Bahag sab diay ang ikog ni PO3 Fulmaran

Ambot lang kun tinuod ba ang giingong hulga nga nadawat niadtong abusadong pulis nga si PO3 Brent Fulmaran nga gipaagi sa Facebook.
Dili ko konbinsido sa giingong death threats nga nadawat ni Fulmaran kay possible nga gihimo-himo lang sa kanahan aron makasimpatiya niya ang ubang mga tawo sa isyu nga iyang giatubang karon.

Pero granting nga tinuod ni, karon pa ko nakadungog nga mobahag sab diay ang ikog niining abusadong pulis kay gipa-blotter niya ang pagpanghulga.
Sa entry sa blotter nagkanayon nga “Brod, huwaton namo imo public apology sa imo gibuhat sa taxi driver, adto ka sa GMA or kami mangita nimo. Ayaw ni baliwa-a, seryoso amo grupo.”
In fairness ni PO3 Fulmaran, nangayo na siya og pasaylo sa iyang nahimong kalapasan sa among security protocol sa GMA Complex dihang akong na-interview nga dalang pangasaba niadtong Enero 14.

Nikurog ang pulis sa panghulga kay giubanan sa mga picture sa .45 pistol, kandila ug dugo?
Kung tinuod man, dili pa kini mao sa iyang pagpusas ug pagpriso sa driver sa Downey taxi nga si Ariel Birao nga wa gyuy intensiyon paglangay-langay pag-uli sa cellular phone sa iyang pasahero nga Arabo.

Ang klarong hinungdan nga nasuko ning pulisa sa driver kay wa mosugot ang driver nga adto niya i-turn-over ang butang. Way salig ang driver sa pulis.
Ang driver posible nga makahigayon na pag-execute og affidavit sa Commission on Human Rights (CHR) sud ning semana aron ma-disiplina si PO3 Fulmaran.
* * *
Pagka-kuyaw na gyud karon sa atong mga buhatan sa gobyerno kay nakasulod na ang mga druglord.
Karong bag-o usa ka field inspector sa Office of the Building Official sa dakbayan sa Naga, Cebu ang nadakpan nilang National Bureau of Investigation Supervising Agent Renan Oliva uban sa laing tulo ka mga personalidad.

Ang mga nadakpan didto sa usa ka drug den sa Langtad, Naga mao sila si Ricardo Cantillas, trabahante sa City Hall, Zosimo Abaguita, Ariel Sarusal ug Arnette Sarusal.
Subo na kaayo ning palandungon nga dunay mga opisyal sa gobyerno ang malambigit sa pagpamaligya og shabu.
Wa sab gyud ko makasabot karon sa Philippine Drug Enforcement Agency (PDEA) kay sila maoy gitugyanan pagpuhag niining mga druglord apan akong tan-aw wa gyud silay dagkong isda nga nadakpan.

Wa matingal ning taga PDEA sa mga druglord ?
* * *
Unsa katinuod nga kadtong mga payong sulod sa Basilica Minore Del Sto Niño gipa-abangan sa mga manimbahay og tag P25?
Gi-commercial sa taga-Simbahan ang payong? Kinsa may nagpasi-ugda niadto?

Didto sab sa Cebu Metropolitan Cathedral gi-negosyo sab ang parking area.
Sa akong experience niadtong Sabado sa hapon nga paingon ko nga nag-cover sa Basilica sa solemn foot procession pwerte gyung pangita nako og ka parkingan sa motor.

Miatras ko sa presyo sa Cathedral kay tiaw muna, tag P30 per hour. Libre man tuod ang unang one hour and a half pero ari ka patyon sa succeeding hours.Akong kuwenta-kuwenta mogasto ko og sobra P200 pesos kay gikan sa alan-1 sa hapon hangtud sa alas-9 sa gabii.

Mao nga didto na lang ko dagan sa WDC building nga duol ra kaayo sa basilica kay gawas nga sayon rang malili, duna sab tay sakop sa pamilya nga trabahante didto.
Gawas niini, daghan sab ang nangreklamo sa ka estrikto sa basilica kay wa ipagamit ang CR duol sa altar sa pilgrim center sa mga tawo.

Ang nahitabo didto sa common nga CR misanong sa sugo sa lawas nga pwerte na gyung layoa.

Maglaum ko nga tun-an sa mga kadagkoan kining mga reklamo unsaon pagsulbad ilabina sunod tuig nga dako na ang atong kalihokan.

Hisgot ta og crowd control sa bisan asang lugar ilabina sa parade route medyo problema gyud kay kuwang kaayo sa mga kadete sukad nga dili na compulsory ang Reserve Officers’Training Corps.

Naluya sab ang mga kadete/estudyante kay way mga kaon.
Kun may budget ta sunod tuig, maayo tingali nga pakan-on ang mga tinun-an nga maghago sa ilang serbisyo sa Sinulog.
Unya kinahanglang way klase ug way trabaho inig ka Lunes kay kapoy kaayo ang tanan, Mayor Mike Rama ug Department of Education Director Carmelita Dulangon.Misuspenso man gani ta sa mga klase ug trabaho bisan wa nay kabalak-an niadtong linog, kini na ba hinuon nga iya ni Señor Sto Niño.

Kun gipangkapoy ang mga sakop sa dancing contingents, labaw nang lapoy ang mga nagtan-aw nga biktima sa duot-duot ug mag-antos sa binarugay.
Akong nahibaw-an nga nagklase man tuod apan way pulos kay wa masulod sa utok ang leksyon kay gipangkapoy ang tanan apil na si ma’am ug si sir.
* * *
Way kawatan nga moangkon. Di madala sa hilak-hilak ug inartista ang kasong plunder batok nilang Sen. Ramon “Bong” Revilla Jr, Sen. Juan Ponce Enrile, Sen. Jose Estrada ug uban pa nga mikonsabo kang Janet Lim-Napoles sa P10 billion pork barrel fund scam.

Adto na lang si Bong modepensa sa husgado.

Sa depensa ni Bong Revilla sa iyang privileged speech siya nagkanayon, nga dili tinuod nga siya miangkon sa mga balita bahin sa mga pirma sa mga dokumento.Iyang giakusahan ang whistle-blower nga si Benhur Luy nga maoy misundog sa iyang mga pirma.

Unsa may buot ipasabot ni Bong, nga si Luy maoy mipirma sa iyang ngan sa mga supporting documents? Nagpalig-on ba kini nga may kasayoran ang senador sa kabuang ug nakigkonsabo iyang opisina human dako sab ang iyang bahin?

Alang nako, dili isyu ang pasangil ni Bong ngadto kang Presidente Noynoy Aquino nga miimpluwensiya nilang mga senador pagpa-impeach kang kanhi Supreme Court Chief Justice Renato Corona.

Ang isyu mao, kana kun nagpa-impluwensiya siya sa Presidente ug midawat siya og suburno niadtong iyang pagbotar pag-impeach ni Corona.