Kay naghatag man siyag kasikas sa politikanhong kalihukan sa atong dakbayan di kita makalikay sa paghisgut ni Jun “way kulba” Alcover. Apan wa nato damha nga negatibo diay ang iyang pagdawat sa atong pasiaw. Ania ang iyang tubag sa atong lindog nga didto napatik sa usa ka facebook group:
“CDN p.2 karon nga issue…. Hahahaha..! Salamat bisan WALA ko kaila nimo, ug segurado gyud ko WALA sad Ka mobotar nako… Sa imong mga pasumbingay ug witik witik nako … Hahahaha..! Matud pa nimo usa ko sa mga demonyito ….. Ikaw ug Si Tomas Unsa man mo??? Hahahaha!! DEMONYO..!!! Hoy salins sa hulbot..! Balik tan aw ra Gud ( Ayaw ang malingin ug kwadrado nga katarungan unaha !)… Kinsa ang unang nanghasi???… Unang adlaw sa ilang Pag lingkod Unsa ilang gihimo…?? Gi order Dayon ang pagbawi sa tanang sakyanan apil na mga ambulance sa Kabukiran… Gi harassed ang mga kapitan ug mga Brgy. Employees pinaagi pag putol sa mga financial aid… Gi hulga ug apil ang kapulisan, kuhaan allowances, sakyanan ug mga armas… Mga Sr. Citizens gi daug daug .. Kami gikuhaan ug mga service cars ug WALA hatagi ug kwarto para amo opisina ..!!! Porbida nimo .. Pila gyud kaha??? Bahini me be…!!!??? Hahahaha… !! Salin gyud tuod Ka sa hulbot.. Hasta imo utok nahimong lapok..!!!” #1Junalcoverjr
Nasakit diay ka sa pulong nga demonyito. Nakuha man gud nato ni sa konsipto nga “whom the gods wish to destroy” nga misugyot nga dili kilat o baha o ubang mga dagkong katalagman ang gamiton sa kahitas-an pagtangtang sa mga naa sa poder nga wa na nila mauyuni. Ning maong konsipto ang mga gamay nga butang ang pahasion sa wa na nila maoyuni. Mao nga sa political stage sulod sa akong bagulbagol ikaw ang gamayng yawa nga gipada sa ginuo para paglubag sa tornilyo ni Tomas nga karon daw nahubog sa gahum. Unsa man diay imong gusto, usa ka superhero nga ang leggings gisapawan og brief? Na, duha namong Batman diris dakbayan. Di sad tika mahulagway isip anghel kay na pagkalain, manglimbawot man sad atong balhibo ana. Maayo nang demonyito kay cute apan halang.
Wala usab ka makabasa sa mga naunang lindog nga akong gibatbat ko ang hatag-bawi nga batasan ni Tomas. Sa lain usab nakong lindog mihisgut usab ako sa sayop niya nga cost cutting sa problema sa basura pinaagi sa pagabrig balik sa dumpsite sa Inayawan nga karon nanglisngaw na. Wa ka mobasa sa akong mga sinuwat kay wa ka man makaila nako. Dili man ko inila. Mao ganing ni suwat ko kabahin nimo para mosikat sad ko. Milasti lang kos imong abilidad.
Sa miaging piniliay mibutar kong Rama kay buot nakong tiwason niya ang iyang tulo ka termino. Wa ko mobutar nimo kay naa man kas norte unya taga salut man ko. Unya anti DU30 pud ka ug ako solid Digonger. Sorry nga wa ka mauyon sa akong bugalbugalong tuno. Apan mibukad akong atay nga mibasa diay kas akong sinuwat.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
