Sorry kaayo kon ugaling may nakauna nag gamit ning maong ulohan. Isip usa ka manunulat nga maglisud pag resist og word play makagamit gyud ko niani. Ug gawas pa niana murag mao usab kini ang pinaka accurate nga pagtawag ning maong semana.
Niadtong Myerkules mitambong ako sa ducumentary nga “The Search of Weng Weng” didto sa CAFA theater sa University of San Carlos sa Talamban.
Surprisingly gaan ra ang traffic sa among pagpaingon didto gikan sa Ayala ug ingon man sa among pag paingon sa SM human sa maong pasundayag.
Ang kasagarang pangutana kabahin sa “The Search of Weng Weng” mao nga – kinahanglan ba gyud nga mga puti (Caucasian) ang makakita sa balor sa mga abilidad sa Pinoy? Daw mosulod sa atong ulo ang giingong “You cannot be a prophet in your own land.”
Pero sa di pa kita mo husgar sa atong kaugalingon isip usa ka katilingban angay natong mahibawoan nga ang director ug ang producer niani nga taga Australia nga sila ni Andrew Leavold ug Daniel Palisa puros mga cinephiles o mga tao nga nabuang ug naungo sa pelikula. Mao nga daghan silang makit-an nga mas lawom nga kahulugan sa atong mga sine kay sa kasagaran kanato nga mutan-aw lag sine para lingawlingaw.
Samtang active si Palisa sa mga film festival, si Leavold dunay paabangan og video (VHS). Silang duha puros nangita og mga hugyaw ug simang nga mga pelikula. Ug tungod niani naigking sila pagkakita nila sa dwende nga James Bond sa Pilipinas.
Dili lang ang novelty angle ang ilang nakit-an sa mga sine ni Weng Weng kon dili nga usa kini ka subversion sa mga paradigm sa western movies. Nabuang silag pila ka dekada og pangimbistigar kabahin ni Weng Weng, sa Philippine movies, sa socio-political situation sa Pilipinas.
Tungod niani namugna nila kining maong documentary diin nasudlan nila ang tanang bahin sa kinabuhi sa Pilipinas gikan kang Ernesto dela Cruz (real name ni Weng Weng) paingon ngadto kang Imelda paingon ngadto sa mga deboto sa Sto Niño. Miinon sila nga malagmit makakuhag booking sa mga sinehan ang ilang documentary karong Enero.
Niadtong Huwebes gisugdan sad pag pasalida sa Ayala Cinema 4 ang mga lilas nga Japanese isip pagsaulog sa Eiga Sai, ang tinuig nga Japanese film festival.
Ang “Homeland” pay akong nakit-an nga kabahin sa usa ka pamilya nga maguuma nga nanimuyo duol sa usa ka nucelar plant.
Kon duna kamoy higayon karong adlawa ug ugma, tan-awa ninyo kining mga nindut nga lilas gikan sa Japan nga walay bayad.
Ug kagahapon, adlaw nga Byernes, dihay press con ug launching sa Lilas Binisaya Film Festival nga usa ka competition sa short film nga Binisaya. Alang sa dugang kasayuran ning maong film festival mahimo kamong mo email sa [email protected].
Nagsugod na silag panawat og entries ug ang katapusang adlaw sa pagpanawat karong Octobre 15 karong tuiga. Hinapos sa Nobembre ang awarding.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
