SUAREZ
Usa na ka santos ang akong paghulagway kang Cebu Archbishop Emeritus Ricardo Cardinal Vidal samtang nagsud-ong ko sa iyang patay’ng lawas uban sa akong pamilya niadtong tungang gabii sa adlaw’ng Biyernes diha sa Cebu Metropolitan Cathedral.
Seryoso ko’ng mag-ampo nga mahimo g’yud siya’ng usa ka santos sa atong simbahan ug makasaksi pa ko’ng buhi nga siya ideklarar sa Vatican.
Wa pa koy nakit-an nga makatupong ni Cardinal Vidal nga simbolo sa gugma, sa kalinaw, sa kahiusahan ug pagkamapahiubsanon.
Gimingaw ko sa iyang mga solemn Masses ilabina sa panahon sa pagsugat sa Pasko ug Bag-ong Tuig.
Ako maoy gitugyanan pag-cover sa iyang mga Santos nga Misa niadtong mga panahon nga konektado pa ko sa DYMF Bombo Radyo Cebu ug karon sa DYSS Super Radyo Cebu.
Maglaum ko nga niining iyang pag-uban na sa atong Langitnong Amahan magpadayon ang mga milagro sa atong mga alagad sa simbahan pinaagi sa seryoso ug tinarong nga pagpangalagad ngadto sa tanan.
* * *
Ang pagpangayo og down payment nga 10 mil pesos sa Chong Hua Hospital pag-admit ni PO3 David Naraja Jr. human napusilan ni anhing Jessie Largo didto sa Talisay maoy dakung hagit sa gobyerno unsaon pagputol sa hingpit kining maong practice sa mga private hospitals nga mi-commercialize pag-ayo sa public health.
Naka-ako man gani pagpangayo’g down payment sa pulis nga biktima sa encounter ug dunay ikabuga, unsa na kaha ngadto sa mga pobre ug yanong pasyente.
Puwerte’ng paeta g’yud basta ma-admit sa private hospital. Mosamot tag kasakit.
Ambot sab kung nganong didto gidala sa Chong Hua si PO3 Naraja ug gibalhin sa Cebu Doctors’ Hospital nga naa man unta ang Vicente Sotto Memorial Medical Center nga gipanag-iya sa gobyerno ug kompleto sa mga gamit ug anaa na diha nagtapok ang mga banggiitang doctor.
* * *
Wa g’yud ko makasabot karon sa liderato sa Cebu City Hall kay gipasagdan lang ang mga dagkung libaong sa atong mga kalsada dinhi sa dakbayan sa Sugbo.
Taud-taud na g’yud na’ng problema diha sa kalsada sa Zapatera Elementary School nga daw lunangan na sa kabaw.
Gawas niini, duna say mga parte sa atong mga kalsada ilabina pasaka paingon sa Marco Polo Hotel nga lawom kaayo ang mga libaong.
Hisgot naman g’yud tag kalsada, nakapanglipagho ko sa akong nasaksihan sa bag-ong gitaod nga dagkung culvert diha sa Gaisano Metro Colon kay gilabayan og mga basura sa mga iresponsable.
Asa naman ang mga manakop niadtong mga pasagad sa paglabay sa basura? Nagmika sa serbisyo?
* * *
Kinahanglang tarungon g’yud pag-assess sa Duterte administration kung angayan na bang ilibkas ang martial law sa intero Mindanao human nagmalinawon na ang Marawi City.
Di ba risgo kung molugak ang trupa sa gobyerno samtang duna pay mga teroristang gipang-gukod?
Kung wa nay risgo sa Marawi kay maoy gihatagan og priority sa military operation, kumusta diha sa mga lugar nga gihugpaan sa mga Abu Sayyaf?
Alang nako di pa angay’ng mag-selebrar ang trupa sa gobyerno kung tinguha g’yud niini ang lasting peace sa Mindanao.
Ang gusto nako, ang lehitimong gobyerno maoy mohari diha ug dili kanang mga pundok nga nagpaka-aron ingnon nga mga gamhanan.
Kung ang pakiggubat maoy angayan nga makab-ot ang tim-os na kalinaw, kumbate!
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
