Porbida gyud ning ubang mga tawo nga nagsige nala’g panaway kang Presidente Duterte tungod sa iyang deklarasyon nga ubos kita karon sa “State Of National Emergency” human niadtong bombing sa Davao.
Unsa may gusto sa uban, mangyugpos na lang ug magpaka-inutil ang atong gobyerno batok niining mga salbahis nga mga terorista nga posibleng gibayran sa mga druglord?
Layo ra sa tinuod nga ideklarar ang martial law.
Gani sa tinuod lang ug with all due respect, wa ko matagbaw sa atong kapolisan ug kasundalohan sa ilang mga aksiyon ug mga pagpangandam batok sa mga terorista.
Kutob ra ba sila sa pagpakita sa mga lugar nga dugokan sa katawhan sama sa mga malls, pantalan, airport, merkado, simbahan ug sa ubang crowded places? Way body frisking?
Gani akong naobserbahan nga relax ra kaayo ang atong security. Dunay mga checkpoint pero ang mga mag-motor ra man ang ilang giestrikto.
Wa pa gani ko makakita nga dunay mga pulis sa atong mga simbahan.
Seryoso ko sa akong panawagan ngadto sa mga kadagkoan sa gobyerno ug sa simbahan nga ipakanselar ang mga dagkong kalihukan sa taliabot nga pasko ug bag-ong tuig ug ingon man ang kapistahan sa Black Nazarene ug ang Sinulog dinhi sa ato ilabina kung duna nay mga series of bombings.
Kay sa tinuod lang dili intawon mga super hero kining atong mga otoridad. Gawas niini gamay ra kaayo ang atong mga tinugyanan.
Lutsan man gani sa mga terorista ang America, kita pa kaha nga nangatulog ang atong mga intelligence personnel.
* * *
Subo nga palandungon kay samtang duol na ang among selebrasyon sa Cebu Press Freedom Week apan ang among mga kauban sa TV-5 Cebu gipaundang na sa ilang top management pagladlad og mga Cebuano news.
In fairness hinuon dunay offer ang management for early retirement sa tanang mga kawani nga maapektuhan.
Pero nindot gyud unta nga magpabilin ang ilang local news cast aron magpadayon ang ilang employment nga maoy gisaligan sa ilang tagsa-tagsa ka pamilya.
Laing subo nga balita mao ang kaso ni Norman Mendoza, among kauban dinhi sa CDN ug DYSS, nga gihulga ni SPO2 Esnang Sarapuddin sa Lapu-Lapu City Police.
Kagahapon si Norman mitug-an kanamo nga dunay mga death threats nga iyang nadawat pinaagi sa text ug ang katapusan nagkanayon nga “condolence.”
Kung dunay dautang mahitabo ni Norman ug sa iyang pamilya, way laing mabasol, kini ra si SPO2 Sarapuddin.
* * *
Karong Domingo sa buntag Setyembre 18, subhan na sab namo’ng mga sakop sa prensa pinaagi sa parade ang among selebrasyon sa Cebu Press Freedom Week.
Simple ra gyud ang mensahe nga among ipaabot sa gobyerno ug sa tanang mga stake holders nga dili kami gawngan ug hatagan kami sa tinud-anay nga kagawasan sa pagsuwat ug pagpanibya.
Tipik ug kabahin sa among kalihokan mao ang volleyball game nga nasugdan namo niadtong Sabado ug gitapos ang elimination round diha sa Cebu Eastern College (CEC).
Karong Sabado mao na ang championship nga ang magbangga mao ang mga tigbalita sa Police and Military Beat ug ang mga tigbalita nga nag-cover sa Cebu City Hall.
Samtang ang mag-away alang sa third place mao ang among grupo sa Justice and Capitol Beat versus sa mga nag-cover diha sa Mandaue-Lapu-Lapu-Talisay ug sa Regional Beat.
Magpasalamat kaayo mi’g dako sa management sa CEC ilabina nila ni Sirs Jefferson Go, Sammy Sia ug John Maraat nga gipagamit intawon mi sa ilang mga facilities diha sa CEC sa 2016 Cebu Press Freedom Volleyball Tournament.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
