Astig woman

By: Gerard Pareja September 25,2017 - 01:27 AM

Gerard Pareja

Di ko matinga kon ma probahan nga kang Maxi Bolongaita ang .22 calibre nga pistola nga nakit-an tupad sa iyang patay nga lawas. Wa sab ko matinga nga misukol siya sa tulisan nga mipatay niya. Dili mi suod ni Maxi pero sa ako lang nasayran isug ang mga babaye sa ilang pamilya.

Silingan namo ang iyang lola Editha. Mahimuot akong mahinumdom niadtong gikasab-an ni anhing Editha ang pari sa among parokya kay dugay kini naabot dihang namatay ang akong inahan. Nikurog sa kalagut ang pari nga tingali kadto pa makasab-i atubangan sa mga tao sa usa ka parokyano nga babaye.

Ang mama ni Maxi nga si Marives, classmate sa akong manghud nga babaye sa high school. Ug sa ako lang mahinumduman, usa si Marives sa akong mga kaila nga dili mahadlok mohatag sa iyang mga panahum. Ug nga emphatic kini nga mosulti sa iyang mga obserbasyon.

Dili kami kaila sa iyang amahan nga si Alex. Pero usa siya sa mga dakong tao sa istasyunan sa radio diin nanarbaho ako isip reporter. Nahibawo usab ako nga daghang follower si Alex sa iyang mga programa. Usa na niani ang akong iyaan. Daghan sa mga pro Duterte follower ang maminaw ni Alex.

Ang bana ni Editha, lolo ni Maxi, nga si Ondo, usa ka pulis. Mao nga alang kanako natural nga ma astig kining si Maxi. Ug kay nag-inusara man kini pagpuyo sa lugar nga daghang tulis ug kawat, dako kaayo ang purohan nga duna siya mga hinagiban para panalipud sa iyang kaugalingon. Gani maisugon man kining moingon nga pusilon niya ang mosuway pag atake kaniya.

Nakahinumdom ko nga dunay kugusong bata si Marives sa mga higayon nga mobisita siya sa iyang mama Editha. Di ko makasiguro kon si Maxi ba kadtong gida niya o ang igsuon ba nga lalake ni Maxi.

Paglapas sa pipila ka tuig nakit-an ko si Marives sa Banilad Town Center nga dunay kuyog nga batang dalaga. Si Maxi na diay kadto. Nag-istorya kami ni Marives kabahin sa kamatayon sa iyang igsuon nga si Eric, kabahin sa mga establishments nga ni-invest siya. Ug dayon miingon siya nga mag mass com usab kuno si Maxi. Ang akong mahinumduman kang Maxi niadtong tungora mao ang usa ka daw shy ug chubby nga bata. Kadto ang last encounter ko sa future broadcaster.

Niadtong Huwebes nitambong ko sa gipahigayong press con sa partido ni Mike Rama. Nakuryuso man gud ko kon matinuod pa kadtong hugonhugon nga si Mike maoy ipuli ni councilor Abella sa City Council. Makatawa akong maghunahuna niani kay mura kinig usa ka cosmic joke nga mo igo kang Tomas kong tinuod man kini.

Dugay nagsugod ang maong press con ug maong nipahimus lang una ko paggamit sa Wi-Fi sa Casino Español aron paglili sa Facebook ug didto ko nasayre ang pait nga nahitabo kang Maxi.

RIP Marie Alexis Bolongaita. Nakalas ang imong kinabuhi sa pagsukol mo sa tulisan. Apan sa pag angol mo ning maong panuway, nawad-ag usa ka criminal ang katilingban. Maxi, bilib mi nimo.

Subscribe to our regional newsletter

By providing an email address. I agree to the Terms of Use and acknowledge that I have read the Privacy Policy.
Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

TAGS: death, family, Maxi Bolongaita, mourning

Subscribe to our regional newsletter

By providing an email address. I agree to the Terms of Use and
acknowledge that I have read the Privacy Policy.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.