Sobra ra sab ka demanding ang mga rebelde’ng CPP-NPA ngadto sa Duterte administration.
Ang imposible nilang demand nga pabuhian ang 400 kapin ka mga political detainees nga may kasong pagpatay nga sama sa ubang ordinaryong piniriso, makapadismaya sa hanay sa kasundalohan ug posible pa nga makamugna’g kudeta.
Nagpakita lang kini nga di sila sinsiro aron makabaton kita sa hingpit nga kalinaw ug nagpasabot nga wa gyu’y kapaingnan kining on-going peace talks nga gi-initiate sa gobyerno.
Ngan nga nagrebelde ni sila, pakig-alkontra kanunay sa kagamhanan ang ilang papel bisag kinsay magdumala sa Malacañang.
Ang ako lang sab ngadto sa Duterte government mao nga apilon sab sa internal cleansing ang Armed Forces of the Philippines (AFP) gawas sa PNP ug NBI kay sa tinuod lang, kining mga counter-insurgency operation ug opensiba sa militar gihimo kining gatasan sa mga kadagkuan sa AFP kaniadto.
Giabusohan usab kini sa mga sundalo. Puwera lang niadtong mga nagtinarong.
Kung gusto man gyud kitag gubat nga dako kaayog budget, segurohon gyud nato nga way corruption sa mga bala ug mga armas ug mahingpit ang pagpapas sa mga rebelde, terorista, criminal ug mga durugista aron kalambuan ug kalinaw na maoy mopatigbabaw sa mga mosunod nga henerasyon.
Makapanglingo-lingo naman lang gud ko kay gubat-gubat o pusil-pusil ra ang mahitabo usahay.
* * *
Makapanlimbawot gyud kung tinuod man ang duha ka mga panghitabo sa miaging simana dinhi sa Sugbo.
Una, ang giingong pagsayaw sa imahin ni Senior Sto. Niño didto sa Candulawan, Talisay ug, ang ikaduha, mao ang giingon nga nasudlan sa dautang espirito ang 20 kapin ka mga tinun-an sa Saint Anthony Academy didto sa Tuburan human nga nagpakita ang usa ka black lady nga naglupad ug ang white lady nga mikalit pagpakita sa bintaha sa mga tinun-an.
Didto sa Candulawan, padayong gihugpaan sa katawhan. Pagkanindot gyud kung nagmilagro si Senior Sto. Niño.
Apan natinga ko niining mga tinun-an sa Tuburan kay mga madre baya ang nagdumala diha.
Wa gyud madala sa ilang mga pangaliya ngadto sa Ginoo nga ilikay sila sa mga dautang espirito?
Pero sa laing bahin, dili kaha mga drug users ang mga tinun-an nga nagpasulabi ang ilang hallucination?
* * *
Kidnapping ba gyud? Kidnap me scenario? O patagam lang ang nahitabo kang medical intern Julian Iñaki Larrazabal Garcia, kinsa apo ni Dr. Potenciano Larrazabal, ta-iya sa Cebu Doctor’s University Hospital, niadtong Sabado sa buntag?
Hangtod sa pagsuwat ning akong lindog, naglibog pa ang kapolisan kung unsay motibo sa upat ka mga lalaki nga gitohuang mi-pick up sa biktima.
Di katohoan nga siya gikidnap kay wa mangayo og ransom money ang mga abductors nga wa ilhi sa medical intern kay gisampungan iyang mga mata.
Kung kutob lang sa pagpatagam ang gihimo sa mga abductors, unsa may sala sa biktima?
Dili kaha ni entra-pamilya nga away?
O ba kaha dunay grupo karon nga gusto lang gyud i-establisar nga maayo lang sa practice ang atong kapolisan.
Kung practice o simulation, sulbad dayon. Pero kung actual na, inutil ang PNP.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
