“Remember when the circus came to town/ And you were frightened by the clown?”
—“You and Me Against the World” by Helen Reddy
Dinhay album ang Eraserheads nga gihinganlag “Circus.” Dihang nagpakisusi ko nganong mao kini title sa ilang album, dihay miingon kanako nga ang pulong nga “circus” maoy ipasulti sa maniniyot dayon niyag klik sa iyang camera. “Say circus,” maoy iyang litukon. Variation kini sa “say sex” ug sa “smile.”
Tingali may kalabotan sa porma sa imong baba inig litok mo sa pulong nga circus mao nga mao kini ipalitok sa maniniyot sa iyang mga subjects. Pero tingali may kalabotan usab kini sa atong mga fond memories sa mga circus nga atong nakit-an ug maong mas nindot ang atong smile inig litok nato sa maong pulong.
Kinsa man goy di malingaw og circus? Kinsa may di matandog sa circus? Labaw na kon ang imong gisud-ong mao ang pinakadako ug pinakakurat nga circus — ang politika?
Sa America, miabri ang ilang political circus dihang midagan ang hanggaw manulti nga bilyonaryo ug media celebrity nga si Donald Trump. Tungod sa iyang pagka sipat kanunay, mo-rate sa TV ang iyang tambungan nga debate.
Sa atong bugnong lugaynon, murag niabot na ang main act sa atong circus dihang gipahibaw ni Miriam Defensor Santiago ang iyang kandidatora sa pagka-presidente ning atong nasod ug nga si Bongbong Marcos maoy iyang bise presidente. Murag wala pay mas hugyaw nga tandem niani. Ang anak sa mipanaw nga diktador gihimong back up sa rayna sa “pick-up lines.”
Daw napapas ang pakurat sa Binay-Honasan tandem nga imbis mobuto, nahimo na hinuong hungaw nga utot. Pero dili pa kita luwas gikan kanila kay usahay baya may libintador nga gatuo kang kagar unya inig punit na nimo mobuto.
Ning maong circus, daw duna say cameo role (nga mao rag one liner) si Alan Peter Cayetano nga misibya sa iyang kaugalingon nga bise ni Duterte. Unya kay wa man mo-enter ang haring gangis sa Davao, daw nahimo intawng kwitis nga way tukog si Cayetano nga nagsalimoag kamang sa yuta imbis nga molupad.
Apan ikanaog natog gamay ang atong liog kay sa atong tugkaran mismo gahimog circus ang BO-PK ni Tomas Osmeña. Ang ilang partido gahimog David and Goliath, apan nianing tungora si Goliat (ang comedian nga si Alan Nacorda) maoy gamay ug ang higante mao ang 6’9″ ang gitas-on nga si Bonnel Balingit, komedyante ug kanhi basketbolista.
Well, sa Ininglis pa, “It’s never too late to learn.” Ug tuod man, karong tuiga nakat-on ra gyud si Tomas sa mga gimmick ni Annabelle Rama.
So, andam na mo? Ready, 1,2,3 – Circus!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
