Nakurat ang Literati dihang ang miguwang manaug sa Nobel Prize for Literature mao ang singer-songwriter ug 60s counter-culture icon nga si Bob Dylan.
Natawo si Dylan isip Robert Allen Zimmerman sa St. Mary’s Hospital sa Duluth Minnesota niadtong Mayo 24, 1941. Usa sa hinungdan nga gigamit niya ang alias nga Bob Dylan mao ang iyang pagdayeg sa mga balak ni Dylan Thomas.
Dihang nisikat na siya, mihimo siyag usa ka pilgrimage ngadto sa pinuy-anan sa laing ngilngig nga magbabalak nga si Robert Graves. Iya untang pangayuan og opinion si Graves kabahin sa iyang mga sinulat, apan wa siya matagad niani. Maong nagkanayon siyag -Son of a bitch that Graves, he is only interested in his own writings.
Tungod sa iyang gugma sa balak daghang mga beat poets ang iyang nahigala. Usa niani mao si Allen Ginsberg.
Rock n’ roll ang birada ni Dylan sa high school ug college pa siya apan na pul-an siya niani kay alang kaniya mabaw ra ang lyrics niani. Ug tungod niani nisulod siya sa folk circuit.
“The thing about rock n’ roll is that for me anyway it wasn’t enough… There were great catch-phrases and driving pulse rhythms… but the songs weren’t serious or didn’t reflect life in a realistic way. I knew that when I got into folk music, it was more of a serious type of thing. The songs are filled with more despair, more sadness, more triumph, more faith in the supernatural, much deeper feelings.” Nagkanayon ang batan-ong Dylan.
Ang kang Dylan nga “Blowin’ In The Wind” ug “The Times They Are A’ Changin’” nahimong civil rights ug anti-war anthems sa 60s. Samtang ang iyang “Like A Rolling Stone” maoy mimugna sa genre nga folk rock. Tungod tingali kay electric guitar nay gigamit ni Dylan niani.
Duha ka rason nganong miriklamo ang ubang mga manunulat ug kritiko sa paghatag sa Nobel sa primyo sa literature ngadto ni Dylan. Alang sa uban dili angay itandi ang songwriter sa mga “seryusong” manunulat.
Alang sab sa uban nga dili angay tagaan og Nobel Prize si Dylan kay inila ug nagmalampuson na kini sa iyang gipanghimo. Ang angay unta nga hatagan niani mao ang mga wala pa mailhi para makatabang ang maong award pagpaila kanila sa mga magbabasa.
Alang sa taga Nobel, ilang gihatag kang Dylan ang premyo tungod sa iyang “…having created new poetic expressions within the great American song tradition.”
Ug unsay reaction ni Dylan niani? Kiber.
“How many times must the canon balls fly,” kanta pa niya, “before they are forever banned.” Usa sa rason naghimog Nobel Prize si Alfred Nobel kay na guilty siya sa iyang pagimbintog dinamita.
Ang ubang taga Nobel mitawag na ni Dylan og way batasan kay wa siya motubag sa ilang pagkontak kaniya. Agig tubag nianing maong pamuyboy gitangtang nuon ni Dylan ang text sa iyang website nga miingong siya ang Nobel Prize Winner for Literature karong tuiga.
Dihang giimbitar si Dylan ni Obama sa White House, miadto kini, mikantag usa ka kanta dayon nanaug para molamano kang Obama, mipahiyum dayon mipauli. Nahimuot si Obama niani kay alang kaniya dili na unya ma Bob Dylan si Dylan nakig party pa kinis mga bisita sa White House.
Bugalbugal pa ni Louis-Ferdinand Celine sa Nobel: “Every Vaseline-ass in Europe has one. Where’s mine?”
Dili tingali buot maapil sa mga Vaseline-ass si Dylan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
