‘Batasan sa atong mga politiko layo ra sa USA’

By: Lloyd Suarez January 22,2017 - 08:10 PM

Lloyd Suarez

Sayo pa kaayong hukman nga mga drug protector sila si Ermita Barangay Captain Felicisimo “Imok” Rupinta bisan pa man nga pahamtangan sila’g “six months preventive suspension without pay” sa Visayas Ombudsman tungod sa wa pag-ayuda sa taga PDEA sa gihimong pagpangronda.

Kini tungod kay pakyas gihapon si Presidente Duterte pagbutyag sa mga pangan sa mga barangay officials ug ubang mga elected public officials sa baga niyang listahan nga gitawag og narco list.

Nahibaw-an sa pipila ka mga gobernador niadtong pakig-dialogue sa presidente nga daghang mga kapitan dinhi sa Sugbo ang naapil sa listahan.
Pero ambot kung apil ba si Rupenta? Si Rupenta sakop sa Team Rama unya ang kanhi mayor nga si Michael Lopez Rama una nang gibutyag nga drug protector.

Niadtong Biyernes sila si Rupenta ug mga konsehales pulos miklaro nga dili sila mga drug protector ug mipasabot nga wa sila matug sa kampanya kay dunay 83 ka mga kaso parte’g illegal drugs nga sila maoy nangunay pagpanakop nga way abag sa mga otoridad.

Sa kiha ni PDEA-7 Director Yogi Filemon Ruiz batok nilang Rupinta sa kasong grave misconduct, gross neglect of duty and conduct prejudicial to the best interest of the service mideklarar nga wa gyu’y bisan usa ka opisyal sa Ermita ang mitabang kanila ug misaksi sa physical inventory sa ronda niadtong November 6, 2016 sa Sitio Bato batok nilang Richard Cañete nga alyas Tata Cañete ug alyas Opao ug kang Josephine Cuyno alyas Josephine Cañete ug alyas Nanay.

Ilang abogado nga si Atty. Paul Gino Lopez nagkanayon nga ingkaso way reconsideration ang Ombudsman ilang kuwestiyonon ngadto sa Court of Appeals kay di gyud maki-angayon.

Akong tan-aw niining desisyon sa Ombudsman, matuis pay buko sa kawayan ilabina nga mi-abot sa ponto ang pagpang-akusar ni Rupenta nga nagamit sa pamulitika ang Ombudsman ug ang taga PDEA.

* * *

Sa akong basa sa mga pamahayag ni Presidente Duterte dili man gyud siya ganahan nga modeklarar og martial law.

Ang iyaha mao nga kung gikinahanglang modeklarar, ipa-ubos niya ang nasud sa martial law kung mahitabo man nga dunay mga kagubot sama sa pagpamomba aron ka-protihi-an ang katawhan.

Dili intawon buringog ang presidente nga modeklarar gumikan sa iyang kampanya sa illegal drugs kay wa kini maapil sa konstitusyon nga basihanan.
Apan kung makig-alyado ang mga drug lord ngadto sa mga terorista sa pagpamomba aron gubuton kita, makarason gyud ang presidente pagdeklarar.
Di sab ko motoo sa ponto nga ang gobyerno maoy maghimog mga scenario sa kagubot aron lang gamitong rason.

Kinsa man ang labing alkanse sa panahon nga mag martial law? Kita’ng mga tarong ug law abiding citizens o di ba kaha ang mga nalambigit sa drugas?

* * *
Akoy naulaw sa makasaysayanong paglingkod ni 45th US President Donald Trump niadtong Sabado oras dinhi sa Pilipinas human mitambong ang iyang gipilde nga si Hillary Clinton ug ang bana nga si former US President Bill Clinton.

Dinhi sa ato, nahitabo ba kini ilabina niadtong pagpanumpa ni Presidente Duterte? Wa ko kakita nilang Mar Roxas, Jejomar Binay, Grace Poe ug late Senator Miriam Defensor Santiago.

Kini maoy timailhan nga ang mga Amerkano mga politically matured na. Sukwahi sa atong mga politiko nga kada adlaw anaa pa ang mga kaligotgot sa resulta sa pulitika.

Gahi kaayong manawat sa kapildihan. Ambot unsa gyud ning batasan sa atong mga politiko?

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: Donald Trump, Ermita Barangay Captain Felicisimo "Imok" Rupinta, Philippines, USA

We use cookies to ensure you get the best experience on our website. By continuing, you are agreeing to our use of cookies. To find out more, please click this link.