Suarez
Nganong dili naman lang hutdon pagpatay kining mga drug lord ilabina ang mga nangapriso sa New Bilibid Prison aron sulbad ning atong problema sa illegal drugs?
Kung ang tanang drugas gikan didto sa Muntinlupa, wa nay rason nga hatagan pag lugway ang kinabuhi ning mga kanahan nga maoy nagdalag dangan.
Paeta g’yud kay hangtud karon daghan pa kaayong dagkung krimen nga binuhatan sa mga adik sama sa Bulacan massacre nga lima ka mga miembro sa pamilya ang gipangpatay ug gitoho-ang gipang-rape ang mga babaye’ng biktima.
Karon puwera buyag gihinay-hinay na pagpatay ang mga nalambigit sa krimen kay akong nasabtan nga kapoy na nga ipaagi pa sa korte ang tanan unya langay ang pagkab-ot sa hustisya.
Dinhi sa ato sa Sugbo, nagpabilin ang negosyo sa droga nga maoy hinungdan sa pagronda ug pagkasikop sa tulo (3) ka mga municipal councilor sa San Fernando nga giingong mga sakop ni drug lord Franz Sabalones niadtong Biyernes nga sila si konsehal Johny Arrisgado, konsehal Edwin Villaver ug konsehal Alfonso Donaire .
Ang kapitan sab sa Malabago, Badian, nadakpan sa pagkupot og mga shabu nga mobalor sa dul-an duha ( 2) ka milyon ug ingon man ang usa ka konsehal sa barangay sa Tuburan.
Wa nako matinga sa depensa sa pagpamakak niining mga opisyales sa gobyerno nga nakuhaan og drugas. Duna bay kawatan nga moangkon?
Hilasan lang ko ni kapitan Epifania Divinagracia Alvizo sa Badian nga miingon nga saksi ang Diyos nga wa g’yud siya malambigit sa drugas. Abir asa man siya’g minilyon sa iyang mga bank accounts?
Otros sab si Municipal Councilor Alfonso Donaire sa San Fernando nga namasangil nga biktima siya sa pamulitika ug planted ang mga shabu. Pulitika sa iyang kagaral!
* * *
Niadtong Sabado sa hapon sa akong radio program nga “Dialogue On The Air” sa DYSS Super Radyo among gituki ang Katarungang Pambarangay o Barangay Justice System ug ingon man ang court mediation.
Duha ka mga ponto nako nganong kinahanglang palapdan ug palig-onon pa kining maong programa.
Una, tungod kini sa kadaghan na’ng mga na-file nga mga kaso sa korte karong panahuna ilabina ang kabahin sa illegal drugs nga dili na g’yud kaya sa atong mga huwes pag-resolbar.
Ikaduhang rason tungod sa nahitabong pagpusil-patay sa OIC Election Officer sa Barili nga si Cresente Hedralin Sasil Flores nga ang hinungdan simpleng away silingan.
Kung na-refer pa seguro sa mediation ang kasong grave threats ug kasong oral defamation unya maayong pagkadala sa mediator ug gipa-ubos ang tanang garbo posibleng way dugo nga nibanaw.
Segurado ko nga dili sab unta magmahay ang akusado nga natanggong na karon sa kasong murder nga si Mario Eleccion Timagos alyas Gilmar.
Porbida g’yud ning garbo sa tawo.
Sa akong radio program, ang akong mga bisita nga expert sa mediation dunay kanya-kanya nga diskarte aron g’yud ma-settle ang kaso sa ilang level.
Mao nga magpasalamat ko nila ni Cebu City ABC Federation President Philip Zafra, court mediator Alvin Redido ug mga opisyales sa Liga Ng Lupong Tagapamayapa nga sila sa Emily Malto sa Apas, Nelson Tantano ug Greg Libron sa Basak San Nicolas, Roberto Medina sa Hipodromo ug akong kauban kaniadto sa A.B. Political Science sa USJ-R nga si Oliver Gallardo sa Barangay Guadalupe.
Maglaum ko nga tabangan g’yud sa atong mga kadagkuan ang atong mga Lupon member ug mga court mediator kay daku kaayo silag papel pag-dispatsar sa mga kaso nga way mausik nga kuwarta, panahon ug kahago.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
