tawo nga manulod.
Sa nahitabong tulis niadtong Lunes sa hapon sa Three Sixty Pharmacy sa Banilad ning syudad gidudahan ang gwardiya nga kakonsabo sa nag-inusara nga tulisan nga armado og .45 caliber tungod kay matud pa, ang tulisan gipasagdan sa gwardiya nga nakasul-ob sa iyang helmet sulod sa usa ka oras kapin.
Kinahanglang subayon kini kay daghan na kaayong mga gwardiya nga involved sa pagpanulis.
Dili kaha trabahante ra sa maong botika ang nanulis human gi-dismiss sa trabaho?
* * *
Panahon na i-review ug tarong ni Cebu Gov. Hilario “Junjun” Davide III ang pay parking sa Kapitolyo nga mahal pa sa bayad sa SM ug Ayala nga gipatuman kaniadto sa Economic Enterprise Council panahon ni kanhi Gov. Gwendolyn Garcia.
Wa nay babag nga tukion sa Kapitolyo ang isyu sa pay parking kay gi-dismiss na ni Regional Trial Court Judge Silvestre Maamo human nga wa na mopakita og interest ang mga abogado isip kihante nga mopadayon sa kaso niining liderato na ni Davide.
Alang gani nako, mas maayong i-libre nalang ang parking diha sa Kapitolyo kay wa man tukora ang gobyerno aron mag-negosyo og ingon ani.
Nindot sab tingali nga iplastada ni Governor Junjun ang income sa Kapitolyo niining parking ug pilay bahin sa kinatibuk-ang kita sukad pagsugod ni Garcia kaniadto.
Dili ba alkanse ang Kapitolyo niini unya ang nadato mao ang private company nga partners?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
