‘Security nightmare ang Pasko, New Year ug Sinulog’

Lahap ra kaayo’g dila ning ubang mga tawo nga mang-akusar nga binuhatan sa Duterte administration ang pagtanom og bomba duol sa US Embassy aron gamitong basihanan sa pag-suspenso sa privilege sa writ of habeas corpus ug pagdeklarar sa martial law.

Abir karon anaa naman gyud kining duha ka mga dinakpan nga nangangkon sa krimen ug mga miembro sa terrorist group nga Ansar Al-Khilafa in the Philippines (AKP) unya kining maong grupo nakig-alyado sa international terrorist nga Islamic State (IS), drama gihapon ni sa gobyerno?

Kadtong bombing sa Davao nga daghang namatay, apil gihapon to sa drama kung sakyan ta ni’ng utok sa ubang matahapon sa Duterte government?

Bisan gipa-ubos ang tibuuk nasud sa terror alert level 3 ni PNP Director General Ronald “Bato” dela Rosa, dili gihapon kini basihanan pagdeklarar og martial law ug wa sab kini sa plano sa presidente.

Sa tinuud lang nabalaka gyud ko niining panahuna nga daghan na kitag mga kalihukan kay duol na ang Pasko, pagsugat sa New Year ug sa Sinulog dinhi sa ato.

Maglaum ko nga igmat atong kapolisan ug dili malutsan ang atong intelligence community sa mga terorista.

* * *

Tabanganan gyud kay puwerte’ng paeta sa Pasko sa 602 ka mga pamilya nga biktima sa daku’ng sunog niadtong Huwebes sa gabii sa Duljo Fatima nga milamoy sa 531 ka panimay.

Haskang dimalasa gyud nila kay inay magsadya niining panahon sa Pasko apan kaguol maoy mipatigbabaw kay na-abo ang ilang gipangpondar sulod sa taas nga katuigan.

Ang kalisud sa atong mga fire volunteers pagpawong sa daku’ng sunog way kalainan sa ubang mga lugar dinhi sa siudad nga thickly populated area nga gagmay kaayo ang mga agianan.

Kinsay dili ma-inutil nga fire fighter sa sitwasyon nga ang agi-anan usa ra ka tawo ang maka-agi.

Ang sulbad diha mao gyud ang pag-reblock sa lugar.

Kanus-a man tuod mopatuman ang gobyerno og reblocking sa ubang mga lugar nga baga sab kaayo sa mga panimay? Unya na matag human sa sunog?

Ang pangutana kung i-reblock sa gobyerno sa wa pay sunog, unsa man sab ka andam ang mga tag-iya nga mosakripisyo nga gani naglumba man sa pagpamintaha nga modaku ilang lugar?

* * *

Pananglitan mosanong si Busay Barangay Captain Amilo Lopez sa hagit ni Cebu City Mayor Tomas Osmeña nga magpakuha og hair sample alang sa laing drug test, unsa may condition kung ma-positive o ma negative?

Kung ma-negative ang resulta nga magmatuod nga dili tiggamitan sa illegal drugs si kapitan Lopez, andam mo resign si Osmeña pagka-mayor?

Unya kung positive, si kapitan Lopez mo-resign?

In fairness kang kapitan Lopez insakto na kaayo nga na-negative siya sa confirmatory test.

Ang isyu karon mao ang kaulaw ni kapitan Lopez ug sa iyang pamilya nga gitribukar og sayo nga nag-positive siya sa surprise drug test niadtong buwan sa October nga klarong kalapasan sa rule on confidentiality.

Apan ang pangutana kung kinsay responsable sa premature disclosure.

Si Dr. Alice Utlang nga maoy head sa Cebu Office for Substance Abuse Prevention (COSAP) miklaro sa akong interview nga way rason nga motuman siya sa hagit ni kapitan Lopez nga mo-resign ug mag-public apology kay dili siya maoy responsable sa pagpagawas sa pangan sa kapitan.

Niadtong Sabado nagkita mi ni Busay Councilor Yody Sanchez ug nagkanayon nga seryoso gyud si kapitan Lopez nga mokihag moral damages batok nilang Osmeña ug Dr. Utlang.

Unya patangtangan sab sa lisensiya si Dr. Utlang.

Nanawagan si Dr. Utlang sa kampo sa Team Rama nga unta undangon na ang pamolitika.

Miklaro usab si Dr. Utlang nga way malisya ang kalangay pag-release sa resulta sa confirmatory test kay bag-o pa sab siya nakadawat og kopya sa resulta.