Hingpit na atong kagawasan kay isog atong presidente?

Pagkadali ra g’yud sa panahon kay samtang atong gisaulog karong adlawa ang ika 119th Philippine Independence Day, karon sang adlawa maoy ika 19 na ka tuig sa pagkahimugso ning akong lindog nga “Super Hirit” dinhi sa Cebu Daily News (CDN).

Lab-as pa g’yud sa akong panumduman ang pinaka-unang gawas sa akong publication niadtong June 12, 1998 kay nagsaulog kita sa centennial celebration pag-angkon sa atong kaugalingnan niadtong tungura.

Sila si Ma’am Eileen Mangubat ug si Ma’am Thea Riñen maoy naka-aghat nako sa pagpasuwat.

Sa sinugdanan wa ko makatoo nga ila ko’ng pasuwaton og binisaya nga column ngan nga bag-o pa intawon ko sa industriya niadtong higayuna ug wa pay hanaw sa pagsuwat.

Gipa-submit ko nila og duha ka sample nga write-ups. Ambot asa nato ron.

Taliwa sa akong pagkabakikaw, gi-antos intawon nilang Ma’am Eileen ug Ma’am Thea nga pasuwaton g’yud ko. Mao nga ang akong unang publication nagsentro sa katam-is sa pag-angkon nato og kagawasan.

Salamat nila ni Ma’am Eileen, Ma’am Thea ug sa kinatibuk-ang management sa Cebu Daily News ug sa Inquirer Publications Inc. kay hangtud karon nagpabilin kining akong lindog uban sa mga pinobre nakong opinion.

Laing butang sa akong pagpasalamat dinhi sa CDN, mao nga wa g’yud intawon ko gawngi sa akong mga baruganan sa mga isyu ug sa mga topic nga akong gitribukar.

Kumusta naman tuod kita karon, deadma ug walang paki sa celebration sa Independence Day? Kutob ra sa paghandom ug pag-selebrar sa nakab-ot natong kagawasan pinaagi sa pagpakaylap sa atong bandila?

Hingpit naba g’yud natong naangkon ang kagawasan tungod kay si Presidente Duterte di g’yud magpadiktar sa America ug European Union sa iyang mga palisiya pagsulbad sa problema sa illegal drugs, terrorism ug uban pa?

Nakuha ba g’yud nato ang kagawasan niining urong-sulong sa Duterte administration pagbawi sa West Philippine Sea gikan sa China?

* * *

Bisan kung akoy anaa sa sitwasyon ni Police Regional Office (PRO-7) Director Noli Taliño dili g’yud nako pabuhi-an si Bohol Board Member Niño Rey Boniel ug iyang driver nga si Randel Lupas bisag i-cite for contempt of court ni Tubigon RTC Judge Marivic Trabajo-Daray.

With all due respect, lalisonon pa man kung milapas ba sa 36 hours reglementary period ang mga pulis pagkiha sa piskaliya batok nilang Boniel.

Haskang inutila kaha sa kapolisan kung tumanon ang mando sa huwes nga buhi-an unya sa panahon nga may warrant of arrest na dili na madakpan ug makasibat na si kagawad Boniel sa kasong pag-kidnap, pagpatay ug pagtambog sa dagat sa iyang asawa nga si Bien Unido Bohol Mayor Gisela Boniel.

Kining tanan depende ra g’yud sa mga maayong abogado sa kapolisan nga makonbinse ang huwes nga nagpatuyang lang sa pagtumo-tumo ang abogado nilang Boniel.

Buhian g’yud? Maayo man gani nang isunod didto sa ilawom sa Caubian Island sa Lapu-Lapu.

Pagkatig-a sab og kasing-kasing sa atong husgado. Maka-ako sa pagpagawas sa prisohan sa bana’ng akusado samtang nagkamulo pa ang taga gobyerno pagpangita sa patay’ng lawas.

Mao pa gani pagsugod sa kaso apan nakit-an na ang pattern sa inhustisya. Pastilan baja!

TAGS: