Gerard Pareja
Independence Day karong adlawa. Maayong pagsaulog. Hinuon sa atong nakita sa Marawi diin dunay mga Amerikano nga mihatag og “technical assistance” sa atong military sa ilang pagsumpo ning Maute Group, makaingon kita nga dependent lang gihapon kita sa mga nasud nga matawag natug superpowers.
Ug dili lang sa pwersa kita dependent kanila. Tungod tingali kay katunga sa atong sinultian gikan man ning kusgan nga nasud mao daw nahigut usab ang katunga sa atong mga tinguha ug damgo sa ilahang mga gusto. Pwerti natong lingawa sa pelikulang Wonder Woman ug karon nanga ungo kitang tanan sa basketball. Kay lagi championship naman sad sa NBA.
Hinuon, bisag mga mugbo kita daw bagay man kayo ang basketball sa atong lugar.
Di man tingali muhatag og ispasyo para sa football o baseball ang mga haciendero sa ato.
Mao nga ang kasagaran sa mga bata magbutang na lag linging alambre sa punuan sa lubi ug mag basketball. Gawas pa daw, universal ang appeal sa basketball kay matud pa sa usa ka artikulo sa internet dunay 400 milyon sa tibuok kalibutan nga moduwa niani.
Wa pay labot sa mga coach potato nga ga sige lag sunod niani sa TV.
Panahon pa ni Abraham Lincoln gi-imbinto ang basketball. Dunay usa ka PE teacher nga gikan sa Canada nga mitrabaho sa YMCA sa Springfield, Massachusetts. Giingnan siya sa iyang boss nga pahimuon sports activity para sa mga namuyo sa YMCA sa winter.
Kinahanglan nga maduwa kini sulod lang sa gym (kay lagi ga snow man sa gawas) ug nga dili kini usa ka violent sport.
Ug maong nahimugso ang maong duwa niadtong Dec. 21, 1891. Ila unta kining hinganlan og Naissmith Ball agig pahinugod sa gahimo niani nga si James Naismith apan mi-demure ang inventor.
Gitawag na lang kinig basketball kay didto man sa gisang-at nga plastic nga bukag i-itsa ang bola.
Vertical ang setup sa bukag ni Naismith para accuracy ug dili strength maoy kinahanglan para maka score.
Dili palihukon ang player nga gada sa bola para walay mo tackle kaniya. Ang mabuhat ras gadas bola mao ang pag pasa ug pag shoot. Wala pay dribble ang unang basketball.
Matud pas laing manunulat sa internet nga kining vision ni Naismith sa iyang naimbintong sport gi-perfect karon sa Golden State Warriors nga pass and shoot maoy padagan sa ilang duwa ug wala kaayoy isolation play.
Ug tungod sa ilang pag perfect ning maong pamaagi daghan ang gatuo nga ila nang ma sweep o masilhig sa daplin sulod sa upat ka sagunson nga engkwentro ang ilang kontra nga Cleveland Cavaliers.
Apan naunsang pagka unsa-a nga daw nagdungan mag kagar ang mga shooter Golden State ug maong nabali ang silhig ug napildi sila sa mas pwersadong duwa sa ilang kontra.
Ugmang adlawa magtagbo na usab king duha ka team og mahibaw-an ta kon mag malapuson ba ang vision ni Naismith o malupig ba kini sa mga sakdapsakdap sa mga buot mag superhero.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
