Nakatawa na lang ko sa reaction sa mga opisyales sa gobyerno ilabina sa taga–Commission on Human Rights (CHR) sa “harmless” nga kampanya batok sa illegal drugs pinaagi sa pagspray-paint (pagpintal) ni Barangay Captain Junard Ahong Chan sa mga panimalay diha sa Barangay Pajo dakbayan sa Lapu-Lapu nga gihimong drug den o suyopanan.
“Harmless” ang akong gigamit nga termino sa shame campaign ni Kapitan Chan kay gani kini maoy labing binayot nga matang sa kampanya.
Layo ra kini sa mga sugyot sa katawhan nga ang gobyerno maghimog shabu nga may isagol nga makahilo aron impas dayon ang ang mga adik.
Wa ra sab kini sa kumingking nga ipatuman ang pagpatay sa mga durugista pinaagi sa summary execution ug extrajudicial killings.
Mas huyang ra sab kining kampanya ni Kapitan Chan nga ipabalhug na lang ang mga nalambigit sa illegal nga drugas.
Si Kapitan Chan niadtong Sabado miklaro sa among programa’ng “Dialogue On The Air” sa dySS Super Radyo nga dili intawon shame campaign o pagpakaulaw ang iyang gihimo sa mga nalambigit sa illegal drugs kun dili usa kini ka prevention.
Buot ipasabot nga aron mapugngan sa paggamit sa illegal drugs ang mga mamarukay,
With all due respect, overacting bitaw kaayo ang taga-CHR ug ubang mga personalidad nga nagsupak niining pagpamintal sa mga panimay ni Kapitan Chan.
Way kalainan ang kampanya ni Kapitan Chan sa gilusad ni Association of Barangay Councils Cebu City (ABC) Federation President Philip Zafra nga positive approach nga markahan og “drug free” kadtong mga panimay nga way bisan usa ka miembro sa pamilya ang naggamitan o nalambigit sa illegal drugs.
Buot ipasabot kadtong dili markahan tabla ra gihapon nga pakaulawan.
Kang Zafra ginindot lang ang termino pagmarka. Ang iyang imarka mao ang “Drug Free House, Barkada Ta Bai” Ang BARKDA nagpasabot nga
Barangay Advocates for Rehabilitation and Knockout approach Against Drug abuse and Addiction.
Samtang kang Kapitan Chan gimarkahan niya og “Identified Drug Den Area” ang tulo ka panimay.
Pero kini ba gyud ang mga pinaka-epektibo nga krusada? Wa kaha mangatawa ang mga sindikato sa illegal drugs niining harmless nga kampanya?
Unsa kaha kung mohimog shabu nga may hilo ang atong mga tarong nga chemists aron makita’ng katag?
* * *
Posible baya nga ang sunod-sunod nga pagpatay sa mga minor de edad nilang Kian Loyd delos Santos ug Carl Angelo Arnaiz binuhatan sa sindikato sa drugas uban sa pakigkonsabo sa mga narco politicians aron palagoton ug mo-alsa ang katawhan batok sa Duterte administration sa seryosong kampanya sa illegal drugs.
Apan kung ang kamatayon sa duha ka mga batan-on mugna sa ka-abusado ug kapalpakan sa kapolisan butang kini nga dili palabyon.
In fairness gipangkiha na ang mga pulis nga nalambigit niini.
Akong sublion nga way perfect execution sa pakig-gubat batok sa illegal drugs.
Dili sab nato ikalimod ang kamatuoran nga duna nay daghang minor de edad nga nalambigit sa mas brutal nga krimen gumikan sa pagka-gumon sa ginadiling drugas.
Capable na gyud nga manukol sa kapolisan.
* * *
Wa na gyud tay mahimo. Maputol nalang ang ubol-ubol sa mga militante pagsinagit paghandom sa pagkatampalasan ni late president Ferdinand Marcos.
Alang nako pasagdahan nalang nato ang pamilyang Marcos ug iyang mga loyal supporters nga magsaulog karong adlawa ug mag-party sulod sa Libingan ng mga Bayani subay sa iyang ika-100 years nga adlaw’ng natawhan.
Atong paabuton kung seryoso ba ang kawatan nga pamilya nga mo-uli sa ilang mga kinawat nga kabtangan sa gobyerno.
Hangtud karon nagpabaga gihapon sa ilang mga nawong ang mga kanahan. Puwera gaba gyud!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
