Magpaka-responsable kita sa social media

Kinahanglan g’yud nga magpaka-responsable kitang tanan sa paggamit sa internet ug sa social media ilabina sa Facebook.

Paeta sa uban kay gagmay’ng misunderstanding sa pamilya diritso dayon og post sa Facebook unya saw-an ug komentaryohan. Ang resulta silaob ang kapa-ingnan.

Ang ubang tawo magpasagad lang og like sa gi-post nga fake news.

Mao nga akong i-reecho ang panawagan nilang Ma. Theresa Villamor-Ilano, associate editor sa Sun.Star Philippines ug Max Limpag, co-founder sa InnoPub Media, nga kinahanglang basahon pagtarong ang gi-post ug subayon ang kamatuoran ug angayan ba’ng ipasa-pasa.

In fairness puwerte’ng dakua g’yud og tabang sa internet ug Facebook.

Karon lang bag-o, usa sa mga nasulbad nako ang pag-locate sa tag-iya sa Iphone 4 nga niadto pa’ng December 12, 2016 gi-turned-over ni Feliciano Campanilla Labo-labo Jr., taxi driver sa Pangging Taxi.

Naglisod ko’g locate sa tag-iya kay way simcard. Way contact number. Ang nakanindot lang kay maka-access ko sa display sa cell phone kay way password or pin code. Halos pang-gaming ang applications unya sagad sa photo gallery hulagway sa mga bata.

Sa sige nakong sibya aron ipakuha unya way ni-claim, akong gitagoan sa akong locker hangtud nga maghapit na usa ka tuig akong gi-charge kay empty bat ug gipa-connect nako sa among internet sa balay niadtong Miyerkules.

Dihang misuway ko pag-press sa applications sa Facebook mi-appear o mipakita ang account name nga Marla Dela Vega Villa, mao nga nagtoo ko nga siya maoy tag-iya.

Mao nga akong gipa-search sa akong anak si Marla kay wa pa tawon koy hanaw sa Facebook. Dihang nasubay ni Karen, akong anak, among gipahibawo si Marla nga ipakuha iyang unit.

Wa g’yud mo-response si Marla. Mao nga niadtong Miyerkules sa gabii pag-on board nako sa akong radio program sa dySS Super Radyo nagpatabang ko sa among technician nga si Charlie Mongaya kay suweto sab unya parehas sila’g unit.

Dihang nabasahan ni Charlie nga nag-post si Marla og greetings sa iyang bana, gigamit ni Charlie ang iyang mismo nga account aron g’yud mabasahan ang among tuyo nga mauli ngadto kaniya ang iyang cell phone.

Dihang nagbayloanay na sila og mga messages, daku g’yud nako’ng kalipay nga nakompirmar namo ug na-locate g’yud siya nga taga Cagayan.

Mi-anhi sila sa Sugbo niadtong higayuna diha sa Casa Gorordo unya ang iyang unit gipaduwaan sa iyang anak unya nahug sa taxi.

Busa magpasalamat ko sa internet ug sa Facebook nga maoy taytayan niining tanan.

Bitaw dili lalim nga mawad-an kita’g butang nga gamit kaayo unya may sentimental value. Ako na kini’ng natagamtaman dihang nawala ug hangtud karon wa pa igkita ang gi-isyu sa kompaniya nga handheld radio nga halos mikantidad kadto ug dul-an 40 mil pesos.

Mosaludo sab g’yud ko sa mga buotan nga mga taxi driver ug ubang mga tawo nga dili g’yud magpadala sa silaw sa kuwarta ug sa mga mahalong butang.

Maayo unta nga magpabilin kining maong hiyas ug batasan nga gibilin sa atong mga ginikanan ug katigulangan nga butang nga dili ato kinahanglang i-uli g’yud sa tag-iya.

* * *

Akong mga pahasubo ngadto kang Alex Bolongaita among kauban sa broadcast media ug sa tibuuk pamilya subay sa kamatayon sa iyang anak nga si Maxi, kanhi DJ ug Miss KBP Cebu 2016 human gitulis patay sa iyang balay sa Sitio Plazaville, Barangay Busay, niadtong Huwebes sa kadlawon.

Suwerte nga nakasukol si Maxi sa tulisan nga si Reynante Mambiar kay kung wa, lain kining patay nga di masulbad dinhi sa ato.

Apan kinahanglang subayon sa atong kapolisan kay dunay nag text nga ang tinuud nga apelyedo niini, Mendador dili Mambiar.